وقو: تولەبي اۋدانىندا قىمىز ءوندىرىسى دامۋدا

وڭتۇستىك قازاقستان وبلىسى تولەبي اۋدانىنىڭ قاراتوبە, قاسقاسۋ, قوعالى, الاتاۋ, اققۇم, كەمەقالعان  اۋىلدىق وكرۋگتەرى قىمىز ءوندىرىسىن دامىتۋعا ابدەن ماماندانعان, دەپ حابارلايدى اۋدان اكىمدىگىنىڭ ءباسپاسوز قىزمەتى. قىمىز ءوندىرۋ بويىنشا 2015 جىلى 2375 بيە ساۋىلسا, 2016 جىلى 2415 بيەگە وسكەن. 2015 جىلى 1781 توننا, 2016 جىلى 1835 توننا قىمىز وندىرىلگەن. ونىڭ ىشىندە: 2015 جىلى - 780 تونناسى ءوزىنىڭ قاجەتتىلىگىنە جۇمسالسا, 1001 توناسى ساتىلعان. ال 2016 جىلى - 783 تونناسى ءوز قاجەتتىلىگىنە, 1052 تونناسى ساتىلىمعا شىعارىلعان. قىمىز ءوندىرۋ سالاسىندا مەملەكەتتىك قولداۋ شارالارى 13 شارۋاشىلىققا كورسەتىلىپ, 480 توننا قىمىز وندىرگەنى ءۇشىن 28,8 ملن. تەڭگە سۋبسيدياعا قول جەتكىزدى. 2016 جىلى قوسىمشا 3 شارۋاشىلىق قوسىلىپ, 16 شارۋاشىلىققا ۇلعايعان.  بيىل سۋبسيديا كولەمى 29,1 ملن تەڭگەگە جەتىپ وتىر. اۋدانعا قاراستى اققۇم اۋىلدىق وكرۋگىندە قىمىز ءوندىرۋشى ۇلبوسىن ورازىمبەتوۆا بيەلەردى ساۋىپ قانا قويماي, ونى باپتاۋمەن دە ءوزى اينالىسادى. سالقىن بيە ءسۇتى 2 ساعاتتا قىمىزعا اينالادى ەكەن. ونى كەڭ دالانىڭ كەرمەك ءيىستى كيىكوتى شوبىنە ىستايتىنىن ايتادى. جەكە كاسىپكەردىڭ ايتۋىنشا, 9 ايدا 41640 ليتر قىمىز ءوندىرىپتى. زەرتاس اۋىلدىق وكرۋگىنىڭ تۇرعىنى جەكە كاسىپكەر تۇرار كورتاەۆ 9 ايدا 32500 ليتر قىمىز ءوندىرىپ, اۋدان تۇرعىندارىن قىمىزبەن قامتىپ وتىر. قىمىز ساپالى تاماق ءونىمى عانا ەمەس, سونداي اق شيپالى سۋسىن دەپ تە ەسەپتەلەدى. حالىق اراسىندا قىمىزدى كوڭىل كۇي سەرگەكتىگى جانە ۇزاق جاساۋ سۋسىنى دەپ تەككە اتاماعان. ەمدىك سۋسىن رەتىندە قىمىزدى ءوزىمىزدىڭ اتا-بابالارىمىز حالىق مەديتسيناسىندا پايدالانىپ كەلگەن. قىمىز ءىشىپ, اعزالارىڭىزعا مولىراق دارۋمەندەر جيناپ, دەنساۋلىقتارىڭىزدى جاقسارتىپ الۋعا بولادى.