«تەڭىزشەۆرويلدا» 20 مىڭنان استام جۇمىس ورنى اشىلادى

«تەڭىزشەۆرويل» جشس-نىڭ بولاشاق كەڭەيتۋ جوباسى شەڭبەرىندە 20 مىڭنان استام جۇمىس ورنى اشىلادى, دەپ جازادى abctv.kz. بۇل تۋرالى بۇگىن وتكەن «تەڭىزشەۆرويل» جشس-نى بولاشاق كەڭەيتۋ جوباسى – ساعالىق قىسىمدى باسقارۋ جوباسىنىڭ قۇرىلىس كومپانيالارىنىڭ فورۋمىندا قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءبىرجان نۇرىمبەتوۆ حابارلادى. ءىس-شاراعا ورتالىق جانە جەرگىلىكتى اتقارۋشى ورگانداردىڭ, «تەڭىزشەۆرويل» جشس-نىڭ قازاقستاندىق جانە حالىقارالىق مەردىگەرلىك ۇيىمدارىنىڭ وكىلدەرى قاتىستى. ءبىرجان نۇرىمبەتوۆ ءوز سوزىندە جوعارىدا ايتىلعان «تەڭىزشەۆرويل» جشس جوباسى مەملەكەتتەگى وتە ءساتتى ۇزاقمەرزىمدى ينۆەستيتسيالىق ساياساتتىڭ كورىنىسى بولىپ تابىلاتىنىن اتاپ ءوتتى. وسى جوبادا شوعىرلاناتىن شەتەلدىك ينۆەستيتسيالار مۋلتيپليكاتيۆتىك اسەر بەرىپ, بيزنەستىڭ دامۋىنا, سونىمەن قاتار حالىقتىڭ الەۋمەتتىك جاي-كۇيىن جاقسارتۋعا ىقپالىن تيگىزەدى. «بۇگىندە «تەڭىزشەۆرويل» جشس-نىڭ دەرەكتەرى بويىنشا بولاشاق كەڭەيتۋ-ساعالىق قىسىمدى باسقارۋ جوباسىنا 10,5 مىڭ ادام جۇمىسقا ورنالاستىرىلعان, ونىڭ ىشىندە   9,4 مىڭى جەرگىلىكتى قىزمەتكەرلەر, بۇل قازاقستاندا جۇمىس ىستەيتىن جوباداعى بارلىق پەرسونالدىڭ 90 %-ىن قۇرايدى. ۇكىمەت بولاشاق كەڭەيتۋ-ساعالىق قىسىمدى باسقارۋ جوباسى شەڭبەرىندە قازاقستان بويىنشا 20 مىڭنان استام جۇمىس ورنى اشىلادى دەپ كۇتۋدە, بۇل رەتتە كادرلارعا دەگەن جەرگىلىكتى قامتىلىم شامامەن 18 مىڭ ادامعا جەتۋى مۇمكىن. سونداي-اق «تەڭىزشەۆرويل» جشس قازاقستاندىق كادرلاردى وقىتۋ جانە دايىنداۋ مىندەتتەمەسىن ءوز موينىنا الىپ وتىر», – دەدى ءبىرجان نۇرىمبەتوۆ. قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنىڭ مالىمەتىنشە, بولاشاق كەڭەيتۋ-ساعالىق قىسىمدى باسقارۋ جوباسىنا اتىراۋ مەن ماڭعىستاۋ وبلىستارىنان جانە جاقىن ورنالاسقان وڭىرلەردەن (اقتوبە, قىزىلوردا, باتىس قازاقستان وبلىستارى) جۇمىسكەرلەر تارتۋ جوسپارلانىپ وتىر.