ۇكىمەت ۇلتتىق قور قاراجاتىن ۇنەمدەۋدى قولعا الادى

قر ۇلتتىق ەكونوميكا ءمينيسترى تيمۋر سۇلەيمەنوۆ ۇكىمەت ۇلتتىق قور قاراجاتىن ۇنەمدەۋگە نەگە كوشكەنىن ءتۇسىندىرىپ بەردى, دەپ حابارلايدى قازاقپارات. ونىڭ ايتۋىنشا, 2016 جىلدىڭ سوڭىندا ۇلتتىق قوردى باسقارۋدىڭ جاڭا تۇجىرىمداماسى شىقتى. وندا ەكى نەگىزگى مىندەت ايقىندالعان. ءبىرىنشىسى, ترانسفەرتتى دوللارمەن ەسەپتەۋدى دوعارۋ. «بۇرىن ترانسفەرت دوللارمەن ەسەپەتەلەتىن, بۇل ءوز كەزەگىندە ۆاليۋتا باعامىنىڭ وزگەرۋى كەزىندە كوپ كەدەرگى كەلتىردى. ەندى ول تەك تەڭگەمەن ەسەپەتەلەدى», - دەپ ءتۇسىندىردى ول. ەكىنشىدەن, ترانسفەرتتەردىڭ كولەمىن ازايتۋ كوزدەلگەن. بيىلعى 2,8 ترلن. تەڭگەدەن, 2020 جىلى 2 ترلن تەڭگەگە دەيىن تومەندەتىلەدى. الداعى ۇشجىلدىق بيۋدجەتتە ول: 2018 جىلى - 2,6 ترلن. تەڭگە, 2019 - 2,3 ترلن. جانە 2020 - 2 ترلن. تەڭگە كولەمىندە كورىنىس تابادى. «وسى ورايدا زاڭدى سۇراق تۋىندايدى: جەتىسپەي تۇرعان قاراجات قايدان الىنادى. بيۋدجەتتى تولىقتىرۋدىڭ باستى كوزى -قوسىمشا ەكونوميكالىق بەلسەندىلىك بولۋى شارت. ونى ءبىز كوپ كولەمدى مەملەكەتتىك باعدارلامالار مەن سالىق بازاسىن كەڭەيتۋ نەگىزىندە جۇزەگە اسىرامىز. مەملەكەت باسشىسى ءوزىنىڭ جولداۋىندا اتاپ وتكەن مىندەتتەردىڭ ءبىرى - جەڭىلدىكتەردى وڭتايلاندىرۋ. ءتيىمدى ەمەس جانە قوعام ءۇشىن ءوزىنىڭ پايداسىن جوعالتقان جەڭىلدىكتەر جويىلادى. سونىمەن قاتار سالىقتىق اكىمشىلەندىرۋدى جاقسارتۋ جوسپارلانعان. ۇلتتىق قوردان الىناتىن ترانسفەرتتەردى قىسقارتۋ مەملەكەتتىڭ الەۋمەتتىك مىندەتتەمەلەردى ورىنداۋىنا ەش كەدەرگى كەلتىرمەيتىنىن كورىپ وتىرمىز», - دەيدى مينيستر. ونىڭ سوزىنە قاراعاندا, سالىقتىق بازانى كاسىپكەرلىكتىڭ بەلسەندىلىگىن ارتتىرۋدىڭ نەگىزىندە قول جەتكىزۋ جوسپارلانعان. «ءبىز قاراجاتتى سالىق كولەمىن ارتتىرۋدان ەمەس, ەكونوميكالىق بەلسەندىلىكتىڭ ارقاسىندا كوپ تۇسىرەمىز», - دەدى سۇلەيمەنوۆ. ەسكە سالا كەتەيىك, ن.نازارباەۆ ءوزىنىڭ جولداۋىندا ۇلتتىق قور قاراجاتىن ءتيىمدى پايدالانۋدى تاپسىرعان بولاتىن.