ماۋسىمارالىق ترانسفەر قىزىپ تۇر

فۋتبولدا جانكۇيەر قاۋىمدى ەلەڭ ەتكىزەتىن جاڭالىقتاردىڭ ءبىرى ترانسفەر نارىعى دەسەك, ارتىق ايتقانىمىز ەمەس شىعار. قىسقى جانە جازعى ترانسفەرلىك ءۇزىلىس كەزىندە جۇلدەدەن ءۇمىتتى كوماندالار قۇرامدارىن ەكشەپ, كۇشەيتىپ الۋعا تىرىسادى. بۇل ءۇردىس ءبىزدىڭ فۋتبولدا دا بار. قىتاي سەكىلدى الەمنىڭ اتاقتى جۇلدىزدارىن شاقىرماساق تا, ەۋروپادا جۇرگەن ورتاڭقول ويىن­شى­لار قازاقستانعا دا كەلىپ جاتادى.  كانياس, تۆۋماسي, گوۋ, يساەل, ماكسيموۆيچ سياقتى فۋتبول­شىلاردىڭ ارقاسىندا «استانا», «قايرات» ەۋروكۋبوكتاردا ءساتتى ونەر كورسەتىپ ءجۇر. وتاندىق كومان­دالار بيىلعى جىلى دا قالتا­مىز كوتەرەتىن ويىنشىلارمەن تولىعۋدى باستاپ كەتتى. «استانا» ساپىنان كوماندا كاپيتانى تاڭات نوسەرباەۆ كەتتى. سوڭعى 6 جىل بويى ەلوردا كلۋبىندا ونەر كورسەتكەن فۋتبولشىنىڭ كەلىسىمشارتى اياقتالعان. ەركىن اگەنت رەتىندە ءوزىنىڭ بۇرىنعى كومانداسى «ورداباسىعا» اۋىستى. نوسەرباەۆ «استانا» ساپىندا قازاق­ستان چەمپيوناتى مەن كۋبوك دوداسى اياسىندا 171 ويىن وتكىزىپ, 51 گول سوقتى, 24 رەت ناتيجەلى پاس بەردى. ەۋروكۋبوك دودالارىندا 24 ويىنعا قاتىسىپ, 3 مارتە مەرگەندىك تانىتقان. «استانا» ساپىندا چەمپيوندار ليگاسىندا دا, ەۋروپا ليگاسىندا دا وينادى. سول نوسەرباەۆتى جوقتاتپاي-دى-ا­­ۋ, ءتىپتى اسىپ تۇسەتىن شىعار دەپ ستويلوۆ باپكەر ونىڭ ورنىنا البانيا قۇراماسىنىڭ شابۋىلشىسى ازدرەن گاني لۋلاكۋدى اتتاي قالاپ الدىردى. بۇل فۋتبولشى سوڭعى ەكى ماۋسىمدا رۋ­مىنيانىڭ «گاز-مەتان» كلۋبى ساپىندا ونەر كورسەتكەن. رۋمى­نيا چەمپيوناتىنىڭ ەڭ ۇزدىك سۇرمەرگەنى. لۋلاكۋ 20 ويىندا 16 گول سوققان. شابۋىل وتىندە جانە قاپتالداعى جارتىلاي قورعاۋشى  بولىپ تا ويناي الادى. سونداي-اق, «ەرتىستەن» اۋىسىپ كەلگەن رومان مۇرتازاەۆ تا «استانانىڭ» شابۋىلىن كۇشەي­تەدى دەگەن سەنىم بار. ال وتكەن جىلى ءوزىن كورسەتە الماعان 28 جاستا­عى ماكەدونيا فۋتبولشىسى اگيم يبرايمي ترانسفەرگە قويىل­دى. «اقتوبە» كومانداسى بيىل قايتا جاڭارىپ جاتىر. كلۋب ديرەكتورى, باپكەرى بارلىعى دا اۋىستى. بۇرىنعى فۋتبولشىلاردىڭ كوبىسى كەتكەن. ۋكراينالىق مامان يگور راحاەۆ قازىردىڭ وزىندە ءۇش بىردەي لەگيونەردى شاقىرىپ ۇلگەردى. ولاردىڭ اراسىندا 2005 جىلى ارگەنتينانىڭ جاستار قۇراماسى