ماڭعىستاۋدا جىلدىڭ العاشقى ۇشەمى ومىرگە كەلدى

ءبىر قىزىعى, انا قۇرساعىنداعى سابيلەردىڭ ۇشەم ەكەنىن دارىگەرلەر وتا جاساۋ كەزىندە ءبىر-اق بىلگەن! وعان دەيىن بىرنەشە رەت ۋزي اپپاراتىنا ءتۇسىپ, قۇرساعىندا ەگىز ءسابي بارىن بىلگەن 34 جاستاعى اقمارالعا دا ۇشەمدى ومىرگە اكەلۋ توسىن سىي بولسا كەرەك. تاۋىق جىلىنىڭ العاشقى ۇشەمى ومىرگە وسىلايشا اتا-اناسى مەن باۋىرلارىن دا, دارىگەرلەردى دە تاڭعالدىرىپ كەلدى. الدىمەن ومىرگە كەلگەن قىز بالانىڭ سالماعى 2 كەلى 480 گرامم بولسا, ەر بالا  2 كەلى 220 گرامم سالماقپەن تۋىلعان, ال «جاسىرىنىپ» كەلگەن ءۇشىنشى ءسابي – قىز بالانىڭ سالماعى 1 كەلى 950 گرامم بولعان. -ماڭعىستاۋ وبلىستىق پەريناتالدىق ورتالىققا ماڭعىستاۋ اۋدانىنان كەلگەن انانىڭ قان قىسىمى 180/100-گە دەيىن كوتەرىلدى.   جاعداي قاۋىپتى بولعان سوڭ وعان وتا جاسالدى. وتا بارىسىندا ءۇشىنشى بالانىڭ بار ەكەنى انىقتالدى. قازىرگى تاڭدا ۇشەمنىڭ اناسىنىڭ دا, سابيلەردىڭ دە دەنساۋلىقتارى جاقسى. ۇشەمدەر ەكى اپتاداي  دارىگەرلەردىڭ باقىلاۋىندا بولىپ, سالماق جيناقتاپ, تەكسەرۋدەن ءوتتى. بۇگىن اناسى مەن ۇشەمدەردى وتباسىنا شىعارىپ سالىپ جاتىرمىز, دەيدى وبلىستىق پەريناتالدىق ورتالىعى باس دارىگەرىنىڭ ەمدەۋ ءىسى جونىندەگى ورىنباسارى جاپىراق ەپەنوۆا. وتاسقاندارىنا 12 جىل بولعان, بۇعان دەيىن وتباسىندا 4 ۇل بالا تاربيەلەپ وتىرعان جانسەرىك تۇياقباەۆ پەن اقمارال جالجانوۆانىڭ وتباسىنا ءمادينا, ءادينا ەسىمدى قىز بالالار مەن نۇريسلام اتتى ۇل قوسىلدى. اتا-انانىڭ ارمانى ولاردى يماني جولمەن تاربيەلەپ-ءوسىرۋ. ماڭعىستاۋ وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاۋىنشا, اتالمىش ورتالىقتا جىل باسىنان بەرى 400-گە جۋىق بالا دۇنيە ەسىگىن اشقان. ال, وتكەن جىلى وڭىردە 20 مىڭ ءسابي ومىرگە كەلگەن بولسا, ونىڭ 7650-ءى وبلىستىق پەريناتالدىق ورتالىقتا دۇنيەگە ەسىگىن اشقان. ولاردىڭ ىشىندە ۇشەۋى ۇشەم, ال 78-ءى ەگىزدەر. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى