قازاقستاندىق مەملەكەتتىك-جەكە مەنشىك ارىپتەستىك ورتالىعى بۇكىلالەمدىك اناليتيكالىق ورتالىقتار قاتارىندا

اقش-تىڭ ۆاشينگتون قالاسىندا «اناليتيكالىق ورتالىقتار جانە ازاماتتىق قوعام» اتتى زەرتتەۋ باعدارلاماسى اياسىندا جىل سايىن ۇيىمداستىرىلاتىن جيىن بولىپ ءوتتى. باسقوسۋ بارىسىندا 2016 جىلعى اناليتيكالىق ورتالىقتاردىڭ عالامدىق رەيتىنگى (2016 Global Go To Think Tank Index Report) جاريالاندى جانە الەمنىڭ 182 مەملەكەتى ونىڭ ىشىندە قازاقستاننىڭ ۇزدىك «ويشىل» ورتالىقتارىنىڭ ءمان ماڭىزدىلىعى تالقىلاندى. قورىتىندىسىندا «ورتالىق ازيانىڭ ۇزدىك «ويشىل» ورتالىقتارى» نوميناتسياسى بويىنشا قازاقستاندىق مەملەكەتتىك-جەكە مەنشىك ارىپتەستىك ورتالىعى رەيتينگكە العاش رەت كىردى. اناليتيكالىق ورتالىقتاردىڭ دۇنيەجۇزىلىك يندەكسى (The Think Tank Index) بىرنەشە ساتىدان تۇراتىن عالامدىق زەرتتەۋلەردىڭ ناتيجەسىندە الەمنىڭ ۇزدىك «ويشىل» ورتالىقتارىنىڭ رەيتينگىسىن قالىپتاستىرادى. بۇل كورسەتكىش 2008 جىلدان باستاپ پەنسيلۆانيا ۋنيۆەرستيتەتىنە قاراستى (University of Pennsylvania) «اناليتيكالىق ورتالىقتار جانە ازاماتتىق قوعام» (The Think Tanks and Civil Societies Program) زەرتتەۋ باعدارلاماسى اياسىندا سارالانادى.