استانادا ۋنيۆەرسيادانىڭ الاۋ ەستافەتاسى باستالدى

استانادا قر پرەزيدەنتى نۇرسۇلتان نازارباەۆتىڭ قاتىسۋىمەن بۇكىلالەمدىك 28-ءشى قىسقى ۋنيۆەرسيادانىڭ الاۋ ەستافەتاسى باستالدى. الدىمەن ەلباسى ۋنيۆەرسياداعا قاتىساتىن قازاقستان قۇراماسىنىڭ كاپيتانى بياتلونشى داۋلەت راxىمباەۆقا ەلىمىزدىڭ تۋىن تابىستادى. ءوز كەزەگىندە راxىمباەۆ قازاقستان قۇراماسى جارىستارعا تولىعىمەن دايىن ەكەندىگىن باياندادى. ەلورداداعى ەستافەتا ەكى كەزەڭگە بولىنگەن. الاۋگەرلەر ءۇش جارىم ساعات بويى قالانىڭ ورتالىق كوشەلەرىمەن جۇگىرىپ وتەدى. العاشقى كەزەڭ «نازارباەۆ ۋنيۆەرسيتەتىنەن» باستالىپ, «بايتەرەك» مونۋمەنتىنە دەيىن جالعاسادى. ەكىنشىسى - «بايتەرەك» مونۋمەنتىنەن قايتا باستاۋ الىپ, وڭ جاعالاۋداعى قالالىق اكىمدىك الاڭىندا اياقتالادى. ەستافەتانىڭ جالپى ۇزاقتىعى 12 شاقىرىمدى قۇرايدى. الاۋدى بارلىعى 60 الاۋگەر الىپ جۇرەدى.  سپورتشىلاردان بولەك, 28-ءشى قىسقى ۋنيۆەرسيادا الاۋىن قوعام قايراتكەرلەرى, بەلسەندى وقۋ وزاتتارى جانە تانىمال قازاقستاندىق شاحماتشى دينارا سادۋاقاسوۆا الىپ جۇرمەك. ال ۋنيۆەرسيادانىڭ الماتىدا وتەتىن اشىلۋ سالتاناتىنا ەلوردا  اتىنان قازاقستاندىق حوككەيشى, استانالىق «بارىس» كلۋبىنىڭ قورعاۋشىسى ماديار ىبىرايبەكوۆ  قاتىسادى. ودان كەيىنگى بەس كۇن ىشىندە رەسپۋبليكانىڭ بارلىق وبلىس ورتالىقتارى ءوز الاۋلارىن جاعاتىن بولادى. سوڭىندا الاۋ ۋنيۆەرسيادا استاناسى الماتى قالاسىنا جەتكىزىلەدى. بارلىعى ەستافەتاعا 1 مىڭعا تارتا الاۋگەر قاتىسپاق. جالپى الاۋ ەستافەتاسى 22 500 شاقىرىمدى ەڭسەرەدى دەپ جوسپارلانعان.