Sport360.com سايتى فۋتبولدان افريكا ۇلتتار كۋبوگى-2017 تۋرنيرىندە كونگو دەموكراتيالىق رەسپۋبليكاسى مەن توگو قۇرامالارى اراسىنداعى ۇزدىك ويىنشىنى تاڭدادى. بۇل تۋرالى sports.kz حابارلادى.
بۇل مارتەبەگە كەزەكتى رەت «استانا» فۋتبولشىسى كابانانگا جۋنيور يە بولدى. ول توگو قاقپاسىنا سوعىلعان ءۇش گولدىڭ ءبىرىن ءوز ەنشىسىنە جازعان. بۇعان دەيىن ول ماروككو ۇجىمىنا قارسى ويىندا جەڭىستى گولدى سوققاندىقتان كەزدەسۋدىڭ ۇزدىگى اتانعان. اتالمىش تۋرنيردە بارلىعى ءۇش گولدىڭ جانە ءبىر ناتيجەلى پاستىڭ اۆتورى اتانعان ول سۇرمەرگەندەر تىزىمىندە كوش باستاپ تۇر.
العاشىندا باس باپكەر فلوران يبەنجە ونى تۋرنيرگە قاتىساتىنداردىڭ تىزىمىنەن شەت قالدىرسا, بۋكمەكەرلەر وعان مۇلدەم ءۇمىت ارتپاعان ەدى. الايدا, قازىر Bet365.com بۋكمەكەرلىك كەڭسەسى وعان 2,5 كوەففيتسيەنت بەرىپ, ءتۋرنيردىڭ ءبومبارديرى اتانادى دەپ سەنىپ وتىر. ال «ليۆەرپۋلدە» ۇزدىكتەردىڭ ءبىرى بولىپ جۇرگەن سەنەگالدىق ساديو مانە 4 كوەففيتسيەنتپەن ەكىنشى ورىندا تۇر.
توپتىق كەزەڭنىڭ قورىتىندىسى بويىنشا كابانانگا ۇزدىك قۇرامانىڭ قاتارىنا ەندى.
افريكا كۋبوگىندا مەرگەندىگىمەن كوزگە ءتۇسىپ جۇرگەن فورۆارد جايلى الەمنىڭ بىرنەشە اقپارات قۇرالدارى جارىسا جازۋدا.
«بەلگيا ءۇشىن بۇل ءتۋرنيردىڭ سۇرمەرگەنى تاڭسىق ويىنشى ەمەس. «اندەرلەحت» ساپىندا دوپ تەپكەنىن بىلەتىندەر بار. بىرنەشە رەت گول سوققانمەن, جاراقاتتارىنىڭ سالدارىنان بويىنداعى تالانتىن اشا المادى. دەگەنمەن, قازاقستاندىق كوماندانىڭ ەۋروكۋبوكتىق ويىندارعا شىعۋىنا سەپتىگىن تيگىزگەنىن ەستەن شىعارمايىق. وتكەن ماۋسىمدا «اتلەتيكو», «بەنفيكا», «گالاتاساراي» سىندى الپاۋىت كوماندالارمەن كۇش سىناسقان», – دەپ جازدى DHnet.be سايتى.
«استانا» ويىنشىسى بەلگيا جەرىندە 2010-2015 جىلدارى ويناعان. 2010-2013 جىلدارى «اندەرلەحتتە» نەبارى 7 ماتچ وتكىزگەننەن كەيىن «بەەرسحوت» جانە «رۋسەلارە» كوماندالارىنا جالعا بەرىلدى. ال 2013-2015 جىلدارى «سەركل بريۋگگەدە» ويناعان سوڭ قازاقستانعا كوشىپ كەلدى.
ايتا كەتەيىك, افريكا ۇلتتار كۋبوگىنىڭ شيرەك فينالىندا كابانانگانىڭ كومانداسى 28 قاڭتاردا گانا قۇراماسىنا قارسى وتكىزەدى.
