تابيعي اپات – كليماتتىق وزگەرىس سالدارى

جىل سايىن قازان ايىندا بۇكىل الەم بويىنشا اتالىپ وتىلەتىن حالىقارالىق تابيعي اپاتتار قاۋپىن ازايتۋ كۇنىنە بايلانىس­تى الماتىدا ۇلكەن جيىن ءوتتى. ايتا كەتەرلىگى, بۇل شارا بيىلعى جىلى بۇۇ نەگىزىنىڭ قالانعانىنا 71 جىل تولۋ ۋاقىتىنا سايكەس ۇيىمداستىرىلدى.   بۇۇ باس اسسامبلەياسى 1989 جىلى الەمدى الاڭداتقان تابيعي اپاتتاردىڭ الدىن الۋ جانە وعان قارسى الەم ەلدەرىن بىرىكتىرۋ ماقساتىندا قازان ايىنىڭ ەكىنشى سارسەنبىسىن حالىقارالىق تابيعي اپاتتار قاۋپىن ازايتۋ كۇنى دەپ بەلگىلەپ, بۇل كۇندى جىل سايىن اتاپ وتۋگە قاۋلى ەتكەن بولاتىن. «Live To Tell» («ايتۋ ءۇشىن ءومىر ءسۇرۋ») تۇجى­رىمداماسىن باستى تاقىرىپ ەتكەن بيىلعى جيىننىڭ نەگىزگى ماقساتى ءومىر تالاپتارىنان تۋىندايتىن اپاتتاردى توقتاتۋعا باعىت­تالعان الەمدىك شارالاردى كەڭىنەن ناسيحاتتاۋ بولىپ تابىلادى. «جىل سايىن ءتۇرلى تابيعي اپاتتار سالدارىنان  الەم بويىنشا مىڭداعان ادام كوز جۇمىپ, ميلليونداعان جان زارداپ شەگىپ, كوپتەگەن ەلدەردىڭ  ەكونوميكالارى ۇلكەن شىعىندارعا باتىپ جاتادى, تابيعي اپاتتاردىڭ 90 پايىزى عالامدىق كليمات وزگەرىسىنەن تۋىنداپ وتىرادى» دەپ پىكىر بىلدىرگەن جيىنعا قاتىسۋشىلار, سونداي-اق, ورتالىق ازيا مەن وڭتۇستىك كاۆكاز ايماقتارىن ايرىقشا نازارعا الا وتىرىپ, وزىق تاجىريبەلەرمەن ءبولىسۋ جۇمىس­تارى, اعىمداعى باستامالار مەن تابيعي اپات قاۋىپتەرىن ەڭسەرۋدە ادام شىعىنىن بارىنشا ازايتۋدىڭ مۇمكىندىكتەرىن تالقىلادى. تابيعي اپاتتار قاۋپىن ازايتۋ مادەنيەتىن قالىپتاستىرۋعا ىقپال ەتەتىن بۇل جيىنعا بىرىككەن ۇلتتار ۇيىمىنىڭ تابيعي اپاتتار قاۋپىن ازايتۋ جونىندەگى بيۋروسى (تااب بۇۇ – UNISDR) مەن يۋنەسكو-نىڭ الماتىداعى كلاستەرلىك بيۋروسى, سونىمەن قاتار, توتەنشە جاعدايلار كوميتەتىنىڭ وكىلدەرى, تج تااو ديرەكتورى قاتىستى. جيىن سوڭىندا ادامزاتتى تابيعي اپات زارداپتارىن جەڭىلدەتۋگە جانە وعان دايىن بولۋعا شاقىراتىن فيلم كورسەتىلدى. ميرا بايبەك, «ەگەمەن قازاقستان» الماتى