ءۇيى – ءۇي ەمەس, كىتاپحانا

قاداعاڭ, قازاقتىڭ كلاس­سيك اقىنى قادىر مىر­زا ءالى تۋرالى قاعىت­پالار­دىڭ بىرىندە ونىڭ ۇيىنەن شىعىپ بارا جاتقان ادامدى قايتا-قايتا قۇشاقتاي بەرەتىنى جايىندا ايتىلاتىن. ونىسى الگى كىسىنى قيماي تۇرعانى ەمەس. ۇيى­نەن كىتاپ ۇرلاپ كەتىپ بارا جاتقان جوق پا ەكەن دەگەن سەكەمىن بىلدىرمەي تەكسەرۋ دەيتىن. قانشاما جىل تىرنەكتەپ ءجۇرىپ جيعان دۇنيەسىن قاداعاڭ سولاي دا قورعاعان سەكىلدى عوي. مولداراي دۇيسەنباەۆتىڭ ۇيىنە بارعانىمىزدا وسى جاعداي­دىڭ ەسىمىزگە ورالا كەتكەنى. جاستايىنان بىلىمگە قۇشتار بولىپ, وڭ-سولىن تانىعاننان كىتاپ جيناعان ەكەن, اقساقال. بۇگىندە بۇل كىسىنىڭ كىتاپ قورى 8 مىڭنان اسادى. قايدا بارسا دا, ەڭ الدىمەن, كىتاپ دۇكەنىنە باس سۇعادى. سولايشا, قورجىنىن جاڭا كىتاپتارمەن تولىقتىرىپ وتىرادى. بۇرىن ايلىعىنان, قازىر زەينەتاقىسىنان كىتاپ الۋعا ارنايى قارجى بولەدى. ەڭ عاجابى, اقساقال جيعان كىتاپ­تارىنىڭ باسىن قۇراپ, ۇيىنەن كىتاپحانا اشىپ قويعان. كەرەمەت قوي. سانالى عۇمىرىندا جيناعان كىتاپتارى سورەدە شاڭ باسىپ تۇرماسىن, جاستاردىڭ, ءىلىم الۋعا ىنتىق ازاماتتاردىڭ, جالپى حالىقتىڭ كادەسىنە جاراسىن دەپ ۇيىنەن جەكەمەنشىك كىتاپحانا اشادى. جاقىن جەردەگى مەكتەپتىڭ وقۋشىلارى مەن وقۋ ورىندارىنىڭ ستۋدەنتتەرى مولداراي اقساقالدىڭ ۇيىنە كەلىپ, وزدەرىنە قاجەتتى مالىمەت­تەردى تاۋىپ جاتادى. ەڭبە­گىنىڭ ەش كەتپەگەنىنە, جىلدار بو­يىن­ا كوزىنىڭ مايىن تاۋىسىپ وقىعان دۇنيەلەرىنىڭ ەلدىڭ يگىلىگىنە جاراپ جاتقانىنا ءبىر راحاتتانادى. Gooqle مەن Wikipedia ۇستەم­دىك قۇرىپ تۇرعان مىنا زاماندا, مولداراي دۇيسەنباەۆ نە ىستەپ وتىر دەڭىز. زەيىن سالى­ڭىز, ايتايىق. ساياساتتانۋ, الەۋ­مەتتانۋ, مەديتسينا, فيلوسوفيا, سپورت, تاريح, گەوگرافيا, سالت-ءداستۇر, جۇمباقتار مەن ماقال-ماتەلدەر سەكىلدى ءتۇرلى سالا بويىنشا مالىمەتتەردى كىتاپتان, گازەت-جۋرنالداردان جيناپ, قي­ىپ-كوشىرىپ, ونىڭ بارلىعىن بولەك-بولەك پاپكا رەتىندە قۇراستىرىپ شىققان. ونىڭ ىشىندەگى ەڭ سۇبەلىسى تۇلعاتانۋعا ارنالعان بولىگى بولسا كەرەك. مولداراي اقساقال بۇكىل ومى­­رىندە ءبىلىم بەرۋ سالاسىندا قىز­مەت اتقارىپتى. سوعان سايكەس, ءبىلىم سالاسىندا دا جيناعان دەرەك قو­رى مول. مۇ­عالىمدەردىڭ اشىق سا­باعىنان باس­تاپ عىلى­مي ديسسەرتاتسياعا قاجەتتى مالىمەت­تەرگە دەيىن بار. مولداراي دۇيسەن­باي­ ۇلىنىڭ ۇيىندە بىلىمگە قۇشتار جاستىڭ كوكىرەك كوزىن اشاتىن, كوك­­جيەگىن كەڭەيتەتىن وسىنداي پاپ­كالاردىڭ ۇزىن-سانى 300-دەن اسادى. اقساقال سوڭعى جىلدارى دەن­ساۋلىعىنىڭ سىر بەرە باستاعانىن, سونداي-اق, كىتاپ­حاناعا ادام­داردىڭ سيرەك كەلەتىنىن ايتادى. ءارى-بەرى ويلانىپ, تۋعان جەرى سۇلۋتوبەدەن كىتاپحانا اشۋعا بەكىنىپتى. ءال-ءازىر وعان شاماسى كەلەتىندەي ەمەس. وسى ورايدا, مولداراي دۇيسەنباي ۇلى مىناداي وي ايتىپ قالدى. «قازىر مەملەكەت پەن جەكەمەنشىك ارىپ­تەستىگى ەسەبىنەن بالاباقشالار اشىلىپ جاتىر عوي. قۇپتارلىق دۇنيە. مىنە, وسىنداي ارىپتەستىك ەندى جەكە كىتاپحانا اشۋعا دا قولدانىلسا دەيمىن. بالاباقشا اشامىز, مەك­تەپتەردى جاڭادان سالامىز. ەندى ونىڭ ىشىندەگى بالالاردىڭ دا ءبىلى­مىن ويلاۋىمىز كەرەك قوي. كىتاپحاناسى باياعىدا توز-توز بولىپ كەتكەن اۋىلىما بارىپ, جاڭاسىن اشقىم كەلەدى. ونى اشارمىن-اۋ. بىراق سونى ۇستاپ تۇرۋعا, جۇمىسىن ءارى قاراي جۇرگىزۋگە جاڭاعى مەملە­كەت-جەكەمەنشىك ارىپتەستىگى ءتا­سىلى قولدانىلسا, ۇلكەن كومەك بولار ەدى». دۇنيە ەمەس, ءبىلىم قۋىپ, بايلىق ەمەس, كىتاپ جيناعان مول­داراي اقساقالدىڭ ارمانى ورىندالادى دەپ سەنەمىز. ەرجان بايتىلەس, «ەگەمەن قازاقستان» قىزىلوردا