سايلاۋ بيۋللەتەندەرىنىڭ سانى – 9 191 977 دانا

كەشە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ توراعالىق ەتۋىمەن كوميسسيانىڭ كەزەكتى وتىرىسى ءوتتى. وندا قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى جونىندەگى سايلاۋ بيۋللەتەندەرى تۋرالى قاۋلى قابىلداندى. ورتالىق سايلاۋ كوميسسياسىنىڭ حات­شىسى باقىت مەلدەشوۆتىڭ حاباردار ەتكەنىندەي, قاۋلى بويىنشا 2011 جىلعى 3 ساۋىرگە تاعايىندالعان قازاق­ستان رەسپۋبليكاسىنىڭ كەزەكتەن تىس پرەزيدەنتتىك سايلاۋى جونىندەگى سايلاۋ بيۋللەتەندەرى ورتالىقتان­دى­رى­لىپ داي­­ىندالادى. سايلاۋ بيۋللە­تەن­­دەرى­نىڭ سانى سايلاۋشىلاردىڭ ءتى­زىمدەرىنە ەنگىزىلگەن سايلاۋشى­لار­دىڭ جالپى سانىنىڭ 1 پايىزدىق رەزەرۆىمەن قوسا, 9 191 977 دانانى قۇ­راي­تىن بولىپ بەلگىلەندى. ال سايلاۋ بيۋل­لەتەندەرى قر ۇلت­تىق بانكىنىڭ بانكنوت فابريكا­سىندا باسىلىپ شىعارىلادى. اتالعان قاۋلىعا سايكەس سايلاۋ بيۋللەتەندەرىنىڭ قورعالۋ دارەجەسى دە بەلگىلەندى جانە سايلاۋ بيۋللەتەندەرىندەگى ماتىندەر دە بەكىتىلدى. سايلاۋ بيۋللەتەندەرى وبلىستىق, استانا جانە الماتى قالالىق سايلاۋ كوميسسيا­لارىنا 2011 جىلدىڭ 25 ناۋرىزىنان باستاپ بەرىلە باستايدى. ال ۋچاسكەلىك سايلاۋ كوميسسيالارىنا سايلاۋ بيۋللەتەندەرىن وبلىستىق, استانا جانە الماتى قالالىق سايلاۋ كوميسسيالارى 2011 جىلعى 1 ساۋىردەن كەشىكتىرمەي جەت­كىزۋدى جانە اكت بوي­ىنشا بەرۋدى قامتاماسىز ەتۋلەرى ءتيىس. وتىرىستا, سونداي-اق ورتالىق سايلاۋ كوميسسياسىنىڭ مۇشەسى تاتيانا وحلوپكوۆا تمد-نىڭ بايقاۋشى ميسسياسىنان ەكى بايقاۋشىنى تىركەۋ تۋرالى قاۋلى قابىلدانعانىنان حاباردار ەتتى. ولار بەلارۋس رەسپۋب­ليكاسىنىڭ وكىلدەرى نيكولاي لوگوۆيك پەن مارينا راحمانوۆا. ت.وحلو­پكوۆا­نىڭ ايتۋىنشا, كەشەگى كۇنگە دەيىن ورتالىق سايلاۋ كوميسسياسىنا 59 بايقاۋشى تىركەلگەن. ونىڭ 44-ءى ەقىۇ-نىڭ دەموكراتيالىق ينستيتۋتتار جانە ادام قۇقىقتارى ءجو­نىندەگى بيۋروسى ميسسياسىنان, 2-ەۋى تمد ميسسياسىنان, 11-ءى شەت مەم­لەكەتتەردەن, ال 2-ەۋى حالىق­ارالىق رەسپۋبليكالىق ينستيتۋ­تىنان. *  *  * كەشە ورتالىق سايلاۋ كوميسسيا­سىنىڭ توراعاسى قۋاندىق تۇر­عان­قۇلوۆ قازاقستان رەسپۋبليكاسىنىڭ پرەزيدەنتتىگىنە كانديدات بولىپ تىركەلگەن مەلس ەلەۋسىزوۆ پەن عاني قاسىموۆقا كۋالىك تاپسىردى. ءاليسۇلتان قۇلانباي.