قازاقستان رەسپۋبليكاسىنىڭ پرەزيدەنتى
ن.ءا.نازارباەۆتىڭ ۇندەۋىن قولداۋ تۋرالى قازاقستان حالقى اسسامبلەياسىنىڭ
مالىمدەمەسى
قۇرمەتتى وتانداستار! 2017 جىلعى 25 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى تۋرالى قازاقستان حالقىنا ۇندەۋ جاريالادى. قازاقستان حالقى اسسامبلەياسى مەملەكەت باسشىسىنىڭ ەلدىڭ مۇددەسى مەن زاماننىڭ تالابىنا ساي كەلەتىن, بيلىكتىڭ بارلىق تارماقتارىنىڭ وكىلەتتىكتەرىن جانە جاۋاپكەرشىلىگىن ارتتىرۋ باستاماسىن تولىق قولدايتىنىن بىلدىرەدى. ەلباسىنىڭ باسشىلىعىمەن ەل تاۋەلسىزدىگىنىڭ 25 جىلدىق جەتىستىكتەرى, بەس ينستيتۋتتىق رەفورمانى ىسكە اسىرۋ, قازاقستاندىق بىرەگەيلىك پەن بىرلىكتى نىعايتۋ جۇمىستارىنىڭ جۇرگىزىلۋى, «ماڭگىلىك ەل» پاتريوتتىق اكتىسىنىڭ قابىلدانۋى – پرەزيدەنتتىڭ ءوز قۇزىرەتىنىڭ ءبىر بولىگىن پارلامەنتكە, ۇكىمەتكە جانە اتقارۋشى بيلىك جۇيەسىنە بەرۋ تۋرالى تاريحي شەشىمىنە مەملەكەت پەن قازاقستاندىق قوعامنىڭ تولىعىمەن دايىن ەكەندىگىنىڭ ءسوزسىز دالەلى. ۇكىمەتتىڭ جانە اتقارۋشى بيلىكتىڭ پارلامەنت پەن جەرگىلىكتى وكىلدى ورگاندار الدىندا ەسەپ بەرۋىن كۇشەيتۋ – قازاقستاننىڭ دەموكراتيا جولىنداعى ودان ءارى ورنىقتى دا بۇلجىماس جاڭا قادامى. بۇل ۇكىمەتكە دە, پارلامەنتكە دە قازاقستان حالقىنىڭ الدىندا زور جاۋاپكەرشىلىك جۇكتەيدى. ەلباسىنىڭ باستاماسى قازاقستاننىڭ دامۋىنا سونى سەرپىن قوساتىنى ءسوزسىز. قازاقستاننىڭ الەمنىڭ دامىعان وتىز مەملەكەتىنىڭ قاتارىنا قوسىلۋ, بولاشاعى ءبىرتۇتاس ەل بولۋ جولىنداعى مىندەتتەرى ۇتىمدى شەشىمدى تالاپ ەتەدى. پرەزيدەنت نۇرسۇلتان ءابىش ۇلى نازارباەۆتىڭ قابىلداعان شەشىمى اسا پارمەندى ساياسي جاڭاشىلدىق جانە قوعامداعى الەۋمەتتىك احۋالدىڭ كۇردەلەنۋىنە, الەمدىك ساياسي ۇدەرىستىڭ جاڭا ۇردىستەرىنە جاۋاپ بولىپ تابىلادى. وكىلەتتىكتەرمەن ءبولىسۋ – پرەزيدەنتتىڭ بارشاعا بەلگىلى ساياسي قولتاڭباسىنىڭ, بۇكىل الەم مويىنداعان «قازاقستاندىق جولدىڭ» جارقىن كورىنىسى. بۇل قادام قازاقستاننىڭ بەيبىتشىلىك پەن كەلىسىم ستراتەگيالىق ساياساتىنا, سەنىم ساياساتىنا تولىعىمەن ۇندەس جانە قوعامنىڭ مەملەكەتتىك باسقارۋ ىسىنە قاتىسۋىن كەڭەيتەدى. ەلباسى نۇرسۇلتان نازارباەۆتىڭ ساياسي ەرىك-جىگەرى زاڭ شىعارۋشى بيلىكتىڭ ءرولىن ارتتىرۋ ارقىلى حالقىمىزدىڭ بىرلىگى مەن كەلىسىمىن نىعايتۋعا باعىتتالعان جانە قازاقستانداعى دەموكراتيالىق ۇدەرىستەردى جالعاستىرۋعا تىڭ سەرپىن بەرىپ وتىر. قازاقستان حالقى اسسامبلەياسى بۇل تۇرعىدا, اسسامبلەيادان سايلانعان پارلامەنت ءماجىلىسىنىڭ دەپۋتاتتارىنا, ماسليحاتتارداعى قحا دەپۋتاتتىق توپتارىنىڭ مۇشەلەرىنە, قوعامدىق كەلىسىم كەڭەستەرىنە, ەتنومادەني بىرلەستىكتەر مەن قحا قۇرىلىمدارىنىڭ بارلىق وكىلدەرىنە زور جاۋاپكەرشىلىك ارتادى ءجانە ساياسي رەفورمالاردى ازىرلەۋ مەن ءىسكە اسىرۋ ۇدەرىستەرىن قولداۋ ءۇشىن جوعارى ازاماتتىق بورىشىن وتەۋگە شاقىرادى. ءبىز, قازاقستان حالقى اسسامبلەياسى كەڭەسىنىڭ مۇشەلەرى, پرەزيدەنتتىك جاڭا رەفورمانى تالقىلاۋعا قاتىسۋشىلاردىڭ بارلىعىن – ساياساتكەرلەردى, ساراپشىلاردى, عىلىمي جانە شىعارماشىل زيالى قاۋىم وكىلدەرىن, جاستاردى, ازاماتتىق قوعام جانە بۇقارالىق اقپارات قۇرالدارى وكىلدەرىن وسى ماسەلەگە ەرەكشە ازاماتتىق جاۋاپكەرشىلىك تۇرعىسىنان قاراۋعا شاقىرامىز. ءبىز پرەزيدەنتتىڭ قازاقستان حالقىنىڭ ءال-اۋقاتىن ارتتىرۋعا جانە وركەندەۋى ءۇشىن جۇزەگە اسىرىلاتىن جاڭا باستاماسىنىڭ تابىستى جۇزەگە اساتىنىنا كامىل سەنەمىز! قازاقستان حالقى اسسامبلەياسىنىڭ كەڭەسى استانا ق., 2017 جىلعى 26 قاڭتار
