«Astana Arlans» جاڭا ماۋسىمىن باستايدى

الماتىدا بوكستىڭ بۇكىلالەمدىك سەرياسىنداعى جەتىنشى ماۋسىمىنىڭ جانە WSB-نىڭ ەكى دۇركىن جەڭىمپازى «Astana Arlans» كومانداسىنىڭ جاڭا قۇرامىنىڭ تۇساۋكەسەر ءراسىمى بولىپ ءوتتى. بەلگىلى جارىستىڭ فورماتىنا, بىرقاتار كلۋبتار قىسقارۋى سەبەپتى, ايتارلىقتاي وزگەرىستەر بار. ەندى 12 كوماندا قۇرلىقتا ورنالاسۋ ىڭعايىنا قاراي ءۇش توپقا ءبولىنىپ, كەيىن ءار توپتىڭ جەڭىمپازدارى ءبىر-بىرىمەن كەزدەسەدى. «س» توبىنداعى «Astana Arlans» ازيانىڭ «Russian Boxing Team», «China Dragons» جانە «Uzbek Tigers» كوماندالارىمەن باق سىناسادى. جاڭا ماۋسىم اقپان ايىندا باستالىپ, ءار توپتىڭ جەڭىمپازدارى ءساۋىر ايىندا بولاتىن پلەي-وففقا دەيىن انىقتالۋى ءتيىس. ال فينالدىق جەكپە-جەكتەر ماۋسىم ايىندا وتەدى. شيرەك فينالعا توپارالىق سايىستاردان ەكى جەڭىمپاز جانە ءۇشىنشى ورىن العان ەكى كلۋب وتەدى. ايتا كەتۋ كەرەك, ماۋسىمدار ارالىعىندا «Astana Arlans» كلۋبىنىڭ قۇرامىندا ءبىرشاما وزگەرىستەر بولدى. باسشىلار كلۋبتى ىقشامداۋ تۋرالى شەشىم قابىلداپ, بيىل كوماندا قۇرامىندا ەل نامىسىن بىلتىرعىداي وتىز ەمەس, جيىرما بوكسشى قورعايتىن بولدى. كلۋبتىڭ باس مەنەدجەرى سەرىك ساپيەۆتىڭ ايتۋىنشا, جاڭا ماۋسىمدا كلۋب قۇرامىندا ەلىمىزدىڭ ەڭ ءبىر مىقتى دەگەن بوكسشىلارى ونەر كورسەتەدى. ولاردىڭ ىشىندە جاقىندا وتكەن قازاقستان چەمپيوناتىنىڭ جەڭىمپازدارى مەن جۇلدەگەرلەرى, ريو وليمپياداسىنا قاتىسقاندار دا بار. ۇيىمداستىرۋشىلار بيىلعى ماۋسىمعا جوسپارلاعان يگى ىستەردىڭ ءبىرى – بوكستىڭ وڭىرلەردە دامۋىنا ىقپال ەتۋ ماقساتىندا كوماندالىق كەزدەسۋلەر ەلىمىزدىڭ بىرنەشە قالاسىندا وتكىزىلەدى. تاعى ءبىر جاڭالىق – بۇعان دەيىن قازاقستان قۇراما كومانداسىندا 52 كيلو سالماق دارەجەسىندە ونەر كورسەتكەن, WSB-نىڭ بەسىنشى ماۋسىمىنىڭ جەڭىمپازى, ريو وليمپياداسىنا قاتىسۋشى ولجاس ساتتىباەۆ كوماندا كاپيتانى بولىپ سايلاندى. «Astana Arlans» كومانداسىنىڭ جاڭا ماۋسىمداعى قۇرامىندا, سونىمەن قاتار, WSB-نىڭ بەسىنشى ماۋسىمىنىڭ جەڭىمپازى تەمىرتاس ءجۇسىپوۆ (49 كگ دەيىن), لوندون وليمپياداسىنا قاتىسۋشى, بىلتىرعى ەل چەمپيوناتىنىڭ جۇلدەگەرى ءىلياس سۇلەيمەنوۆ (56 كگ دەيىن), ەل چەمپيوناتىنىڭ كۇمىس جۇلدەگەرى, WSB-نىڭ 2015 جىلعى چەمپيونى زاكير سافيۋللين (60 كگ دەيىن), WSB-نىڭ 2015 جىلعى جەڭىمپازى,  WSB-نىڭ 2016 جىلعى بولجامى بويىنشا ازيانىڭ ۇزدىك بوكسشىسى اسلانبەك شىمبەرگەنوۆ (69 كگ دەيىن), ا.ق ۇلىباەۆ اتىنداعى  حالىقارالىق ءتۋرنيردىڭ جەڭىمپازى, بيىلعى ەل چەمپيوناتىنىڭ كۇمىس جۇلدەگەرى, WSB-نىڭ 2015 جىلعى جەڭىمپازى قاناعات مارالوۆ (69 كگ دەيىن), ۋنيۆەرسيادا جۇلدەگەرى, WSB-نىڭ 2015 جىلعى جەڭىمپازى نۇرداۋلەت جارمانوۆ (81 كگ دەيىن) سياقتى دارىندى بوكسشىلار ونەر كورسەتەدى. «Astana Arlans»  جەتىنشى ماۋسىمنىڭ العاشقى ماتچىن 4 اقپان كۇنى «Russian Boxing Team» كلۋبىمەن وتكىزەدى. ءانۋار ابدراحمانوۆ