پاۆلوداردا جىلىنا 30 مىڭ توننا استىق ساقتايتىن ەلەۆاتور سالىنادى

پاۆلوداردا ساعاتىنا 60 توننا استىق ءوندىرىپ, جىلىنا 30 مىڭ توننا استىق ساقتاي الاتىن زاماناۋي ەلەۆاتوردىڭ ىرگەتاسى قالاندى, دەپ حابارلايدى pavlodarnews.kz. «بۇل قويما تولىق اۆتوماتتى جۇيەمەن جابدىقتالادى. گەرمانيا, تۇركيا جانە رەسەي مەملەكەتتەرىنىڭ قۇرالدارى قولدانىلماق. ءبىزدىڭ ينۆەستيتسيا 2,5 ميلليون دوللاردى قۇرادى. 2017 جىلدىڭ قىركۇيەك ايىندا ەلەۆاتوردى ىسكە قوسامىز دەگەن ۇمىتتەمىز. شىعىندى بەس جىلدا وتەپ الۋدى جوسپارلاپ وتىرمىز. ودان كەيىن ەگىستىك القاپتارىمەن اينالىسۋ ويدا بار. بۇل وبلىستا استىق جىل سايىن مول كولەمدە شىعادى. ءوزىم پاۆلوداردىڭ تۋماسى بولعاندىقتان استانادان كەلىپ وسى جەردى تاڭدادىم», – دەدى «GROUPKSM» جشس-ءنىڭ باس ديرەكتورى ءامينا قالىموۆا. سەگىز ايدا سالىنىپ بىتەتىن نىساندا 30 ادام جۇمىس ىستەپ جاتىر. ونىڭ 20-سى تۇراقتى قىزمەتكە قابىلدانعان. زاماناۋي ەلەۆاتور وڭىردەگى اۋىل شارۋاشىلىعىن دامىتىپ, جەرگىلىكتى تۇرعىنداردىڭ ءومىرىن جاقسارتۋ ماقساتىندا بوي كوتەرۋدە.