تۇرعىن ءۇي قاتىناسى ناقتىلاندى

ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى جالپى وتىرىسىنىڭ كۇن تارتىبىندە توعىز ماسەلە تالقىعا سالىندى. وتىرىس بارىسىندا شىعارما­شى­لىق قىزمەتكە قاتىستى زاڭدىق قۇجات بويىنشا پالاتالار ارا­سىنداعى كەلىسپەۋشىلىك ەڭسەرىلدى. قارۋلى كۇشتەردىڭ, باسقا دا اسكەرلەر مەن اسكەري قۇرىلىم­دار­دىڭ ارسەنالدارى, بازالارى مەن قويمالارى جانىنداعى تىي­ىم سالىنعان ايماقتار مەن تىي­ىم سالىنعان اۋداندار ماسەلە­لە­رى بويىنشا كەيبىر زاڭنامالىق اكتىلەرگە تولىقتىرۋلار ەنگىزۋ جونىندەگى زاڭدىق قۇجاتقا قىس­قا­شا باياندامانى قورعانىس مي­نيسترىنىڭ ورىنباسارى تالعات جانجۇمەنوۆ جاسادى. اتى ايتىپ تۇرعانداي, ارسەنالدار مەن قوي­ما­لار ورنالاسقان تىيىم سالىن­عان ايماقتارعا 400 مەترگە جۋىق­تاۋعا بولماسا, ال تىيىم سالىن­عان اۋداندارعا 3 شاقىرىم شەڭبەرىندە جاقىنداۋعا رۇقسات بەرىلمەيدى. دەپۋتاتتار زاڭ جوباسىن تالقىلاي كەلە, ونى ماقۇلداۋ قاجەت دەپ شەشتى. كەلەسى قارالعان تۇرعىن ءۇي قاتىناستارى ماسەلەلەرى بويىن­شا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋگە قاتىستى زاڭدىق قۇجات ءبىرىنشى وقىلىمدا قارالدى. ول بويىنشا باياندامانى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگى ءتور­اعاسىنىڭ ورىنباسارى نيكولاي تيحونيۋك جاسادى. زاڭ جوباسى­نىڭ نەگىزگى ماقساتى مەملەكەتتىك تۇرعىن ءۇي قورى, كوممۋنالدىق تۇرعىن ءۇي قورى, مەملەكەتتىك كاسىپورىنداردىڭ تۇرعىن ءۇي قورى جانە مەملەكەتتىك مەكەمەلەردىڭ تۇرعىن ءۇي قورى دەپ اراجىگىن اجىراتۋ بولىپ تابىلادى. سونداي-اق دەپۋتاتتار جەرگىلىكتى اتقارۋشى ورگانداردىڭ كوممۋنالدىق تۇرعىن ءۇي قورىنان تۇرعىن ۇيگە مۇقتاجداردىڭ ەسەبىندە تۇرعان ازاماتتاردىڭ كەزەكتىلىك تىزىمىنە جىل سايىن تۇگەندەۋ جۇرگىزۋ; جەتىم بالالارعا جانە اتا-اناسىنىڭ قامقورلىعىنسىز قالعان بالالارعا تۇرعىن ءۇي قورىنان تۇرعىن ءۇي الۋعا ارنالعان جاس مولشەرىن ۇلعايتۋ; ازاماتتاردى حالىقتىڭ الەۋمەتتىك قورعالاتىن توپتارىنا جاتقىزۋ تالاپتارىن ناقتىلاۋ; تۇرعىن ءۇي ينسپەكتسيالارى مەن ءۇي-جايلار (پاتەرلەر) يەلەرى جينالىسىنىڭ قۇزىرەتىن ناقتىلاۋ; مىندەتتى تۇردە كوندومينيۋم وبەكتىسىنىڭ ورتاق مۇلكىن كۇردەلى جوندەۋگە ارنالعان جيناق شوتىن اشۋ جانە كوندومينيۋم وبەكتىسىنىڭ ورتاق مۇلكىن كۇتىپ ۇستاۋعا ارنالعان شىعىستارعا قاتىسۋدان جالتارعان پاتەر يەلەرىنەن سوت ورگاندارى ارقىلى بەرەشەكتى ءوندىرىپ الۋ ماسەلەلەرىن كوزدەيتىن تۇزەتۋلەردى ەنگىزدى. جالپى سانى 300-دەن اساتىن تۇزەتۋ جۇمىس توبىندا قارالعاندىقتان, زاڭ جوباسى قولداۋ تاپتى. سونداي-اق, جالپى وتىرىستا ەلەكتروندىق اقشا ماسەلەلەرى بويىنشا كەيبىر زاڭنامالىق اكتىلەرگە تولىقتىرۋلاردى قاراستىراتىن زاڭ جوباسى قارالىپ, وندا ەلەكتروندىق اقشانى شىعارۋ ءارى تولەمدەر مەن وزگە دە قارجى وپەراتسيالارىن جۇرگىزۋ بارىسىنداعى قۇقىقتىق قاتىناستاردى رەتتەۋ كوزدەلەدى. ال «ەسىرتكى, پسيحوتروپتىق زاتتار, پرەكۋرسورلار جانە ولاردىڭ زاڭسىز اينالىمى مەن تەرىس پايدالانىلۋىنا قارسى ءىس-قيمىل شارالارى تۋرالى» زاڭعا تولىقتىرۋ ەنگىزۋ جونىندەگى زاڭ جوباسىن ءماجىلىس دەپۋتاتى بەرىك بەكجانوۆ تانىستىردى. اتالعان زاڭ جوباسىمەن, اسىرەسە, اۋىلدىق جەرلەردە كوبىنەن تۇتىنىلىپ جۇرگەن ناسىبايعا دا تىيىم سالۋ كوزدەلىپ وتىر. ويتكەنى, اتالعان جاسىل ءتۇستى تۇيىنشەكتى ۇنتاقتاردىڭ قۇرامى بەلگىسىز كۇيىندە قالىپ كەلەدى. ولاي بولسا, اتالعان زات دەنساۋلىققا زيانىن تيگىزۋى ابدەن مۇمكىن, دەپ سانايدى زاڭ جوباسىنىڭ اۆتورلارى. زاڭ جوباسى ماقۇلداندى. بۇدان باسقا «كوپەنگاگەندە 1992 جىلعى 23-25 قاراشادا قول قويىلعان وزون قاباتىن بۇزاتىن زاتتار جونىندەگى مونرەال حاتتاماسىنا تۇزەتۋلەردى جانە مونرەالدا 1997 جىلعى 15-17 قىركۇيەكتە قول قويىلعان وزون قاباتىن بۇزاتىن زاتتار جونىندەگى مونرەال حاتتاماسىنا تۇزەتۋلەردى راتيفيكاتسيالاۋ تۋرالى» زاڭ جوباسى جانە «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا قولداۋ تاپتى. اسقار تۇراپباي ۇلى.