كاسىپكەردىڭ ساۋاتى بازاردا اشىلادى

وڭتۇستىكتە ءبىر كەزدەرى وبلىس­تىق سوتتىڭ توراعاسى بولىپ تىلەكتەس بارپىباەۆ دەگەن ازامات جۇمىس ىستەدى. اشۋى الدىندا بولعانىمەن, ارتى كەڭ, رۋ­حانياتقا جاقىن ازامات جۋر­ناليستەرمەن ءباسپاسوز ءماس­ليحاتىن وتكىزىپ تۇرادى. سون­داي ەمەن-جارقىن جۇزدەسۋدىڭ بىرىندە وزگە وڭىردەن كەلگەن سوت توراعاسىنان: «ءسىزدى شىمكەنتتە ءوز سالاڭىزدا قانداي جاعدايلار تاڭعالدىرادى؟» دەپ سۇراعانبىز. «شىمكەنتتىڭ ازاماتتارى وتە اشىق, كىشىپەيىل. بىراق, ءوز قۇقىق­تارىن بىلە تۇرىپ بىلگىسى كەلمەيتىن سياقتى كورىنەدى. قان­داي دا ءبىر جاعدايمەن سوتقا شاقىرىلسا, سىياقى بەرىپ كەتكىسى كەلىپ تۇرادى. وزىنە ەشقانداي جازا كورىلمەيتىندىگىن دە ەسكەر­مەيدى», دەگەن. راسى سول. باياعى پاتشالىق كەزەڭدەگى سوتتىڭ ەزگىسى ءوتىپ كەتكەن بە, ءبارى بولماسا دا سوت الدىنا بارعان ازاماتتاردىڭ كوبى ەشقانداي قىلمىسقا تارتىلۋعا نەگىز جوقتىعىن بايىپتاپ جاتپاي, «ءشاي ءىشىڭىز» دەپ قالتاسىنا قولىن سالىپ, سول جەردەن اۋلاق­تاعانشا جانى شىعىپ كەتە جازدايدى. سۋديا السا قۋانادى, الماسا سوتقا تارتىلارداي ۇنجىر­عاسى ءتۇسىپ كەتەدى. بۇل بۇرىنعى جاعداي دەگەنى­مىزبەن, قىلمىستىق كودەكستىڭ باپتارىن تەرەڭدەتىپ وقىپ, پارا­عىن ساپىرىپ وتىراتىندار ءالى دە از. ونى ءوزىمىز دە جۇمىس بارى­سىنان بايقايمىز. ءتىلشى­لەر قوسىنىنا دا بولمايتىن نارسەدەن قاراداي ۇركىپ, اراشا سۇراپ تەلەفون شالىپ جاتادى. زەردەلەپ كورسەڭ, تۇك تە ەمەس, جازاعا تارتىلاتىنداي نەگىز جوق. كاسىپكەرلىك سالاسىندا دا سولاي. ءار اۋداندا كەڭەس بەرەتىن, بيزنەس-جوبا ۇسىناتىن كاسىپكەرلىك مەكتەپتەرى جۇمىس جاساپ تۇرسا دا, «اناۋ انانداي دەپ ايتتىعا» كوبىرەك سەنەتىندەر ءالى دە بايقالادى. سوندىقتان, وبلىستاعى كاسىپكەرلەر پالاتاسى «ءوزىڭ كەل» دەپ وتىرا بەرمەيتىن جاڭا جوبانى ىسكە قوستى. پالاتا ماماندارى بازارداعى ساتۋشىلار مەن شاعىن كاسىپكەرلەرگە سۇراعان سۇراقتارىنا جاۋاپ بەرەدى. ول ءۇشىن قالاداعى ءىرى ساۋدا ورىندارى – «سامال» جانە «اينا» بازارلارىنان كەڭەس بەرەتىن كابينەتتەر اشىلدى. بۇل كابينەتتەردە زاڭگەرلەر جانە ەسەپشىلەر, سالىقتىق زاڭ­ناما قىزمەتكەرلەرى ازاماتتار قىزىقتىرعان ساۋالدارعا جاۋاپ بەرەدى. بۇل – ماجبۇرلىكتەن تۋىنداعان جوبا. ويتكەنى, شاعىن كاسىپ يەلەرى سالىق تولەۋ, ءوز جۇمىستارىنىڭ ەسەپ-قيسابىن جاساۋدا ءتۇرلى قيىندىقتارعا دۋشار بولىپ جاتادى. جاڭا قابىلدانعان قۇجاتتاردىڭ نورمالارىن بىلمەگەندىكتەن, جوق جەردەن اكىمشىلىك جازاعا تارتىلىپ جاتاتىندارى جانە بار. كاسىپكەرلەر پالاتاسى وسىنىڭ ءبارىن وي ەلەگىنەن وتكىزىپ, رەسپۋب­ليكا بويىنشا ەڭ العاشقى جوبانى ىسكە اسىرۋعا كىرىسىپ كەتتى. بولاشاقتا بۇل باستامانى كەدەن سالاسىنىڭ قىزمەتكەرلەرى تولتىرادى. وبلىس پروكۋراتۋراسىن­دا وتكەن ءبىر جيىنعا قاتىسقا­نىمىزدا, جاڭادان اشىلعان فيرمالاردىڭ اي اينالماي جاتىپ تەز جابىلاتىندىعى تۋرالى دابىل كوتەرىلگەن ەدى. ەندى بيزنەس وكىلدەرى ءسات سايىن الدارىنان شىعا بەرەتىن كەدەرگىلەردەن قۇتىلادى. ال كاسىپكەر ساۋاتىنىڭ اشىلعانى ءوز شارۋاشىلىعىن وڭتايلى جۇرگىزۋىنە مۇمكىندىك بەرەدى. باقتيار تايجان, «ەگەمەن قازاقستان» وڭتۇستىك قازاقستان وبلىسى