دوللارسىزداندىرۋ ساياساتى دەپوزيت نارىعىنا قالاي اسەر ەتتى؟

ەكىنشى دەڭگەيدەگى بانكتەردەگى دەپوزيتتەردىڭ ۆاليۋتالىق قۇرىلىمى تەپە-تەڭدىككە ۇمتىلۋدا. ۇلتتىق بانكتىڭ حابارلاۋىنشا, 2016 جىلدىڭ قورىتىندىلارى بويىنشا ەكىنشى دەڭگەيدەگى بانكتەردەگى دەپوزيتتەردىڭ دوللارلاندىرۋ دەڭگەيى (دەپوزيتتەردىڭ جالپى كولەمىندەگى شەتەل ۆاليۋتاسىنداعى دەپوزيتتەردىڭ ۇلەسى) 2016 جىلعى قاڭتارداعى ەڭ كوپ 69,9%-دان تومەندەي وتىرىپ, 54,6%-دى قۇرادى. زاڭدى تۇلعالاردىڭ دەپوزيتتەرىنىڭ قۇرىلىمىندا تومەندەۋ 62%-دان 49%-عا دەيىن, جەكە تۇلعالاردىكى 80%-دان 62%-عا دەيىن بولدى. 2016 جىلى تەڭگەدەگى دەپوزيتتەر 66,4%-عا نەمەسە 3,3 ترلن. تەڭگەگە ۇلعايدى, ال شەتەل ۆاليۋتاسىنداعى دەپوزيتتەر 9,9%-عا نەمەسە 1,1 ترلن. تەڭگەگە تومەندەدى. تەڭگەدەگى دەپوزيتتەر كولەمىنىڭ وسۋىنە ۇلتتىق ۆاليۋتاداعى جيناق اقشانىڭ تارتىمدىلىعىن ارتتىرۋ جونىندەگى شارالار, سونداي-اق ىشكى ۆاليۋتا نارىعىنداعى احۋالدىڭ تۇراقتانۋى ىقپال ەتتى. دوللارسىزدانۋ شەڭبەرىندەگى بارىنشا ءتيىمدى شارا حالىقتىڭ دەپوزيتتەرى بويىنشا مولشەرلەمەلەردىڭ ەڭ كوپ دەڭگەيىن وزگەرتۋ بولدى. 2016 جىلعى 1 اقپاننان باستاپ ۇلتتىق بانك جەكە تۇلعالاردىڭ تەڭگەدەگى دەپوزيتتەرى بويىنشا ەڭ كوپ ۇسىنىلعان مولشەرلەمەنى 10%-دان 14%-عا دەيىن كوتەردى جانە شەتەل ۆاليۋتاسىنداعى دەپوزيتتەر بويىنشا 3%-دان 2%-عا دەيىن تومەندەتتى. 2016 جىلى اقش دوللارىنا قاتىستى تەڭگەنىڭ نىعايۋى 2,0%, ەۋروعا قاتىستى – 5,1% بولدى,بۇل شەتەل ۆاليۋتاسىنداعى دەپوزيتتەر بويىنشا ەڭ كوپ مولشەرلەمەنى شەكتەۋدى ەسكەرە وتىرىپ شەتەل ۆاليۋتاسىنداعى جيناق اقشانىڭ ەكونوميكالىق ورىندىلىعىن تومەندەتتى. ۇلتتىق بانكتىڭ ساياساتى ودان ءارى دە ۇلتتىق ۆاليۋتانىڭ تارتىمدىلىعىن ارتتىرۋعا جانە تەڭگەدەگى قۇرالداردىڭ بارىنشا جوعارى كىرىستىلىگىن قامتاماسىز ەتۋگە باعىتتالاتىن بولادى.