تۇپكى ماقسات – توكيو وليمپياداسىندا بەلدەسۋلەر وتكىزۋ

جاقىندا ەلىمىزگە تاعى ءبىر قۋانىشتى حابار كەلىپ جەتتى. قازاق كۇرەسى رەسمي تۇردە بيىلعى جازدا تۇركىمەنستاننىڭ اشحاباد قالاسىندا جابىق عيماراتتا وتەتىن ازيا ويىندارىنىڭ باعدارلاماسىنا ەندى. جالپى, ءتول كۇرەسىمىزدى وسى جارىسقا قوسۋ ماسەلەسى بىلتىر تۇركيانىڭ ىستانبۇل قالاسىندا كۇرەس تۇرلەرى بويىنشا وتكەن فورۋمدا شەشىلگەن بولاتىن. ال بيىل بۇكىلالەمدىك كۇرەس وداعىنىڭ (United World Wrestling) پرەزيدەنتى نەناد لالوۆيچ پەن ازيا وليمپيادا كەڭەسىنىڭ پرەزيدەنتى شەيح احمەد ءال-فاحاد ءال-احمەت ءال-ساباح ۇلتتىق كۇرەسىمىزدى 2017 جىلى ازيا ويىندارىنىڭ باعدارلاماسىنا ەنگىزۋ تۋرالى كەلىسىمگە قول قويدى. بۇل تۋرالى بىزگە دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ ايتىپ بەردى. – سەرىك ادام ۇلى, قازاق كۇرەسىنىڭ جابىق عيماراتتاعى ازيا ويىندارىنىڭ باعدارلاماسىنا قوسىلۋى قۇتتى بولسىن! – 2015 جىلى قازاق كۇرەسى بىرىككەن الەمدىك كۇرەس وداعى قۇرامىنا مۇشە بولىپ, ەرەكشە مارتەبە الدى. سوڭعى 12 جىلدا 7 الەم, 11 ازيا چەمپيوناتى, 3 الەم كۋبوگى, 3 ەۋروپا مەن افريكا چەمپيوناتتارى وتكىزىلدى. بىرىككەن الەمدىك كۇرەس وداعى ءبىزدىڭ ەلدىڭ ءتول كۇرەسىمىزدى دامىتۋداعى جۇمىسىن ەسكەرە وتىرىپ, فەدەراتسيانى مۇشەلىككە قابىلدادى. جالپى بۇكىلالەمدىك كۇرەس وداعىمەن  قازاق كۇرەسىن اشعابادتا جابىق عيماراتتا وتەتىن ازياداعا قوسۋ ماسەلەسى بىردەن شەشىلگەن جوق. ولارمەن ۇزاق ۋاقىت كەلىسسوزدەر جۇرگىزدىك. بىلتىر ءبىز تۇركيانىڭ ىستانبۇل قالاسىندا كۇرەس تۇرلەرى بويىنشا وتكەن فورۋمدا قازاق كۇرەسىن اتالعان جارىسقا قوسۋ تۋرالى ءوتىنىش تۇسىردىك. وعان قازاقستان اتىنان دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى, ازيا فەدەراتسياسىنىڭ پرەزيدەنتى مارات ءشامشىنۇروۆ پەن ونىڭ ورىنباسارى ايدارحان قابدوللا قاتىسىپ, ءتول كۇرەسىمىزدىڭ تاريحى, قازىرگى كەزدەگى دامۋ دەڭگەيى تۋرالى بايانداما جاسادى. جيىندا قازاقستان دەلەگاتتارىنىڭ بايانداماسى كوپتىڭ كوڭىلىنەن شىعىپ, 70-تەن استام ەلدىڭ وكىلدەرى ءبىراۋىزدان ۇلتتىق كۇرەسىمىزدى جارىسقا قوسۋ تۋرالى وتىنىشىمىزگە داۋىس بەردى. ونى سىزدەردىڭ گازەتتەرىڭىز ءسۇيىنشى سۇراپ, ءبىرىنشى بولىپ جاريالادى. ال جاقىندا بۇكىلالەمدىك كۇرەس وداعىنىڭ پرەزيدەنتى نەناد لالوۆيچ پەن ازيا وليمپيادا كەڭەسىنىڭ توراعاسى شەيح احمەد ءال-فاحاد ءال-احمەت ءال-ساباح  قازاق كۇرەسىن جابىق عيماراتتا وتەتىن ازيا ويىندارىنىڭ باعدارلاماسىنا قوسۋ تۋرالى كەلىسىمشارتقا قول قويدى. وسى سىندا بالۋاندار 70, 90  جانە 90 كيلودان جوعارى سالماق دارەجەلەرىندە بەلدەسەدى. – قاراپ وتىرساق, كۇرەسىمىز وسى جارىسقا سىناقتان ءوتىپ بارىپ قوسىلعان ەكەن عوي. ەندى بيىلعى جارىس تا 2018 جىلى يندونەزيادا وتەتىن جازعى ازيا ويىندارىنا سىناق تۇرىندە بولا ما ەكەن؟ – ءيا, قازىرگى كەزدە ءبارى سىناقتان وتەدى. ەشكىم ەشقانداي سىناقسىز بىردەن جارىستىڭ باعدارلاماسىنا قوسپايدى. نەناد لالوۆيچ پەن ءال-ساباح  كۇرەستى ءبىر ەمەس, بىرنەشە رەت كورىپ كەتتى. سودان كەيىن بارىپ قازاق كۇرەسىنە جوعارى باعا بەردى. جوعارىدا ايتقان ءسوزىڭىزدىڭ جانى بار, بيىل كۇرەسىمىز جابىق عيماراتتا بولسا, كەلەسى جىلى ءبىز بالۋانداردى جازعى ازيا ويىندارىنا اپارۋدى ماقسات ەتىپ وتىرمىز. شىنى كەرەك, ءبىزدىڭ تۇپكى ماقساتىمىز – 2020 جىلعى توكيو وليمپياداسىندا قازاق كۇرەسىنەن سىناق تۇرىندە بەلدەسۋلەر وتكىزۋ. وسىعان بايلانىستى دۇنيەجۇزىلىك قازاق كۇرەسى فەدەراتسياسى ەل-ەلدە, جەر-جەردە فەدەراتسيالار اشىپ جاتىر. ماسەلەن, قازىر 40 ەلدە فەدەراتسيالار اشىلعان. ەندى ءتول كۇرەسىمىز بيىلعى سىناقتان دا  وتسە, وندا جازعى ازيا ويىندارىنىڭ باعدارلاماسىنا كىرەدى. بۇل جارىس 2018 جىلى يندونەزيانىڭ دجاكارتا قالاسىندا وتەدى. – سەرىك ادام ۇلى, بۇدان باسقا تاعى قانداي جارىستاردى وتكىزۋ جوسپارلارىڭىزدا بار؟ ايتپاقشى, استانادا اشىلعان دۇنيەجۇزىلىك قازاق كۇرەسى فەدەراتسياسىنىڭ جاڭا كەڭسەسى قۇتتى بولسىن! – راحمەت! فەدەراتسيانىڭ جاڭا كەڭسەسى اشىلدى. مىنە, ونى ءوزىڭىز دە كورىپ وتىرسىز. كەڭسەمىز ەسىل وزەنىنىڭ سول جاعالاۋىنداعى «سانكت-پەتەربۋرگ» بيزنەس ورتالىعىندا ورنالاسقان. ال جوسپارلار كوپ. بيىل قىركۇيەك ايىندا استانادا الەم چەمپيوناتىن, تارباعاتاي اۋدانىندا الەم كۋبوگىن, 10-20 ءساۋىر كۇندەرى وڭتۇستىك افريكا رەسپۋبليكاسىنىڭ كەيپتاۋن قالاسىندا افريكا دوداسىن, پولشادا ەۋروپا كۋبوگىن, قىتايدا ازيا چەمپيوناتىن وتكىزۋ جوسپاردا بار.  ال كەلەسى جىلى امەريكا مەن اۆستراليادا قۇرلىقتىق جارىستى وتكىزۋدى جوسپارلاپ وتىرمىز. سونىمەن بىرگە قىتاي حالىق رەسپۋبليكاسىندا جاستار اراسىنداعى الەمدىك باسەكەنى وتكىزەتىن بولامىز. قازىر وسى ماسەلەمەن التايدىڭ ار جاعىنداعى وكىلىمىز ايدارحان قابدوللا اينالىسىپ جاتىر. بۇل كىسى 1990 جىلداردان بەرى قىتايدا ءتول كۇرەسىمىزدى ناسيحاتتاپ, دامىتۋمەن اينالىسىپ كەلەدى. ال بيىل ول ۇلتتار باسپاسىنان قازاق جانە قىتاي تىلىندە 1225 بەتتەن تۇراتىن «قازاق كۇرەسى» دەگەن كىتاپتى شىعارامىن دەپ وتىر. قازىر كىتاپ قىتاي تىلىنە اۋدارىلۋعا جىبەرىلىپتى. – جاقىن ارادا استانادا قازاق كۇرەسىنە ارنالعان كونگرەسس وتكىزىلەدى ەكەن. وسى جيىندا قانداي ماسەلەلەر قارالادى؟ – كونگرەسس 12-14 ناۋرىز كۇندەرى وتەدى. وندا كۇرەسكە قاتىستى بارلىق ماسەلە تالقىلانادى. سول جەردە دۇنيەجۇزىلىك قازاق كۇرەسى فەدەراتسياسىنىڭ اتقارۋشى كوميتەتىن سايلايمىز. –  اڭگىمەڭىزگە راحمەت! اڭگىمەلەسكەن داستان كەنجالين, «ەگەمەن قازاقستان»