سيىردىڭ قۇلاعىن شۇنتيتقان كىم؟

كادىمگى احاڭ – احمەت بايتۇر­سىنوۆتىڭ كىندىك قانى تام­عان ايگىلى اقكول كولىنىڭ جاعاسىنداعى قاراسۋ, اقكول اۋىلدارىنىڭ تۇرعىندارى سوڭعى كۇندەرى الاڭداۋلى. قوراسىنداعى سيىرىنىڭ قۇلاعى كەسىلمەگەن ءۇي كەمدە-كەم بولىپ تۇر. قاراسۋ اۋىلىنداعى 17 ءۇيدىڭ قوراسىنان 46 سيىردىڭ قۇلاعى شۇنتيىپ قالدى. ءسابيت مۇقاننىڭ ون سيىرىنىڭ قۇلاعى كەسىلگەن. «سيىرعا قۇلاق كەرەك ەمەس بولسا, ونى اللا تاعالا دا جاراتپاس ەدى-اۋ. جازدا شىبىنىن قاعاتىن قۇلاقتان ايىرۋ مالعا ازار بەرۋمەن  بىردەي» دەپ وتىر اۋىلداستار. – تاڭەرتەڭ قوراعا كىرسەك, مالدىڭ جارتىسىنىڭ قۇلاعى كەسىلگەنىن بايقادىق. العاشىندا ءتىپتى ءوز كوزىمىزگە ءوزىمىز سەنبەدىك. ءبىزدىڭ مالدىڭ ەنى بۇلاي ەمەس ەدى عوي دەپ ويلادىق, بايقاي كەل­سەك, قۇلاعى بىردەي كەسىلگەن سيىرىمىز ون باسقا جەتتى عوي. بىراق كوزبەن كورىپ, قولمەن ۇستاپ الماعان سوڭ, كىمنەن كورەرىڭدى بىلمەيسىڭ, – دەيدى اسەل مۇقان. ەڭ قىزىعى, ەش جەرگە جانە مالدىڭ ۇستىنە ءبىر تامشى قان تامباعان, قۇلاق بۇرىن كەسىلگەندەي, جارا ورنى دا بىلىنبەيتىن كورىنەدى. العاشىندا كەسىلگەن قۇلاقتى سول جەرگە تاستاپ كەتەتىن بولعان, كەيىننەن قالدىرمايتىن بولىپتى. جەزدە, قايىنى بولىپ ازىلدەسپەسە كوڭىلى ورتاياتىن اۋىلدىڭ قىلجاقپاستارى دەيىن دەسە, ءبىر ءۇي ەمەس, جيىرما شاقتى ءۇيدىڭ مالى قۇلاقتان ايىرىلدى. ارينە, مالعا ازار بەرۋ ءازىل-قالجىڭنىڭ ورنى دا ەمەس قوي. مالمەن كۇن كورىپ وتىرعان اعايىن تۇندە  كۇزەتىپ, تاڭەرتەڭ كوزىن ۋقالاپ اشا سالا, قوراسىنا جۇگىرەتىن بولدى. وسى جاعدايدان قازىر  اۋىلدىق وكرۋگ, جەرگىلىكتى پولي­تسيا قىزمەتى دە حاباردار. الايدا, سيىردىڭ قۇلاعىن كەسكەننىڭ ءىزى دە تابىلعان جوق. اۋىل­داستار كىمنەن كورەرىن ءبىل­مەي­دى. پوليتسيا «قۇلاق كەسەتىن قو­جالاردى» ىزدەۋمەن اينا­لىس­­قا­لى اۋىل سيىرلارىنىڭ قۇلا­عى دا ازىرگە ورنىندا تۇرعان كورى­نەدى. ءنازيرا جارىمبەتوۆا, «ەگەمەن قازاقستان» قوستاناي وبلىسى, جانگەلدين اۋدانى