ۇلتتىق بانك وكىلدەرى جالعان كۋپيۋرانى قالاي انىقتاۋعا بولاتىنىن ايتىپ بەردى, - دەپ حابارلايدى قر ۇلتتىق بانكىنىڭ ءباسپاسوز قىزمەتى.
ۇلتتىق بانكتىڭ قولما-قول اقشامەن جۇمىس جۇرگىزۋ باسقارماسىنىڭ باستىعى توعجان ابىشەۆانىڭ ايتۋىنشا, بارلىق قولدان جاسالعان ۇلگىلەر ءتۇرلى-ءتۇستى پرينتەرلەردە جانە كادىمگى وفسەتتىك قاعازدا جاسالادى جانە ولاردى ارنايى كاسسا تەحنيكاسى ارقىلى وپ-وڭاي انىقتاۋعا بولادى. بانك تەرمينالى مۇنداي بانكنوتتى قابىلدامايدى, سەبەبى تەحنيكا ارقىلى تانۋعا بولاتىن ارنايى بەلگىلەر بويىنشا تانىپ بىلەدى.
ءباسپاسوز قىزمەتىنىڭ مالىمەتىنشە, 2016 جىلى ۇلتتىق بانككە 10 744 680 تەڭگە سوماعا 3 469 كۇماندى اقشا بەلگىسى ساراپتاماعا كەلىپ ءتۇستى, ولاردىڭ ىشىندە 2 067 070 تەڭگە سوماعا 928 اقشا بەلگىسى قولدان جاساۋ بەلگىلەرى بار دەپ تانىلدى. ال 2015 جىلمەن سالىستىرعاندا جالعان اقشا بەلگىلەرىنىڭ سانى 145 داناعا ازايدى.
"نەگىزىنەن ورتا نومينالداعى بانكنوتتاردى قولدان جاسايدى, سەبەبى ولار اينالىستا كەڭىنەن تارالعان جانە ولارعا باسا نازار اۋدارمايدى. 2016 جىلى ۇلتتىق بانكتىڭ ساراپشىلارى 2012 جىلعى ۇلگىدەگى نومينالى 2000 تەڭگەلىك 261 بانكنوتتى (انىقتالعان قولدان جاسالعان بانكنوتتاردىڭ جالپى سانىنان 28 پايىزى), 2014 جىلعى ۇلگىدەگى نومينالى 1000 تەڭگەلىك 155 بانكنوتتى (انىقتالعان قولدان جاسالعان بانكنوتتاردىڭ جالپى سانىنان 16 پايىزى) انىقتادى", – دەپ ناقتىلادى توعجان ابىشەۆا.
ونىڭ ايتۋىنشا, تەڭگەنى كوبىنەسە لازەرلىك پرينتەردى قولدانا وتىرىپ قولدان جاسايدى. سونداي-اق, ول بىر بولىگى تۇپنۇسقا, ال ەكىنشىسى اعىندى پرينتەردە باسىپ شىعارىلعان ەكى جەلىمدەلگەن بولىكتەن تۇراتىن قولدان جاسالعان بانكنوتتاردىڭ سيرەك كەزدەسەتىنىن ايتتى.
"بۇل رەتتە اعىندى پرينتەردىڭ كومەگىمەن باسىپ شىعارىلعان بانكنوتتىڭ بولىگىندە ۋلتراكۇلگىن قورعانىش بولمايدى, ال جارىققا توسىپ قاراعان كەزدە ەكى بەتىن جەلىمدەگەننەن ايقىن ءىز كورىنىپ تۇرادى, - دەپ اتاپ ءوتتى. - سونىمەن قاتار 2016 جىلى 2014 جىلعى ۇلگىدەگى نومينالى 1000 تەڭگەلىك بانكنوتتاردى قولدان جاساۋدىڭ جاڭا تۇرلەرى پايدا بولدى. بۇل بانكنوتتار اعىندى پرينتەردە باسىپ شىعارىلدى. قورعانىش ءجىبى جانە "سپارك" ەلەمەنتى جىلتىراعى بار تىرناققا ارنالعان لاكپەن سالىنعان", - دەدى ول.
