ارۋعا اشقاراقتىق جاراسپايدى
مەكسيكالىق دومونيك راميرەس اشقاراقتىعىنىڭ سالدارىنان «سان-انتونيو ارۋى» اتاعىنان مەزگىلىنەن بۇرىن ايىرىلىپ قالدى. ءسويتىپ, ونىڭ ءتاجى ۆيتسە-ارۋ ەشلي ديكسونعا بۇيىردى. د.راميرەس سوتقا جۇگىنگەنىمەن, ول ارەكەتىنەن تۇك شىقپادى. ويتكەنى, ارۋ اتانعاننان كەيىنگى كەلىسىم-شارت بويىنشا, ول قۇجات كۇشىندە بولاتىن مەرزىمدە سول سالماعىن ۇستاپ تۇرۋى ءتيىس ەدى.
د.راميرەس وسىلايشا «تەحاس ارۋى» كونكۋرسىنا دا قاتىسا المايتىن بولدى. سەبەبى, جوعارىدا ايتىلعانىنداي, ءدامدى مەن ءتاتتىنى كورسە, دۇنيەنىڭ ءبارىن ۇمىتاتىن اشقاراقتىعى. سونداي-اق ول ءوزىنىڭ قويىلىم-كورسەتىلىمدەرىنە كەشىگىپ كەلۋدى دە جامان ادەتكە اينالدىرا باستاعان. مۇنداي ارۋدى كىم ءوزىنىڭ اتاعىنا سايكەس كەلەدى دەپ ايتا الادى؟ ال ۆيتسە-ارۋ ە.ديكسوننىڭ ءوز مۇمكىندىگىن تولىقتاي پايدالانۋعا تىرىساتىنى كۇمانسىز.
تانىمال ءانشىنىڭ ءالسىز جەرى – ىشىمدىك
ءانشى كريستينا اگيلەرا كوپشىلىك ورىنعا ىشىمدىك ءىشىپ كەلگەنى ءۇشىن تۇتقىنعا الىندى. بۇل وقيعا اقش-تىڭ لوس-اندجەلەس اگلومەراتسياسىنا ەنەتىن ۋەست-گولليۆۋد قالاسىندا ورىن الدى. ك.اگيلەرا رولىندە «جىگىتى» وتىرعان اۆتوكولىكتىڭ جولاۋشىلار جاعىنداعى ورىندىقتا وتىرسا كەرەك. ءانشىنىڭ رولگە «قىزىپ الىپ» وتىرعان مەتيۋ راتلەر ەسىمدى بويفرەندى دە دەرەۋ تۇتقىندالعان.
راتلەردى پوليتسيا 30 مىڭ دوللار كەپىلدىككە قويىلعاننان كەيىن قاماۋدان بوساتقان. ال اگيلەرانىڭ كەپىلدىگى 250 دوللار عانا بولعان. ەندى پوليتسيا ءانشىنى وڭالتۋ ورتالىعىندا الكوگوليزمنەن ەمدەلۋ كۋرسىنان وتۋگە مىندەتتەپ كورمەك. ويتكەنى, اگيلەرا قاڭتار ايىندا ءبىر اكتەردىڭ تۋعان كۇنىندە ۇستەل باسىندا ۇيىقتاپ قالسا, اقپان ايىندا وتكەن «گرەممي» سىيلىعىن تاپسىرۋ كەزىندە ساحنادا توڭقالاڭ اسقان.
بويدىڭ ەرەن ۇزىندىعى كەمشىلىك ەمەس
مودەلدەردىڭ بويشاڭ بولۋى ادەتتەگى تالاپ. بىراق وسىنشالىقتى ۇزىن بويلى قىزدى ءبىر كورگەندە باسكەتبول نە ۆولەيبول ويناۋى كەرەك, مودەلدەر بولۋعا تىم كەلىڭكىرەمەيدى دەپ الىستان تون پىشەتىنىڭ انىق. بىراق, انگليادا تۇرىپ جۇمىس ىستەيتىن بويى 2 مەتر 3 سم.-لىك امازونكا يۆ ەسىمدى بويجەتكەن مۇلدەم دە بۇلاي ويلامايدى. ويتكەنى, ونىڭ مودەلدىك كارەراسى ورگە شىعىپ كەلەدى ەكەن.
ءيۆتىڭ ارعى تەگى گەرمانيالىق كورىنەدى. گوللاندياعا دا قاتىسى بار سەكىلدى. ءجاسوسپىرىم كەزىندە كوللەدجدە قۇقىق, مەنەدجمەنت, تەاتر ونەرى جانە فيلولوگيا ماماندىقتارىنىڭ باسىن ءبىر-ءبىر شالىپ شىققان. كينوعا دا ءتۇسىپ كورگەن. ال «پلەيبوي» جۋرنالىنا جالاڭاش سۋرەتى باسىلعانى سول ەكەن, ايى وڭىنان تۋىپ جۇرە بەرگەن. ءسويتىپ, ول بۇگىندە ارمان-قىز اتانىپ وتىرعان كورىنەدى.
جۇلدە سءۇر بويداقتىڭ سورى ما, باعى ما؟
جاقىندا عانا سۇراپىل جەر سىلكىنىسى تىركەلگەن جاڭا زەلانديادا ءسۇر بويداقتارعا ارنالعان بايقاۋ بولىپ ءوتتى. ونىڭ شارتى بويىنشا جەڭىمپازعا قالىڭدىق ىزدەپ قايتۋ ءۇشىن ۋكرايناعا 12 كۇندىك جولداما بەرىلەدى. RocR FM راديوستانساسى ۇيىمداستىرعان كونكۋرستا تەگى ايتىلمايتىن گرەگ ەسىمدى جەرگىلىكتى شاراپ جاساۋشى بويداق جىگىت جەڭىسكە جەتكەن.
جەڭىمپاز ءوزىن وزىنە ءوزى سەنىمدى, ومىرىنە كوڭىلى تولاتىن, رومانتيكالىق سەزىمدەرگە بەرىلگىش جانە قارجىلاي تاۋەلسىز ەركەك رەتىندە سيپاتتايدى. بولاشاق قالىڭدىعىنا دا ناعىز حانشايىم رەتىندە قاراماق. وتباسى مۇشەلەرى دە ونىڭ شەتەلدىككە ۇيلەنەمىن دەگەن يدەياسىن قولداعان كورىنەدى. ەندى سىرباز جىگىتكە كەربەز سۇلۋ جولىعادى دەپ سەنەيىك.
