ايەل بىرىكسە, الىنبايتىن قامال جوق

پارلامەنت ءماجىلىسىنىڭ دەپۋتاتى, ايەل دەپۋتاتتار توبىنىڭ ۇيلەستىرۋشىسى مايرا ايسينا پارلامەنتتە حالىق قالاۋلىلارى بولىپ جۇرگەن, بۇعان دەيىنگى شاقىرىلىمداردا ءماجىلىس دەپۋتاتى بولعان, بۇگىندە ەلوردادا ءتۇرلى باسشىلىق قىزمەت اتقاراتىن حانىمداردىڭ باسىن قوستى. بۇل شۋاقتى كەش قازاقستان رەسپۋبليكاسى پارلامەنتىنىڭ 15 جىلدىعى, قازاقستان رەسپۋبليكا­سى­نىڭ تاۋەلسىزدىگىنە 20 جىل تولۋى مەن تۇڭعىش رەت وتكىزىلگەلى وتىرعان ايەلدەر قۇرىلتايىنىڭ قۇرمەتىنە ارنالدى. «ەلىمىزدىڭ ەڭسە كوتەرىپ, مەملەكەتىمىزدىڭ نى­عايىپ, ىرگەمىز­دىڭ بەكي تۇسۋىنە نازىك جاندى سانا­لا­تىن ايەل­دەر­دىڭ قوسقان ۇلەسى ءول­شەۋسىز. تاريح تۇكپىرىنەن ءسوز تارت­پا­عاننىڭ ءوزىن­دە وسى جيىرما جىل­دا قازاق­تىڭ قىزدارى ەر كوتەرەر جۇك­تى ار­قا­لاي ءبىلدى. سول ەر مىنەزدى قاي­سار قىزدار – سىزدەر دەپ تاني­مىز», – دەپ كەشتى باستادى م.ايسينا. سالتاناتتى كەش «ەلدىڭ باتىر قىزدارى», «حالىق قالاۋ­لى­لا­رى», «مينيستر حانىمدار», «اۋىر جۇك ارقالاعاندار», «حا­لىق ءۇنى», «ءبىزدىڭ ءۇمىت» دەگەن اتاۋلارمەن ايشىقتالىپ, قاتىسىپ وتىرعان ءار ايەلدىڭ وزىندىك ورنىن انىقتادى. ەلىنىڭ باتىر قىزدارى بولىپ مەملەكەتتىك سىيلىقتىڭ لاۋرە­تى, اقىن فاريزا وڭعارسىنوۆا, قو­عام قايراتكەرى زاۋرە قادى­روۆا, مەملەكەتتىك قىزمەتكەرلەر رايسا شەر مەن ليليا مۋسينا تانىلدى. ولار پارلامەنتتىڭ وتكەن شاقىرىلىمدارىنىڭ دەپۋ­تاتتارى, فاريزا اپاي مەن زاۋرە اپايدىڭ مەرەيلى مەرەيتويلارىن ەسكەرگەن سىڭلىلەرى تارتۋ-تارال­عىلارىن دا ۇمىتپادى. فاريزا اپاي ساياساتكەر سىڭلىلەرىنە شىڭ­عىس حاننىڭ شاپقىنشىلىعى كەزىندەگى وتىرار قالاسىنداعى ايەل­دەردىڭ ەرلىگىن اڭگىمەلەپ بەردى دە: «مەملەكەت دامۋىندا اتقا­رىپ وتىرعان ەڭبەكتەرىڭە تابىس, ەلدىڭ بۇگىنى مەن ەرتەڭىن اناعا ءتان جۇرەكپەن ويلاپ جۇرگەن ءجۇ­رەكتەرىڭە العىس تىلەيمىن. پارلامەنتتە وتكىر مالىمدەمەلەر جاساپ, دەپۋتاتتىق ساۋالدار جولداپ وتىرعان قىزدارىمىز, زاڭ دايىن­داعان كەزدە دە ءوز ۇندەرىن تانى­تىپ, ءوز تالاپتارىن قوسىپ وتىر, سونىڭ ارقاسىندا الەۋمەتتىك ءما­سەلەلەر وڭ شەشىمىن تاۋىپ كەلەدى. الدىمىزدا تاۋەلسىزدىكتىڭ 20 جىلدىعى, پرەزيدەنتتىك سايلاۋ, يسلام كونفەرەنتسياسى ۇيىمىنا توراعالىق, ت.ب. كوپتەگەن جاۋاپتى شارۋالار تۇر. ونىڭ نەگىزى مىنا سەن­دەردىڭ قولدارىڭمەن اتقارى­لا­دى. ايەلدەر بىرىكسە, الىن­بايتىن قامال جوق. سەندەرگە سول جولدا تابىس تىلەيمىن!», – دەپ اق باتاسىن بەردى. مەرەكەلى, بەرەكەلى وسى كەشكە اتاقتى سكريپكاشى ايمان مۇسا­قو­جاەۆا, قازاقستاننىڭ ىسكەر ايەلدەرى اس­سو­تسياتسياسىنىڭ پرەزيدەنتى راۋشان سارسەمباەۆا قا­تى­سىپ, حا­لىقتىڭ ءۇنىن جەتكىزدى. جۇلدىز قىزداردىڭ جارقىرا­عان كەشىندە كۇيشى مۇراگەر ءسار­سەنباەۆ, استانا فيلارمونيا­سى­نىڭ انشىلەرى ايزادا قوپانوۆا, ەستاي مۇقاشەۆ, بيبىگۇل جان­ۇزاق جانە «كانتۋس نوۆا» ۆوكال­دى كۆارتەتى ونەر كورسەتتى. ساۋلە دوسجان, جۋرناليست.