قازاق­ستان مەن جاپونيا: دەرەك پەن دايەك

1998 جىلى باستالىپ, 2000 جىلى اياقتالعان ەرتىس وزەنىنىڭ ۇستىنە سالىنعان سەمەيدەگى اسپالى كوپىر قازاقستان مەن جاپونيا اراسىنداعى دوستىقتىڭ نىشانى. تمد-داعى ەڭ ۇلكەن قۇرىلىس نىسانى سانالاتىن كوپىردىڭ كەڭىستىكتەگى ۇزىندىعى – 750 مەتر. جالپى ۇزىندىعى – 1086 مەتر دە, ەنى – 35, ال بيىكتىگى – 90 مەتر.

2000 جىلى توكيوداعى «تاما» زووباعىندا قازاقستاننان كۇنشىعىس ەلىنە ارنايى سىيلىق – قار بارىسى رەسمي تۇردە تارتۋ ەتىلدى. سالتاناتتى جيىندا جاپونيانىڭ سىرتقى ىستەر ءمينيسترى يوحەي كونو جاپونيا­نىڭ اتىنان قازاقستان پرەزيدەنتى نۇرسۇلتان نازارباەۆ پەن بۇكىل رەسپۋب­ليكا حالقىنا عاجايىپ سىي ءۇشىن العىس ءبىلدىرىپ,  مالىمدەمە جولدادى.

2001 جىلدىڭ اقپان ايىندا قازاقستاننىڭ پرەمەر-ءمينيسترى يمانعالي تاسماعامبەتوۆ «كۇلتەگىن» تاريحي ەسكەرتكىشىنىڭ كوشىرمەسىن جاساتۋ جونىندە كەلىسسوزدەر جۇرگىزۋ ءۇشىن جاپونياعا ارنايى ساپارمەن بارىپ, سول جىلدىڭ مامىر ايىندا ەسكەرتكىش كوشىرمەسى استاناعا جەتكىزىلدى.

2005-2015 جىلدار ارالىعىندا جاپونيا قازاقستانعا 5 ملرد دوللار ينۆەستيتسيا قۇيدى. ال 2015 جىلدا ەكى ەل اراسىنداعى تاۋار اينالىمى 1,4 ملرد اقش دوللارىن قۇراعان.

2006 جىلى 29 تامىزدا يادرولىق پوليگوننىڭ جابىلۋ قۇرمەتىنە ناگاساكي جانە سەمەي قالالارى اراسىندا تەلەكوپىر ۇيىمداستىرىلدى. ال 2006 جىلدىڭ جەلتوقسان ايىندا جاپونيا ۇكىمەتى بۇۇ-مەن بىرلەسە سەمەي وڭىرىنە 2 ملن دوللار كولەمىندە ارنايى گرانت ءبولدى.

2011 جىلدىڭ 11 ناۋرىزدا جاپو­نيا­نىڭ سولتۇستىك-شىعىسىندا بولعان الاپات جەر سىلكىنىس پەن جويقىن تسۋنامي 20 مىڭعا جۋىق تۇرعىننىڭ ءومىرىن قيدى. جاپونياداعى ءزىلزالادان زارداپ شەككەن حالىققا قازاقستان ۇكىمەتى كۇنشىعىس ەلىنىڭ قىزىل كرەست قوعامى ارقىلى 1 ملن دوللار قارجىلاي كومەك كورسەتىپ, 33 توننا ەت-كونسەرۆى ونىمدەرىن جىبەردى.

ەلباسىنىڭ 2016 جىلعى قاراشا ايىندا جاپونياعا ساپارى كەزىندە بولات ونىمدەرىنە نەگىزدەلگەن Tokyo Rope Almaty كومپانياسى اشىلعان. 2016-2020 جىلدار ارالىعىنا ارنالعان جوبانىڭ ينۆەستيتسيا كولەمى 70 ميل­ليون دوللاردى قۇرايدى.

استانادا اشىلاتىن ەكسپO-2017 كور­مەسىنە جاپونيا جەكە پاۆيلونىن جابدىقتاپ, كەلۋ­شى­لەردى قارسى الۋعا دايىندىق ۇستىندە. «بولا­شاق­تىڭ ەنەرگياسى» دەگەن تاقىرىپتا وتەتىن حالىقارا­لىق اۋقىمداعى كورمەدە جاپونيا عاجايىپ تەحنولو­گيالارىن جۇرتشىلىققا تانىستىرۋدى كوزدەۋدە.

تاۋەلسىزدىكتىڭ العاشقى جىلدارىندا حوككايدو ۋنيۆەرسيتەتىنىڭ قۇرمەتتى پروفەسسورى كاندزي فۋدزي ورتالىق ازياعا جاساعان ساپارى اياسىندا قازاقستانعا ارنايى كەلدى. بۇل ەكى ەل اراسىنداعى عىلىمي-مادەني باعىتتاعى بايلانىستاردىڭ قاينار باستاۋىنا اينالىپ, بۇگىنگى تاڭدا ەكى ەلدەگى جوو مامان دايارلاۋ ىسىندە تەرەڭ ارىپتەستىك ورناعان.