قازاقستاندا كومىر قىرتىستارىنان مەتان وندىرىلمەك

قازاقستاندا كومىر قىرتىستارىنان مەتان ءوندىرۋ بويىنشا كەشەندى جوبا ازىرلەنۋدە. بۇل تۋرالى ۇكىمەت وتىرىسى بارىسىندا ەنەرگەتيكا ءمينيسترى قانات بوزىمباەۆ باياندادى. ونىڭ ايتۋىنشا, قاراعاندى كومىر باسسەينىندە كومىر قىرتىستارىن گازسىزداندىرۋ ەسەبىنەن تاۋ-كەن جۇمىستارىن جۇرگىزۋ قاۋىپسىزدىگىن قامتاماسىز ەتۋ جانە پيلوتتىق جوبالار بويىنشا جەر قويناۋىن پايدالانۋعا جاسالعان كەلىسىمشارتتارعا سايكەس مەتاندى بارلاۋ بويىنشا جۇمىستار جۇرگىزىلۋدە. مينيسترلىكتىڭ الدىندا ونەركاسىپتىك يگەرۋ ءۇشىن كومىر قىرتىستارىنان مەتان الۋ مىندەتى تۇر. بۇل ەلىمىزدىڭ بىرقاتار ايماقتارىندا الەۋمەتتىك-ەكونوميكالىق جاعدايدى ءبىرشاما جاقسارتۋعا مۇمكىندىك بەرەدى. ويتكەنى, بۇل مەتاندى ەلەكتر ەنەرگياسىن ءوندىرۋ ءۇشىن, تۇرمىستىق ماقساتتاردا, اۆتوكولىكتەر ءۇشىن وتىن رەتىندە, مەتاللۋرگيا ونەركاسىبىندە جانە حيميا سالالارىندا پايدالانۋعا بولادى. كومىر ءوندىرۋ بارىسىنداعى جۇمىستاردىڭ قاۋىپسىزدىگى ءبىرشاما ارتىپ, قورشاعان ورتاعا مەتان شىعارىندىلارىنىڭ كەمۋى ەسەبىنەن ەكولوگيالىق جاعداي جاقسارادى. ۆەدومستۆو باسشىسىنىڭ مالىمەتىنشە, قر كاسىپكەرلىك كودەكسىنە ەنگىزىلگەن وزگەرىستەرگە سايكەس كومىر قىرتىستارىنان مەتان الۋعا قاتىستى شەكتەۋلەر الىنىپ تاستالعان جانە ول ينۆەستيتسيالىق باسىم جوبالاردى جۇزەگە اسىرۋ ءۇشىن, سونىمەن قاتار قولدانىستاعى سالىقتىق جانە ينۆەستيتسيالىق ارتىقشىلىقتاردى الۋ ءۇشىن ايقىندالعان باسىمدىققا يە قىزمەتتەر تىزىمىنە ەنگىزىلگەن. سونداي-اق, 2016 جىلعى 23 قىركۇيەكتە قر ەنەرگەتيكا ءمينيسترى بەكىتكەن كومىر قىرتىستارىنان مەتان الۋ جانە ونى بارلاۋ بويىنشا ءىس-شارالار جوسپارى جانداندىرىلدى.