پروموۋتەر: ەلەۋسىنوۆ پاكياومەن جۇدىرىقتاسۋى ءتيىس

MJA Entertainment اۆستراليالىق پروموۋتەرلىك كومپانياسىنىڭ باسشىسى مايك التامۋرا دانيار ەلەۋسىنوۆ پەن يۆان دىچكونىنىڭ كاسىبي رينگتەگى العاشقى جەكپە-جەگىندە كىمنىڭ شىعاتىنىن جانە ولاردىڭ بولاشاعى جايلى بولجامىن ايتىپ بەردى. بۇل تۋرالى vesti.kz حابارلادى. «قازىرگى ۋاقىتتا دەريك سانتوۆ (سەرگەي كوۆالەۆتىڭ ەكس-باپكەرى) داۋرەنمەن (دانياردىڭ اعاسى) ماياميدە جاتتىعىپ ءجۇر. ول ءوز ءىسىنىڭ بىلىكتى مامانى. دەريك اعايىندى ەلەۋسىنوۆتەردى جانە دىچكونى جاتتىقتىرادى», – دەدى پروموۋتەر. سونىمەن قاتار, ول ەلەۋسىنوۆتىڭ الەم بوكسىنىڭ ابىرويلى ورتاسىنا قوسىلۋدى ماقسات ەتۋى كەرەك ەكەنىن ايتتى. «ول ناعىز حاس شەبەردىڭ ءوزى. مەنني پاكياو سىندى جارتىلاي ورتا سالماقتاعى كەز كەلگەن بەدەلدى بوكسشىمەن جۇدىرىقتاسۋ بولاشاقتا ونىڭ ماقساتى بولۋى ءتيىس», – دەدى مايك التامۋرا. دانياردىڭ اعاسى داۋرەن جايلى پىكىرىندە ول چەمپيون بولۋعا مۇمكىندىكتىڭ بارىن ايتىپ ءوتتى. ايتۋىنشا, داۋرەندى كوپشىلىك ۇمىتىڭقىراپ قالعان, الايدا, ول ءاردايىم جۇمىس ىستەپ, دامۋ ۇستىندە كەلەدى. ورتا ديۆيزيوندا ءالى-اق ۇلكەن جەتىستىكتەرگە جەتەدى دەگەن سەنىم ءبىلدىردى. ال يۆان دىچكو جايلى: «ونىڭ تالانتىنا سەنەمىن, اسا اۋىر سالماقتا الەمدىك دەڭگەيگە شىعۋ ءۇشىن پسيحولوگياسى, پارامەترى, ينتەللەكتى بار. لوندونداعى جەكپە-جەگىن كورگەنمىن, ەنتوني دجوشۋامەن جەكپە-جەگىنىڭ ناتيجەسى داۋلى. دىچكو بولاشاقتا وعان ەسە قايتارۋى مۇمكىن», – دەدى.