ۋاقىتشا تىركەۋى جوق ازاماتتارعا ناۋرىز ايىنا دەيىن ايىپپۇل سالىنبايدى

قۇقىق قورعاۋ ورگاندارى تۇراقتى تىركەلگەن جەرىندە تۇرمايتىن جانە ۋاقىتشا تىركەۋى جوق ازاماتتارعا ناۋرىزدىڭ ورتاسىنا دەيىن ايىپپۇل سالمايدى, دەپ حابارلايدى قازاقپارات. بۇل نورماتيۆتىك-قۇقىقتىق اكتىلەر ۇكىمەت تاراپىنان قاۋلىمەن بەكىتىلمەۋىنە بايلانىستى بولىپ وتىر. ونى بەكىتۋ مەرزىمى اقپان ايىنىڭ سوڭىنا دەيىن جوسپارلانعان. سونىمەن قاتار, قۇجات باق-تا رەسمي تۇردە جاريالانعاننان سوڭ 10 كۇننەن كەيىن كۇشىنە ەنەدى. «زاڭعا قوسىمشا اكت بەكىتىلگەنشە, بۇگىندە اكىمشىلىك زاڭناما نورماسى  قولدانىلمايدى. سوندىقتان دا ناۋرىزدىڭ ورتاسىنا دەيىن اكىمشىلىك جاۋاپكەرشىلىككە بىزدە ەشكىم دە تارتىلمايدى. تۇرعىندار اسىقپاستان حقكو نەمەسە ەلەكتروندىق ۇكىمەت پورتالى ارقىلى ءوز تىركەۋلەرىن راسىمدەۋ ءۇشىن ءبىر جارىم اي ۋاقىتى بار», – دەدى قر ءىىم كوشى-قون پوليتسياسى دەپارتامەنتىنىڭ باسشىسى سەرىك سايىنوۆ. وسى ورايدا ول تۇرعىلىقتى جەرى بويىنشا تەكسەرۋ تەك الماتىدا عانا وتكەنىن ەسكە سالىپ ءوتتى. بۇل شارا قىسقى ۋنيۆەرسيادا قارساڭىندا ىسكە اسىرىلدى. «قالعان وڭىرلەردە ناۋرىزدىڭ ورتاسىنا دەيىن قۇقىق قورعاۋ ورگاندارى قانداي دا ءبىر تەكسەرۋلەر جاسامايدى, تىركەۋدى تالاپ ەتپەيدى», – دەدى س. سايىنوۆ.