تارازدا 1916 جىلعى ۇلت-ازاتتىق كوتەرىلىستىڭ تاريحىنا ارنالعان كىتاپتىڭ تۇساۋكەسەرى ءوتتى

تاراز مەملەكەتتىك پەداگوگيكالىق ينستيتۋتىندا "تۇركىستان ولكەسىندەگى 1916 جىلعى ۇلت-ازاتتىق كوتەرىلىس تاريحى (سىرداريا جانە جەتىسۋ وبلىستارىنىڭ ماتەريالدارى بويىنشا)" مونوگرافياسىنىڭ تۇساۋكەسەرى ءوتتى. عىلىمي ەڭبەكتىڭ اۆتورى - قر ۇعا كوررەسپوندەنت-مۇشەسى, تاريح عىلىمدارىنىڭ دوكتورى, پروفەسسور داريا قوجامجاروۆا. بۇل تۋرالى تارمپي رەسمي وكىلى جاندار اسان حابارلايدى. مونوگرافيادا 1916 جىلعى پاتشانىڭ "ماۋسىم" جارلىعىنا قارسى تۇركىستان ولكەسىندە وتكەن جەرگىلىكتى حالىقتار: قازاق, وزبەك, قىرعىز, دۇنگەن, ۇيعىرلاردىڭ كوتەرىلىستەرى باياندالادى. عىلىمي ەڭبەكتىڭ نەگىزى تۇركىستان ولكەسىندەگى, اتاپ ايتقاندا سىرداريا مەن جەتىسۋ وبلىستارىنداعى جەرگىلىكتى تۇرعىنداردىڭ 1916 جىلعى ۇلت-ازاتتىق كوتەرىلىسكە شىعۋىنىڭ الەۋمەتتىك-ەكونوميكالىق, ساياسي-رۋحاني سەبەپتەرى مەن العىشارتتارىن, كوتەرىلىستىڭ باستالۋى مەن بارىسىن, پاتشالىق اكىمشىلىك تاراپىنان كوتەرىلىستى قاتىگەزدىكپەن باسىپ-جانشۋىن, جەڭىلىسكە ۇشىراعان حالىقتىڭ بوسقىنشىلىققا ۇشىراپ كورشىلەس جاتقان قىتاي جەرىنە اۋا كوشۋى, قوس يمپەريانىڭ قىسپاعىنا تۇسكەن بوسقىنداردى تاريحي وتانىنا قايتارۋداعى قازاق زيالىلارىنىڭ ەڭبەكتەرى مۇراعاتتىق قۇجاتتار مەن تاريحي دەرەكتەردەگى مالىمەتتەرگە سۇيەنە وتىرىپ جازىلعان. كىتاپ ستۋدەنتتەر, جوعارى وقۋ ورىندارىنىڭ وقىتۋشىلارى مەن تاريحقا قىزىعاتىن وقىرمان قاۋىمعا ارنالعان.