سەناتور د.نازارباەۆا: «سيريا ماسەلەسىندە سەڭ قوزعالدى»

پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا باستاعان وسى كوميتەتتىڭ مۇشەلەرى قازاقستاننىڭ 2014-2020 جىلدارعا ارنالعان سىرتقى ساياسات تۇجىرىمداماسىن ىسكە اسىرۋ ماسەلەلەرىن تالقىلادى, دەپ حابارلادى سەناتتىڭ ءباسپاسوز قىزمەتى. د.نازارباەۆا گەوساياسات جانە الەمدىك ديپلوماتيا­دا استانا پروتسەسى رەتىندە تاريح­قا ەنگەن سيرياداعى جاعداي­دى رەتتەۋ جونىندەگى كەلىسسوز­دەردىڭ اياقتالۋىمەن سىرتقى ىستەر مينيسترلىگىنىڭ ۇجىمىن قۇتتىقتادى. «بۇل ەلباسى­مىزدىڭ ساياسي كۇش-جىگەرى مەن ءبىزدىڭ ەلىمىز ديپلوماتتارىنىڭ قاجىرلى قىزمەتىنىڭ ارقاسىندا مۇمكىن بولدى. وسىناۋ اسا ماڭىزدى ءارى ناتيجەلى جۇمىس ءۇشىن كوميتەتتىڭ اتىنان العىس ايتامىن. جەدەل ناتيجەنى ەشكىم كۇتىپ وتىرعان جوق, دەگەنمەن, ەڭ باستىسى, سيريا ماسەلەسىندەگى سەڭ قوزعالدى, ەندى ونىڭ وڭ باعىتتا عانا داميتىنىنا سەنىم ارتامىز», – دەدى سەناتور. سىرتقى ىستەر ءمينيسترى قايرات ءابدىراحمانوۆ سىرتقى ساياسي قىزمەتتىڭ قاعيداتتارى مەن قادامدارى, ماقساتتارى مەن مىندەتتەرى جانە باسىمدىقتارى جونىندەگى نەگىزگى ماسەلەلەر كورىنىس تاپقان سىرتقى ساياسات تۇجىرىمداماسىمەن سەناتورلاردى ەگجەي-تەگجەيلى تانىس­تىردى. 2017-2018 جىلدارعا بىرىك­كەن ۇلتتار ۇيىمى قاۋىپ­سىزدىك كەڭەسىنىڭ تۇراقتى ەمەس مۇشەسى لاۋازىمىنداعى قازاق­ستاننىڭ جۇمىسىنداعى باسىم­دىق­تارعا ەرەكشە نازار اۋدارىلدى. د.نازارباەۆا بۇۇ قاۋىپ­سىز­دىك كەڭەسىندەگى قازاقستاندىق ديپلوماتتاردىڭ جۇمىسىن رەسپۋبليكالىق ەلەكتروندى بۇقارالىق اقپارات قۇرالدارى مەن باسىلىمداردا جاريا ەتۋدى ۇلعايتۋ قاجەتتىگىنە نازار اۋدارىپ, العا قويىلعان ءمىن­دەت­تەرگە قول جەتكىزۋدە ەلشىلەر قاۋى­مىنا تىلەكتەستىگىن جەتكىزدى. كەزدەسۋ بارىسىندا, سونداي-اق, قازاقستان رەسپۋبليكاسىنىڭ بۇۇ قاۋىپسىزدىك كەڭەسىنە ءمۇ­شەلىگى بارىسىندا سىرتقى ىستەر مينيسترلىگى مەن پارلا­مەنتتىڭ ءوزارا بايلانىسى; قازاق­ستاننىڭ شەت ەلدەگى ديپلوما­تيالىق وكىلدىكتەرىنىڭ ءىس-قيمىلى; ەلىمىزگە ينۆەستيتسيالار مەن جاڭا تەحنولوگيالاردى تار­تۋداعى قازاقستاننىڭ سىرتقى سايا­ساتىن ىلگەرىلەتۋ; سىرت­قى ىستەر مينيسترلىگى قىز­مەت­كەر­لەرىنىڭ الەۋمەتتىك سالا­داعى وزەكتى ماسەلەلەرى تالقى­لاندى. سەناتورلار نۇرتاي ابىقاەۆ, يكرام ادىربەكوۆ, مۇحتار التىنباەۆ, سەرىك جاقسىبەكوۆ جانە گەورگي كيم ەلىمىزدىڭ سىرتقى ساياسات مەكەمەسىنىڭ جۇمىسىن جەتىلدىرۋ جونىندەگى ءوز ۇسىنىستارىن ورتاعا سالدى.