باسقارما باسشىسىنىڭ ايتۋىنشا, ۇلتتىق بانكتە جالعان تەڭگەنى انىقتاۋ ءۇشىن
"سەزىن-قارا-اۋدارىپ كور" ءادىسى قولدانىلادى. "الدىمەن بانكنوتتى سەزىنۋ قاجەت. بانكنوت قاعازى ەرەكشە شىتىرلايدى. بۇل بانكنوتتى شىعارۋعا جاسالعان ارنايى قاعاز. بارلىق بانكنوتقا بانكنوتتىڭ وزىنە بەدەر بەرەتىن ارنايى ءمور قويىلعان. بۇل - ساۋساقتىڭ ۇشىمەن جاقسى اجىراتۋعا بولاتىن شىعىڭقى جوعارى بەدەرلى ەلەمەنتتەر", دەدى ت.ابىشەۆا.
سودان سوڭ, ونىڭ ايتۋىنشا, بانكنوتقا مۇقيات قاراۋ قاجەت. الدىمەن قاراعان كەزدەگى جالپى اسەر قالىپتاستىرىلادى: اقشا بەلگىسى تازا, ايقىن, قاراما-قارسى نەمەسە لاس ەمەس پە, داقتارى نەمەسە اققان بوياۋلارى بار ما, جوق پا", - دەدى توعجان ابىشەۆا.
ونىڭ ايتۋىنشا, بانكنوتتى جارىققا توسىپ قاراعان كەزدە كوپ اقپارات الۋعا بولادى, بۇل سۋتامعى بەلگىلەرگە قاتىستى – اعىمداعى سەريادا بۇل ميفتىك تانىمداعى "سامۇرىق" قۇسى, نومينالدىڭ تسيفرلىق بەينەلەنۋى. دەمەك, ول جالعان اقشا بەلگىلەرىندە بولاتىن ايعىزدالعان سۋرەت ەمەس, ناقتى ءبىر سۋرەت, - دەپ جالعاستىردى ول - سول سياقتى قاعازدىڭ بەتىندە جارىققا توسىپ قاراعان كەزدە جازۋى بار تۇتاس ءجىپ رەتىندە كورىنەتىن, جازۋى بار پۋنكتيرلەر - تۇتاس ماگنيتتى جانە ۇزىك-ۇزىك (مەتالل) ءجىپتى كورۋ قاجەت.
سوڭعى ءادىس -
"اۋدارىپ كور". بانكنوتتاردا ءتۇسى وزگەرەتىن ارنايى بوياۋمەن سالىنعان بەينەلەر بولادى, بانكنوتتاردى اۋدارعان نەمەسە كولبەۋ بۇرىشىن وزگەرتكەن كەزدە ولاردىڭ ءتۇسى جاسىل تۇستەن التىنداتىلعان تۇسكە دەيىن وزگەرەدى. اڭگىمە سپارك ەلەمەنتى جايىندا بولىپ وتىر", - دەدى بانك وكىلى.
ت.ابىشەۆانىڭ ايتۋىنشا, "سەزىن-قارا-اۋدارىپ كور" ءادىسى قاراپايىم ادامنىڭ بانكنوتتىڭ تۇپنۇسقالىعىن ارنايى جابدىقسىز انىقتاۋى ءۇشىن جەتكىلىكتى. "ارينە, بانكنوتتاردا قورعاعىش ەلەمەنتتەر كوپ. بىراق "كوزبەن كورىپ" ساراپتامادان وتكىزۋ ءۇشىن جوعارىدا اتالعان ەلەمەنتتەرگە كوڭىل اۋدارۋدىڭ ءوزى جەتكىلىكتى", دەدى ول.
سونداي-اق, ابىشەۆا قازاقستان رەسپۋبليكاسى قىلمىستىق كودەكسىنىڭ "جالعان اقشا نەمەسە باعالى قاعازدار جاساۋ, ساقتاۋ, الىپ ءوتۋ نەمەسە وتكىزۋ" 231-بابىنا سايكەس, اقشا قاراجاتىن قولدان جاساۋمەن بايلانىستى قىلمىستى جاساعانى ءۇشىن مۇلكi تاركiلەنiپ, ون ەكى جىلعا دەيiنگi مەرزiمگە باس بوستاندىعىنان ايىرۋ كوزدەلگەنىن ەسكە سالدى.
