ەلورداداعى «قازمەديا» كينوكونتسەرت زالىندا «قازاقستان-تۇركيا دوستىق اۋەندەرى» اتتى كونتسەرت ءوتتى.
شارا تۇركيا رەسپۋبليكاسىنىڭ قازاقستانداعى ەلشىلىگى, يۋنۋس ەمرە اتىنداعى تۇرىك مادەنيەت ورتالىعى مەن تۇرىك ىنتىماقتاستىق جانە ۇيلەستىرۋ اگەنتتىگىنىڭ (TIKA) استانا كوورديناتارلىعىنىڭ تاراپىنان تۇركيانىڭ استانا قالاسىنداعى كۇندەرى اياسىندا ۇيىمداستىرىلدى.
كونتسەرتتە تۇركيانىڭ مادەنيەت جانە تۋريزم مينيسترلىگىنە قاراستى «انكارا تۇركى الەمى مۋزىكالىق ءانسامبلى» جانە سول ەلدىڭ تانىمال ءانشى-بيشىلەرى - چيدەم گيۋردال, دجەم گيۋردال, مۋستافا ەكە, الي شار, گوكچە كۋچۋكباحارلار ارنايى مەرەكەلىك رەپەرتۋار دايىنداپ, تۇرىكتىڭ اۋەزدى اندەرى مەن مىڭ بۇرالعان بيلەرىمەن كورەرمەندەردىڭ ىقىلاسىنا بولەندى. ودان بولەك, كەشتە وتاندىق انشىلەر كامشات جولدىباەۆا, گۇلنۇر ورازىمبەتوۆا, «حانزادا» توبى دا ونەر كورسەتتى. قازاقستاندىق انشىلەر تۇرىك تىلىندە, تۇركيادان كەلگەن قوناقتار قازاق تىلىندە دە ءان ورىندادى.
كەش سوڭىندا كونتسەرتكە كەلگەن كورەرمەندەرگە قولما قول لوتورەيا ويناتىلىپ, جولى بولعان كورەرمەندەر تۇرىك اۋە جولدارىنىڭ ستامبۋلعا بارىپ قايتۋ بيلەتىنە جانە سمارتفونعا يە بولدى.
اتاپ ءوتۋ كەرەك, تۇركيانىڭ ەلورداداعى كۇندەرى اياسىندا «وسمانلى داۋىرىندەگى ساراي كيىمدەرى» دەفيلەسى ۇيىمداستىرىلعان. دەفيلەدە وسمانلى داۋىرىندە سارايدا كيىلگەن كيىم ۇلگىلەرى كورسەتىلەدى. ستيليستەر 40 كيىم ۇلگىسىنەن تۇراتىن توپتامانى ۇسىنباق.
ايگۇل سەيىلوۆا
فوتو ورىنباي بالمۇرات