ساپىندا الەم چەمپيوناتىندا جەڭىسكە جەتكەن حۋان مانۋەل توررەس بار. جانكۇيەرلەر چاكو دەپ اتاپ كەتكەن فۋتبولشى الەم بىرىنشىلىگىندە بۇگىندە دۇنيە جۇزىنە تانىمال جۇلدىزدار ليونەل مەسسي, سەرحيو اگۋەرو, پابلو سابالەتامەن بىرگە ويناعان ەكەن. راحاەۆ باپكەرگە لاتىن امەري­كا­سىنىڭ فۋتبولشىلارى قاتتى ۇنايتىن ءتارىزدى. برازيليالىق ەكى لەگيونەردى دە قاتارعا قوستى. ولاردىڭ ءبىرى دياس موررەيرا كاسسيانو «ينتەرناسونال» كومانداسىنا تيەسىلى بولاتىن. سوڭعى ماۋسىمدى برازيليانىڭ ب سەرياسىنداعى «گوياس» كلۋبىندا وتكىزگەن. بۇل فۋتبولشىنى «اقتوبە» جالعا الدى. بىراق قوس تاراپتىڭ كەلىسىمى بويىن­شا «اقتوبە» كلۋبى جالعا بەرۋ اقىسىن تولەمەيدى ەكەن. ەكىن­شىسىنىڭ ەسىمى – ەۆانيلدو بورگەس باربوسا جۋنيور نەمەسە جاي عانا جۋنينو. قورعانىستىڭ سول قاپتالىندا ونەر كورسەتەدى. Transfermarkt 1,5 ميلليون ەۋروعا باعالاپ وتىر. دەگەنمەن جۋنينو ەركىن اگەنت رەتىندە تەگىن اۋىستى. بۇرىن ەۋروپانىڭ توپ-كلۋبتارىنىڭ قوسالقى قۇرا­مىندا وتىرسا دا جارناماسى جەر جارىپ تۇراتىن فۋتبولشىلار بولادى. مىسالى, «ەرتىسكە» فرانتسيادان فرانك دجا دجەدجە دەگەن شابۋىلشى كەلدى. 30 جاستاعى فۋتبولشى كوت-د’يۆۋار مەملەكەتىنىڭ استاناسىندا دۇنيەگە كەلگەن. بىراق بالا كەزىنەن فرانتسيادا تۇرادى. پسج كلۋبىنىڭ تۇلەگى. پاريج كومانداسىنىڭ ساپىندا 4 رەسمي ويىن وتكىزگەن. سونداي-اق, «برەست», «گرەنوبل», «ستراسبۋر», «ۆانن», «ارل-اۆيون», «نيتستسا» كلۋبتارىندا ونەر كورسەتكەن. فرانتسيانىڭ جاسوسپىرىمدەر قۇراماسى ساپىندا 2005 جىلى ەۋروپا چەمپيونى اتانىپتى. سول كەزدە ۋگو لوريس, يوان كاباي, ابۋ ديابي, يوانن گۋركيۋفف سەكىلدى بولاشاق جۇلدىزدارمەن بىرگە ويناعان. فۋتبولشىنىڭ جارناماسى ءتاپ-ءتاۋىر. ال ويىنىن ۋاقىت كورسەتەر. «ەرتىس» بيىل ەۋرو­پا ليگاسىنىڭ ىرىكتەۋ كەزەڭىنە قاتىساتىنىن ەسكە سالا كەتەيىك. ءبىر كوماندادان ەكىنشىسىنە اۋى­سىپ جاتقان وتاندىق ويىنشىلار دا جەتەرلىك. توقتار جاڭعىلىشباي «توبىلدىڭ», حايرۋللين «اتى­راۋدىڭ», دوسماعامبەتوۆ «وقجەت­پەستىڭ» جەيدەسىن كيدى. ءيا, ماۋسىمارالىق ترانسفەر قىزىپ-اق تۇر. بۇل ۇدەرىستىڭ جاڭا ماۋسىمعا دەيىن جالعاساتىنىن ەسكە الساق, ءسىز بەن ءبىزدىڭ فۋتبول نارىعىنداعى ءالى تالاي جاڭالىققا كۋا بولاتىنىمىز ايدان انىق. بەك تولەۋوۆ استانا