كابانانگاعا بايلانىستى بىرنەشە ۇسىنىس تۇسكەن

«استانا» فۋتبول كومانداسىنىڭ شابۋىلشىسى جۋنيور كابانانگاعا بايلانىستى بىرنەشە ۇسىنىس تۇسكەن. بۇل تۋرالى ونىڭ اگەنتى فابيو بالو مالىمدەدى, دەپ حابارلادى vesti.kz. «ۇسىنىستارعا بايلانىستى حابارلاسقاندار كۇن ساناپ ارتىپ بارادى. تەلەفونىمدا تىنىم جوق. اسىرەسە, قىتاي كلۋبتارى قىزىعۋشىلىق تانىتىپ وتىر. ال بەلگياعا ورالۋ تۋرالى مۇلدەم ويلامايمىز. ءتىپتى, «اندەرلەح» كلۋبى دا ءبىزدىڭ جوسپارىمىزعا كىرمەيدى», – دەدى ول. بەلگيادا باعى جانباعانمەن, جانكۇيەرلەرى كونگولىققا ءاردايىم ساتتىلىك تىلەپ وتىرادى. ايتا كەتەيىك, كابانانگا بەلگيادا 2010-2015 جىلدارى ويناعان. «اندەرلەحتىڭ» قۇرامىندا بولعانمەن, نەگىزگى قۇرامعا ءسىڭىسىپ كەتە المادى. بۇدان كەيىن «بەەرسحوت», «رۋسەلارە», «سەركل بريۋگگە» ۇجىمدارىنا جالعا بەرىلگەن. ال «استاناعا» 2015 جىلى كوشىپ كەلدى. افريكا ۇلتتارىنىڭ كۋبوگىندا ازىرگە ءۇش گول سوعىپ, سۇرمەرگەندەر تىزىمىندە كوش باستاپ كەلەدى. ونىڭ قۇراماسى توپتىق كەزەڭنەن ءبىرىنشى ورىنمەن شىقتى. 29 قاڭتار كۇنى شيرەك فينالدا گانا كومانداسىمەن وينايدى.