برۋنا موۋرا, شاڭعىشى: «الماتى اپورتىنىڭ ءدامىن كورگىم كەلەدى»

قىسقى ۋنيۆەرسيادا ويىندارىنا برازيليادان 3 ادامنان تۇراتىن دەلەگاتسيا كەلمەك. برازيليانىڭ اتىنان قاتىساتىن برۋنا موۋرا شاڭعى جارىستارىندا ويىن كورسەتەدى. برازيليالىق ستۋدەنت جۇلدەلى ورىننان تابىلماعاننىڭ وزىندە, ۇلكەن سپورتتا تاجىريبە جيناقتاپ, اتلەتتىك الەۋەتىن ارتتىرۋدىڭ ءوزىن دە ولجا سانايتىنىن ايتادى. برازيليالىق سپورتشى قازاقستان تۋرالى مەيلىنشە اقپارات جيناعانى بايقالادى. شاڭعىشى «مەدەۋ» مۇز ايدىنىن كورۋدى جانە الماتىنىڭ اتاقتى اپورتىنىڭ ءدامىن تاتىپ كورۋدى ارماندايدى ەكەن. برۋنانىڭ باپكەرى چاو سيكۋەرا: «برۋنا ءبىر جىل بويى برازيليادا روليك­تىك شاڭعىمەن (rollerskis) دايىندا­­لىپ, جۇگىرۋ, ۆەلوسيپەد سەكىلدى ءمىن­دەتتى دايارلىقتان ءوتتى. شىلدەدە ءبىز ارگەن­تيناداعى «سەرو-كاستور-ۋشۋايا» تاۋ-شاڭعى شيپاجايىندا جاتتىعىپ, جەل­توقساننان باستاپ ەۋروپادا شىڭ­دالىپ جاتىرمىز» دەيدى. برۋنا موۋرانىڭ ايتۋىنا قاراعان­دا, ول سوڭعى جاتتىعۋ جىلىندا ۇلكەن دايىندىقتان وتكەن. «مەن تولىعىمەن وقۋ مەن جاتتىعۋلارعا دەن قويۋ ءۇشىن باسقا قالاعا كوشتىم. سپورتپەن كاسىبي دەڭگەيدە شۇعىلدانا باستادىم. الماتىداعى قىسقى  ۋنيۆەرسياداعا جاقسى دايارلىقپەن بارىپ, قىسقى سپورت تۇرلەرىندە برازيليانىڭ نامىسىن لايىقتى دەڭگەيدە قورعاۋ ماقساتىندا ءتۇرلى ەۋروپالىق جارىستارعا بەلسەندى قاتىستىم», – دەيدى برۋنا. شاڭعىشى قىز قازاقستاندا جاقسى ويىن كورسەتۋ ءۇشىن بۇكىل كۇشىن سالماق. ول سپورتتىڭ باسقا تۇرلەرىنەن وتەتىن باسقا جارىستارعا بارىپ, «وليم­پيادا­لىق» كوڭىل-كۇيدى سەزىنسەم, سونداي-اق, الماتىنىڭ سپورت نىساندارىن كورىپ قايتسام دەپ وتىر. «كونكيمەن جۇگىرۋ سپورتىندا اسا اتاقتى ايدىننىڭ ءبىرى سانالاتىن «مەدەۋ» تۋرالى كوپ ەستىگەنمىن. ءدال سول كەشەندە كوپتەگەن الەمدىك رەكوردتار ورناتىلعانىن دا بىلەمىن. رەسپۋبليكا ەلورداسى – استانا, ال الماتى ءوزىنىڭ الماسىمەن تانىمال ەكەنىن وقىپ ءبىلدىم. سوندىقتان, ۋنيۆەرسياداعا بارعاندا سول المالاردىڭ ءدامىن تاتىپ كورسەم دەيمىن», – دەيدى برازيليالىق سپورتشى. ايناش ەسالي, «ەگەمەن قازاقستان» الماتى