ابىلايحان قۇسايىنوۆ: جەكپە-جەكتە جوسپارىمدى تولىعىمەن ورىندادىم

قازاقستاندىق بوكسشى ابىلايحان قۇسايىنوۆ (5-0, 4 كو) كانادانىڭ كۆەبەك قالاسىندا جەڭىل سالماقتا مەكسيكالىق وسكار مەحيامەن (8-1-1, 3 كو) جۇدىرىقتاسىپ, تەحنيكالىق نوكاۋتپەن جەڭىسكە جەتكەن. كەزدەسۋ ستيۆەن باتلەر مەن برەندون كۋكتىڭ اندەركارتىندا ءوتتى. وسى جەڭىسىنەن العان اسەرى جايلى ءوز ويىمەن ءبولىستى. «اللاعا مىڭ دا ءبىر شۇكىر! تارتىستى وتكەن كەزدەسۋدە قارسىلاسىمدى تىزە بۇكتىردىم. وسكار مەحيامەن كۇش سىناساتىنىم ءۇش اپتا بۇرىن عانا بەلگىلى بولدى. بىراق بارىنشا دايىندالىپ, جەكپە-جەكتە ويعا العانىمنىڭ ءبارىن جۇزەگە اسىرا الدىم. ارينە, ماعان قاراعاندا تاجىريبەسى كوپ سپورتشى بولعاندىقتان, وڭاي بولدى دەي ايلمايمىن», – دەيدى ابىلايحان. Sports.kz اقپارى بويىنشا, ول 2017 جىلى كوبىرەك جەكپە-جەك وتكىزۋدى ماقسات ەتىپ وتىر. «جاڭا جىلدان كەيىن بىردەن جاتتىعۋعا كىرىسىپ كەتتىم. دايىندىق كەزىندە بىرنەشە سپاررينگ وتكىزدىك. شارشى الاڭدا قورعانىستا تۇرىپ قالماي, شابۋىلداعاندى جاقسى كورەمىن. بۇل جولى دا ءبارى ويداعىداي ءوتتى .بۇگىنگە دەيىن بەس كەزدەسۋ وتكىزدىم. ءالى دە بولسىن تاجىريبە جيناپ, ءوز ءستيلىمدى تابۋىم كەرەك. الداعى ۋاقىتتا ءوزىمنىڭ جەكە ءادىس-تاسىلدەرىممەن بوكستاسامىن دەپ ويلايمىن. وسى جەڭىسىمنىڭ ارقاسىندا Boxrec رەيتينگىندە 128 ورىنعا كوتەرىلدىم. قازىرگى باستى مىندەتىم – كورسەتكىشىمدى جوعارىلاتۋ», – دەدى بوكسشى.