مۇراعات رەكوردتار تۋرالى سويلەيدى

قازاقستان رەسپۋبليكاسى پرەزي­دەنتىنىڭ ءارحيۆى XXVIII قىسقى ۋنيۆەر­سياداعا وراي «قازاقستان سپورتى – قازاقستان رەسپۋبليكاسى پرەزيدەنتى ارحي­ۆىنىڭ قۇجاتتارىندا» اتتى تاريحي دەرەكتى كورمە جانە دوڭگەلەك ۇستەل ۇيىمداستىردى. ارحيۆ ديرەكتورى, تەحنيكا عىلىمدارىنىڭ دوكتورى, پروفەسسور بوريس جاپاروۆ شاراعا جينالعان قايراتكەرلەر مەن زيالى قاۋىم, ارحيۆ ماماندارى مەن ستۋدەنتتەر الدىندا قازاقستان سپورتىنىڭ تاريحىن قۇندى مالىمەتتەر نەگىزىندە ەگجەي-تەگجەيلى بايانداپ بەردى. جالپى, كورمەدە قازاقستان رەسپۋبليكاسى پرەزيدەنتىنىڭ ءارحيۆى قورلارىندا ساقتالعان سپورت ماسەلەلەرى تۋرالى جوعارى مەملەكەتتىك ورگانداردىڭ حات الماسۋى, ءتۇرلى جىلدارداعى فوتوسۋرەتتەر, قازاقستاندىق سپورتشىلاردىڭ حالىقارالىق جانە رەسپۋبليكالىق جارىس­تاردا جەتكەن سپورتتىق تابىستارى جەكەلەگەن سپورتشىلار تۋرالى قۇجاتتار بىزگە مۇلدە بەيمالىم نەمەسە كومەسكى تارتقان سىردىڭ بەتىن اشىپ, ءۇنسىز عانا سويلەپ تۇر. مىسالى, 1940 جىلدىڭ قاراشاسىندا قازاق كسر-ءى ءوزىنىڭ 20 جىلدىق مەرەيتويىن اتاپ وتكەن, وسى اتاۋلى مەرەكەگە وراي سپارتاكيادا ۇيىمداستىرىلىپ, وعان 13 ۇلتتان 600-دەن استام سپورتشى قاتىسقان, ونىڭ قۇرامىندا 200-دەن اسا ايەل مەن قازاق ۇلتىنىڭ سپورتشىلارى دا بولعان. ال 1941 جىلدىڭ باسىندا قازاقستاندا 137 مىڭ سپورتشى ەسەپكە الىنعان, ونىڭ 35 مى­ڭى قازاق ۇلتىنىڭ جاستارى بولعان ەكەن. 1949 جىلى كسرو حالىقتارىنىڭ بۇكىلوداقتىق ءىV سپارتاكياداسى ءوتىپ, سپورت­تىڭ 11 تۇرىنەن قازاقستاندىق سپورتشىلار 38 رەت  رەكورد جاڭارتادى. 1951 جىلى ايگىلى مەدەۋ سپورت كەشەنىنىڭ اشى­لۋى – قازاق­ستان سپورتىنداعى ماڭىز­دى كەزەڭ بولىپ تاريحقا ەنەدى. 1960 جىلى تامىزدا سپورتتىڭ 42 تۇرىنەن ح بۇكىل­قازاقستاندىق سپارتاكيادا وتسە, 1965 جىلى كسرو بىرىنشىلىگىندە جەلمەن جارىسقان جۇيرىك ءامين تۇياقوۆ التىن مەدال يەلەنەدى. ال 1970 جىلى قازاقستاننىڭ ەڭ ۇزدىك سپورتشىلارى العاش رەت وليمپياداعا قاتىسىپ, ميۋنحەندەگى حح وليمپيادادا كۇرەستەن ۆ.ريازانتسەۆ التىن مەدال السا, ا.نازارەنكو, ۆ.ابويموۆ, ۆ.كراۆچەنكو, ۆ.سولداتەنكو سەكىلدى ءتورت سپورتشى كۇمىس مەدال سىيلاعان. قازاقستان سپورتىنداعى ەڭ جارقىن ءسات, ول – قازاقستان سپورتشىلارىنا 16 مەدال سىيلاعان 1980 جىلعى ماسكەۋ وليمپياداسى. كۇرەستەن ج.ۇشكەمپىروۆ, ا.بىكوۆ, سۋ دوبىنان س.كوتەنكو, باسكەتبولشى ن.ولحوۆا, بالۋان ش.سەرىكوۆ, اۋىر اتلەت ۆ.مازين, جەلاياق ۆ.مۋراۆەۆ التىن السا, بوكسشىلار س.قوناقباەۆ, ۆ.دەميانەنكو كۇمىس, اتلەت ت.لەسوۆويا, كوگالداعى حوككەيدەن م.ءازيزوۆ, ف.زيگان­گيروۆ, ا.مياسنيكوۆ, و.زاگورودنەۆ, م.نەچيپۋرەنكو, ا.گونچاروۆ – كەڭەس وداعى قۇراماسى ساپىندا اتوي سالىپ, قولا مەدالعا قول جەتكىزدى. ەلىمىز تاۋەلسىزدىك العاننان كەيىنگى سپورتشىلارىمىزدىڭ جەتىستىگى ءبىر توبە. مۇراعات قۇجاتتارىنداعى دەرەكتەر ەل سپورتىنىڭ شەجىرەسىن تارقاتىپ قانا قويماي, جاڭا رەكوردتارعا جەتەلەيتىنى ءسوزسىز.  ايگۇل احانبايقىزى, «ەگەمەن قازاقستان» الماتى