مەكتەپكە دەيىنگى بالالاردى ءبىلىم بەرۋمەن قامتۋ 2019 جىلى 100%-عا جۋىقتايدى

2016 جىلى استانادا بالالاردى مەكتەپكە دەيىنگى ءبىلىم بەرۋمەن قامتۋ 70,6%-دى قۇرادى, بۇل 2015 جىلمەن سالىستىرعاندا 6,1% جوعارى. بۇل تۋرالى استانا قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ وتىرىسىندا قالالىق ءبىلىم باسقارماسىنىڭ باسشىسى قاسىمحان سەنعازيەۆ مالىمدەدى, دەپ حابارلادى قازاقپارات. ونىڭ ايتۋىنشا, 2017 جىلى – 72%, 2018 جىلى – 72,1%, 2019 جىلى – 97,7%, 2020 جىلى – 100% كورسەتكىشكە قول جەتكىزۋ جوسپارلانعان. ورىنداردىڭ جەتىسپەۋشىلىگى ماسەلەسىنىڭ شەشىمىن تابۋ ءۇشىن وسى ۇدەرىسكە جەكە سەكتوردى بەلسەندى قاتىستىرۋعا شەشىم قابىلدانعان. قازىرگى تاڭدا جەكە بالاباقشالار جەلىسى 116 ۇيىمدى قۇرايدى. ونىڭ ىشىندە 96 ۇيىمدا مەكتەپكە دەيىنگى ءبىلىم مەن تاربيە بەرۋگە مەملەكەتتىك ءبىلىم بەرۋ تاپسىرىسى ورنالاستىرىلعان. قازىرگى تاڭدا 46 327 ورىندىق مەكتەپكە دەيىنگى 167 مەكەمە اشۋ قاجەتتىلىگى انىقتالعان. وسىعان بايلانىستى باسقارما بالاباقشا قۇرىلىسىن سالۋ بويىنشا جەكە سەرىكتەستەردى انىقتاۋ ماقساتىندا بايقاۋ وتكىزگەن. 2016 جىلى 20 جەلتوقساندا الەۋەتتى جەكە سەرىكتەستەر 1440 ورىندىق بالاباقشالارى بويىنشا 6 بايقاۋ ءوتىنىشىن تاپسىرعان. ۆەدومستۆو باسشىسىنىڭ ايتۋىنشا, مەكتەپكە دەيىنگى مەكەمەلەردىڭ جەتىسپەۋى ماسەلەسىنىڭ ءتيىمدى شەشىمى – كوممۋنالدىق م ۇلىك جانە مەملەكەتتىك ساتىپ الۋ باسقارماسى بالانسىنداعى تۇرعىلىقتى ەمەس عيماراتتاردى بەرۋ. مۇنداي شەشىم, ءوز كەزەگىندە, جەكە مەكتەپكە دەيىنگى مەكەمەلەر جەلىسىن ارتتىرۋعا, مەملەكەتتىك ءبىلىم بەرۋ تاپسىرىستارىن ورنالاستىرۋعا جانە ورىن جەتىسپەۋشىلىگىن قىسقارتۋعا مۇمكىندىك بەرەدى. مەملەكەتتىڭ ءبىلىم بەرۋ تاپسىرىسى دوتاتسياسىنا كەلەتىن بولساق, 2016 جىلى ول 15 900 تەڭگەدەن 20 800 تەڭگەگە ارتقان. جىل سايىن بالاباقشادان ورىن الۋ ءۇشىن كەزەككە تىركەلەتىن بالالار سانى 10 مىڭعا ارتادى جانە قازىر كورسەتكىش 3-6 جاس ارالىعىنداعى 33240 بالانى قۇرايدى. مەملەكەتتىك ءبىلىم بەرۋ تاپسىرىسى بويىنشا 96 جەكە مەنشىك بالاباقشاداعى بالالار سانى – 8849.