مەملەكەتتىك ورگاندار ۇەۇ-مەن ءوزارا ءىس-قيمىلدى نىعايتۋى كەرەك - ساعىنتاەۆ

قر پرەمەر-ءمينيسترى باقىتجان ساعىنتاەۆ ۇكىمەت وتىرىسى بارىسىندا مەملەكەت جانە ۇكىمەتتىك ەمەس ۇيىمدار اراسىنداعى ىنتىماقتاستىقتى تيىمدىرەك ورناتۋ جونىندە تاپسىرما بەردى. ۇكىمەت وتىرىسىندا مەملەكەت جانە ۇەۇ-نىڭ ءوزارا ءىس-قيمىلىنىڭ نەگىزگى باعىتتارى تۋرالى ايتىلدى, سونىمەن قاتار وتاندىق ۇكىمەتتىك ەمەس سەكتور وكىلدەرى ءسوز سويلەدى. ولاردىڭ ىشىندە: «قازاقستاننىڭ ازاماتتىق اليانسى» قاۋىمداستىعىنىڭ پرەزيدەنتى ن. ەرىمبەتوۆ, «كامەدا» قورىنىڭ اتقارۋشى ديرەكتورى م. ەسپەنوۆا جانە ارگو ازاماتتىق قوعامدى دامىتۋ قاۋىمداستىعىنىڭ اتقارۋشى ديرەكتورى د. اسانوۆا بار. بايانداماشىلاردى تىڭداعاننان كەيىن پرەمەر-مينيستر 2016 جىلى قۇرىلعان قر ءدىن ىستەرى جانە ازاماتتىق قوعام مينيسترلىگى مەملەكەت جانە ۇكىمەتتىك ەمەس ۇيىمدار اراسىنداعى وزىندىك ءبىر «كوپىر» ىسپەتتەس ەكەنىن ايتتى. وسى ورايدا ب. ساعىنتاەۆ ۆەدومستۆو باسشىسى ن. ەرمەكباەۆقا ۇەۇ وكىلدەرىنىڭ بىرلەسكەن جۇمىستى ءارى قاراي جۇرگىزۋگە بايلانىستى ۇسىنىستارىن ەسكەرۋ تۋرالى تاپسىرما بەردى.