باتىس قازاقستاندا تاپسىرىسپەن ۇشاتىن جەڭىل ۇشاق تانىستىرىلدى

بۇگىن «ورال» حالىقارالىق اۋەجايىندا Cessna-208 Caravan جەڭىل ۇشاعى تانىستىرىلدى, دەپ حابارلايدى «قازاقپارات». وبلىس اكىمىنىڭ ورىنباسارى يگور ستەكسوۆ قاتىسقان شارا بارىسىندا باتىسقازاقستاندىقتارعا وسى قىزمەت ءتۇرىن ۇسىنىپ وتىرعان «كازمەدەير» اق باس ديرەكتورى اندرەي كوسولاپوۆتىڭ اتاپ وتكەنىندەي, وزىق تەحنولوگيا نەگىزىندە جاسالعان ۇنەمدى ءارى يكەمدى ۇشاق شەكارالاس وڭىرلەرگە, سونداي-اق اۋىل-ايماققا ساپارلاي الادى. بۇل ۇشاقپەن جۇك تە تاسىمالداۋعا بولادى. سونىمەن قاتار, پاراشيۋتپەن ءتۇسۋ, مەديتسينالىق باعىتتا كوشىرۋ, اەروفوتوتۇسىرىلىم سياقتى ءتۇرلى قىزمەتتەردى اتقارادى. ياعني, كوپ سالالى ۇشاق سەنىمدى, قاۋىپسىز ءارى قولدانۋعا ءتيىمدى. مىسالى, اقتوبە قالاسىنا دەيىن ۇشاقتىڭ ۇشۋ قۇنى ورتا ەسەپپەن 2 ملن تەڭگە ء(بىر ساعاتتىق قۇنى - 500 مىڭنان استام تەڭگە) تۇرادى. وعان كاسىپكەرلەر تاپسىرىس بەرسە, ورالدان اتىراۋعا 1 ساعات 45 مينۋتتا, اقتاۋعا 3 ساعات 30 مينۋتتا, استاناعا 5 ساعاتتان استام ۋاقىتتا جەتە الادى. سونداي-اق رەسەيدىڭ ورىنبور, سامارا, استراحان سىندى قالالارىمەن دە اۋە قاتىناسىن ورناتۋعا بولادى. ورالدا ازىرگە ءبىر ۇشاق قىزمەتكە دايىن, الداعى ۋاقىتتا سۇرانىسقا سايكەس ولاردىڭ سانىن كوبەيتۋ كوزدەلۋدە. ايتا كەتەيىك, اتالمىش ۇشاق اقش-تا وتكەن عاسىردىڭ سەكسەنىنشى جىلدارى جاسالعان. ورتاشا قۇنى – 3 ملن دوللار. جولاۋشىلار سالونىنا سەگىز ادام سىيادى. ۇشۋ ۇزاقتىعى - 1 680 شاقىرىم, جىلدامدىعى – ساعاتىنا 352 شاقىرىم.