ونلاين-كونفەرەنتسيا – وڭتايلى ءادىس

ەلورداداعى «استانالىق» بيزنەس ورتالىعىندا قازاقستان پرەزيدەنتتىگىنەن ۇمىتكەر مەلس ەلەۋسىزوۆ بۇقارالىق اقپارات قۇرالدارى وكىلدەرىمەن كەزدەستى. Bnews.kz پورتالىنىڭ ۇيىمداستىرۋىمەن وتكەن ونلاين-كونفەرەنتسيادا كانديدات تاراپىنان جۋرناليستەردىڭ قويعان ساۋالدارىنا جاۋاپ الىندى. ونلاين-كونفەرەنتسيا جۋرناليست تىلەك تەمىربەكوۆتىڭ جۇرگىزۋىمەن ءوتتى. وندا كانديداتتىڭ سايلاۋالدى تۇعىرنا­ما­سىنا, ونىڭ مازمۇنى مەن ەرەكشەلىگىنە ەرەكشە ءمان بەرىلدى. وزدەرىڭىز بىلەتىندەي, مەلس حامزا ۇلى 2005 جىلعى پرەزيدەنتتىك سايلاۋعا دا ءوز كانديداتۋراسىن ۇسىن­عان بولاتىن. بيىلعى جىلعى كەزەكتەن تىس سايلاۋدا اتالعان كانديداتتىڭ تۇعىر­ناماسىنا ايتارلىقتاي وزگەرىستەر ەنگىزىلە قويماعاندىعى ءمالىم بولدى. اتاپ ايتقاندا, بۇل جولى دا ەل ەكولوگياسى مەن تابيعاتى باستى نازارعا الىنىپتى. ەلەك­توراتىن حالىق دەپ تانىستىرعان مەلس ەلەۋسىزوۆتىڭ 2011 جىلعى قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىنا بارىنشا قامدانعان­دىعى كونفەرەنتسيا باسىندا-اق بەلگىلى بولدى. بۇل رەتتە كانديدات ءتورت كان­دي­داتتىڭ ىشىندە ەكىنشى ورىندى يەمدەنەتىنىنە سەنىمدى. ستۋديا جۇرگىزۋشىسى تىلەك تەمىربەكوۆتىڭ: «ءسىزدىڭ ويىڭىزشا, سايلاۋ­دا ەكىنشى ورىن الاتىن بولساڭىز, الدى­ڭىزدان قانداي مۇمكىندىكتەر اشىلماق؟» دەگەن ساۋالىنا مەلس ەلەۋسىزوۆ: «قازاق­ستان رەسپۋبليكاسىندا پرەزيدەنت بولا الماي قالعان جاعدايدا, ۆيتسە-پرەزيدەنت بولۋعا مۇمكىندىك بار دەگەن زاڭ قاراس­تىرىلماعان, سوندىقتان ولاي بولعان جاعدايدا ءوز جۇمىسىمدى ءارى قاراي جالعاستىرا بەرەتىن بولامىن», – دەدى. سونداي-اق, سايلاۋالدى ناۋقانعا ۇكى­مەت تاراپىنان ارنايى بولىنگەن قاراجات­تىڭ قالاي يگەرىلىپ جاتقاندىعى جايلى ساۋ­العا قازىر تەك باق وكىلدە­رى­نىڭ كومەگى­مەن كوپتەگەن ۇگىت-ناسيحات جۇرگىزىلىپ جات­قاندىعىن, سونىمەن قاتار, الداعى ۋاقىتتا پلاكاتتارمەن جۇمىس ىستەگەندە يگەرىلمەگەن قاراجات سول كەزدە يگەرىلەتىندىگىن ايت­تى. ول پلاكاتتار جاقىن ارادا ەلىمىزدىڭ بارلىق وبلىستارىندا ىلىنەتىن بولماق. كونفەرەنتسيا اياسىندا ۇمىتكەر تۇ­عىر­ناماسىنىڭ رەتى تولىقتاي تانىس­تى­رى­لىپ, باق وكىلدەرى اراسىندا كوپتە­گەن سۇراقتار تۋدىردى. ساۋال مەن جاۋاپ رەتىندە وتكەن ونلاين-كونفەرەنتسيا با­رى­سىندا بۇگىنگى قوعامداعى باي مەن كەدەي اراسىنداعى جىك تە قالىس قالعان جوق. اڭگىمە بارىسىندا مەلس ەلەۋسىزوۆ ولاردىڭ ءبىر-بىرلەرىنەن ايىرماشى­لىق­تا­رىنا, ونىڭ الدىن الۋ جولدارىنا كەڭ تۇسىنىك تانىتىپ, ۇلكەن بايىپپەن قا­راي­تىندىعىن دا بايقاتتى. وسى ماسە­لە­نىڭ الدىن الۋ ماقساتىندا جۇمىس ورىندارىن اشۋدى العا تارتىپ, كىشى جانە ورتا بيزنەستىڭ جوعارى دەڭگەيدە دامۋى – كوپتەگەن ماسەلەلەردىڭ الدىن الاتىندىعىن العا تارتتى. سوندا عانا حالىقتىڭ ءال-اۋقاتى ارتىپ, كەدەيشىلىك ماسەلەسى ازاياتىندىعى ايتىلدى. جۇلدىز ءبايدىلدا.