شىمكەنتتەگى كولىك-لوگيستيكالىق ورتالىعىنىڭ قۇرىلىسى 2019 جىلى اياقتالادى

شىمكەنتتە سالىنىپ جاتقان كولىك-لوگيستيكالىق ورتالىعىنىڭ قۇرىلىسى 2019 جىلى اياقتالادى دەپ كۇتىلۋدە. بۇل تۋرالى «كولىكتىك-لوگيستيكالىق ايماق» جەتەكشى كومپانياسىنىڭ وكىلدەرى مالىمدەدى, دەپ حابارلايدى قازاقپارات. حالىقارالىق دەڭگەيدەگى نىساننىڭ قۇرىلىسى 2014 جىلى باستالعان بولاتىن. الايدا, ۇلتتىق ۆاليۋتانىڭ قۇنسىزدانۋىنان نىساندى تاپسىرۋ مەرزىمى كەيىنگە شەگەرىلدى. ال «قازاقستان لوگيستيكا گرۋپپ» كومپانياسى تاراپىنان قارجىلاندىرىلعان نىسان سالىنىپ بىتكەن. وسى جىلدىڭ مامىر ايىندا قازاقستاننىڭ دامۋ بانكىنىڭ قولداۋىمەن نىساننىڭ بىرقاتار بولىگىن سالىپ ءبىتىرۋ جوسپارلانىپ وتىر. «بۇل جەردە نەگىزىنەن «ا» ساناتتاعى قويمالار بولادى. وندا قۇرعاق, كليماتتىق قويمالار مەن كونتەينەرلىك الاڭدار, اكىمشىلىك عيمارات بوي كوتەرەدى. قۇرعاق قويمالاردا حالىق تۇتىناتىن تاۋارلار,  وزگەسىندە ەت-ءسۇت ونىمدەرى, كوكونىستەر مەن جەمىس-جيدەكتەر ساقتالادى», – دەدى جوبا جەتەكشىسى دياس ەرمەكباەۆ. قۇنى 15 ملرد 796 ملن تەڭگە بولاتىن جوبا شەكارا ماڭىنداعى وڭتۇستىك قازاقستان وبلىسىنىڭ تاۋار اعىنىن وڭدەۋ بويىنشا ينفراقۇرىلىمعا دەگەن ارتىپ وتىرعان قاجەتتىلىكتەرگە باعدارلانعان. قدب تاراپىنان قارجىلاندىرۋ مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعى اياسىندا ۇسىنىلدى. 15 جىلعا دەيىنگى مەرزىمگە بەرىلگەن قارىز سوماسى 11,8 ملرد تەڭگەنى قۇرايدى. «8 جوباعا 24 ملرد تەڭگە كولەمىندە ينۆەستيتسيا سالىنباق. ونىڭ ىشىندە 250 شارشى مەترىنە قويمالار سالىنادى. سونداي-اق «بيزنەستىڭ جول كارتاسى» باعدارلاماسى اياسىندا ينفراقۇرىلىم, ەلەكتر جارىعى, كارىز جۇيەسىنە, تەمىر جول سالۋعا قارجى قاراستىرىلعان. بۇگىندە ايماقتى ەلەكتر جارىعىمەن قامتاماسىز ەتەتىن ستانسا دايىن بولىپ قالدى», – دەدى «ساۋدا-لوگيستيكالىق ايماعى» كومپانياسىنىڭ اتقارۋشى ديرەكتورىنىڭ ورىنباسارى ەرعالي بەكتاەۆ. ايتا كەتەيىك, ءتۇرلى جۇكتەردى ساقتاۋ جانە قايتا وڭدەۋ بويىنشا وقو قاجەتتىلىگى 1 ميلليون شارشى مەتردى قۇرايدى. بۇل رەتتە وڭىردەگى جۇك اينالىمى قارقىندى وسە تۇسۋدە: 2011 جىلى بۇل كورسەتكىش 111,1 ملن توننانى قۇراسا, 2012 جىلى – 123,8 ملن توننا, 2013 جىلى – 132,9 ملن توننا, 2014 جىلى – 145 ملن توننا, 2015 جىلى 154,6 ملن توننا بولدى.