برازيليا قازاقستانعا دۇنيەجۇزىلىك تاۋ-كەن كونگرەسىن وتكىزۋ ەستافەتاسىن تاپسىردى

21 قازان كۇنى ريو-دە-جانەيرودا دۇنيەجۇزىلىك تاۋ-كەن كونگرەسىنىڭ (دتك) ءداستۇرلى سيمۆولى «ماي شامدى» ياعني, كونگرەستى وتكىزۋ قۇقىعى ەستافەتاسىن سالتاناتتى تۇردە قازاقستانعا تاپسىرۋ ءراسىمى ءوتتى, دەپ حابارلايدى قازاقپارات قر ينۆەستيتسيالار جانە دامۋ مينيسترلىگىنىڭ ءباسپاسوز قىزمەتىنەن ءمالىم ەتتى. سالتاناتتى راسىمدە برازيليانىڭ تاۋ-كەن ءوندىرۋ قاۋىمداستىعىنىڭ باسشىسى حوسە فەرناندو كوۋرا, دتك 2016 توراعاسى جار كارلوس كوپپە (برازيليا),  دتك توراعاسى دجوزەف دۋبينسكي (پولشا), VALE باس اتقارۋشى ديرەكتورى مۋريلو فەررەيرا, قازىرگى حالىقارالىق ۇيىمداستىرۋ كوميتەتىنىڭ مۇشەسى, قر ينۆەستيتسيالار جانە دامۋ مينيسترلىگى يندۋستريالىق دامۋ جانە وندىرىستىك قاۋىپسىزدىك كوميتەتى توراعاسىنىڭ ورىنباسارى قانات بايتوۆ ءسوز سويلەدى. «تاۋ-كەن مەتاللۋرگيالىق كەشەن قازاقستان ءۇشىن ەلدىڭ ەكونوميكا سالاسىندا ماڭىزدى جوبالاردىڭ ءبىرى بولىپ تابىلادى. جالپى وندىرىستىك كاسىپورىن سالاسىندا تمك  18% قۇرايدى. سوندىقتان, 2018 جىلى استانادا دۇنيەجۇزىلىك تاۋ-كەن كونگرەسىن وتكىزۋ ءبىز ءۇشىن وتە ماڭىزدى وقيعا بولماق. بۇل ءوز كەزەگىندە ەلدىڭ بارلىق سەكتورىنا وڭ ىقپال ەتەرى ءسوزسىز. بۇگىنگە دەيىن جيناعان تاجىريبەمىز بەن بىلىمىمىزگە سۇيەنە وتىرىپ, 2018 جىلى دتك-ءنى جوعارى حالىقارالىق دەڭگەيدە وتكىزەتىنىمىزگە سەنىمدىمىن»,-دەدى قانات بايتوۆ. سونىمەن قاتار, دتك-ءنىڭ جابىلۋ سالتاناتىندا وسى كۇنگە دەيىن قازاقستاندا ەكى رەت بولعان, Astana Mining & Metallurgy حالىقارالىق تاۋ-كەن مەتاللۋرگيالىق كونگرەسىنە قاتىسقان پروفەسسور دجوزەف دۋبينسكي قازاقستان 2018 جىلى دۇنيەجۇزىلىك تاۋ-كەن كونگرەسىن ءساتتى وتكىزەتىنىنە سەنىم ءبىلدىردى. بۇدان بولەك, 2018 جىلى استانادا وتەتىن كونگرەسس اتاۋلى ەكى داتانى دا اتاپ وتەتىن بولادى. ياعني, كونگرەسس 25-ءشى رەت وتەدى جانە ونىڭ قۇرىلعانىنا 60 جىل تولادى. سالتاناتتى ءراسىم قورىتىندىسى بويىنشا,  برازيليانىڭ تاۋ-كەن ءوندىرۋ قاۋىمداستىعىنىڭ باسشىسى حوسە فەرناندو كوۋرا دتك ءداستۇرلى سيمۆولى «ماي شامدى» قازاقستان رەسپۋبليكاسىنىڭ توتەنشە جانە وكىلەتتى ەلشىسى قايرات سارجانوۆقا تاپسىردى. دۇنيەجۇزىلىك تاۋ-كەن كونگرەسى 2016 اياسىندا ەكىجاقتى بىرقاتار كەزدەسۋلەر ءوتتى. وندا دتك تەحنولوگيالىق ماسەلەلەرى تالقىلانىپ,  جاڭاشىلدىقتار ۇسىنىلدى. ياعني, ەكونوميكالىق تۇرعىدا كومپانيالاردى باسقارۋ, حالىقارالىق قارجىلاندىرۋ مەن ىنتىماقتاستىق سياقتى وزەكتى تاقىرىپتار تالقىعا ءتۇستى. قازاقستاندىق دەلەگاتسيا قۇرامىنا قازاقستاننىڭ مەملەكەتتىك سالالارىنىڭ, ينستيتۋتتاردىڭ, تمك ءىرى ءپروفيلدى كومپانيالاردىڭ وكىلدەرى جانە ءوز كەزەگىندە دتك 2018 وپەراتورى بولىپ تابىلاتىن Iteca كورمە كومپانياسىنىڭ وكىلدەرى كىردى. ەستەرىڭىزگە سالا كەتەيىك, 2018 جىلى 19-22 ماۋسىمدا استانادا 25-ءشى دۇنيەجۇزىلىك تاۋ-كەن كونگرەسى وتەدى. اتالعان شارا ءداستۇرلى AstanaMining & Metallurgy حالىقارالىق تاۋ-كەن مەتاللۋرگيا كونگرەسى بازاسى اياسىندا ۇيىمداستىرىلادى.