04 ناۋرىز، 2011

حالىقارالىق قۇجاتتار قولداۋ تاپتى

247 رەت كورسەتىلدى
سەنات توراعاسىنىڭ ورىنباسارى مۇحامبەت كوپەەۆتىڭ توراعالىعىمەن وتكەن پالاتانىڭ كەشەگى جالپى وتىرىسىنىڭ كۇن تارتىبىندە ەكى حاتتاما مەن شارتتى راتيفيكاتسيالاۋعا قاتىستى ءۇش زاڭدىق قۇجات قارالدى. «كەدەن وداعى بىرىڭعاي كەدەن اۋما­عىنىڭ جۇمىس ىستەۋ رەجىمىنەن جەكەلەگەن ۋاقىتشا الۋلار تۋرالى حاتتامانى راتيفيكاتسيالاۋ تۋرالى» زاڭ جوباسى بوي­ىنشا باياندامانى ەكونوميكالىق دامۋ جانە ساۋدا ءمينيسترىنىڭ مىندەتىن اتقارۋشى مارات قۇسايىنوۆ جاسادى.  حاتتامادا جەكە تۇلعالار جەكە پاي­دالانۋعا ارنالعان جەڭىل اۆتوكولىكتەرىن اكەلۋ كەزىندە ۋاقىتشا جەڭىلدەتىلگەن كەدەندىك باج ستاۆكالارىن قولدانۋ كوز­دەلىپ وتىر. جەڭىلدىك ۇستىمىزدەگى جىل­دىڭ 1 شىلدەسىنە دەيىن قولدانىلادى. قورعاۋ، دەمپينگكە قارسى جانە وتەماقى شارالارى، ءار ءتۇرلى ساۋدا رەجىمدەرى قول­دانىلاتىن تاۋارلار يمپورتىنا، قا­زاقستان رەسپۋبليكاسى وتپەلى كەزەڭدە نەعۇرلىم تومەن كەدەندىك باج ستاۆكا­لارىن قولداناتىن تاۋارلارعا دا كەدەندىك دەكلاراتسيانى قولدانۋ كوزدەلگەن. بىرىڭعاي كەدەندىك ءتاريفتى قالىپ­تا­س­تىرۋ  كەلىسسوزدەر نەگىزىندە سەزىمتال دەگەن 400 تاۋارلىق پوزيتسيا بويىنشا قول­دانىلاتىن بولادى. زاڭ جوباسى ءبىر­اۋىزدان قولداۋ تاۋىپ، قابىلداندى. ەكىنشى قارالعان زاڭ جوباسى «تاۋەلسىز مەملەكەتتەر دوستاس­تىعىنا قاتىسۋشى مەملەكەتتەر­دىڭ قىلمىستىق كىرىستەردى زاڭداس­تىرۋ­عا (جىلىستاتۋعا) جانە تەرروريزمدى قارجىلاندىرۋعا قارسى ءىس-قي­مى­لى تۋرالى شارتتى راتيفيكاتسيالاۋ تۋرالى» دەپ اتالادى. ول بو­يىن­شا باياندامانى قارجى ءمينيسترى بولات جامىشەۆ جاسادى. مي­نيستردىڭ مالىمەتىنەن بەلگىلى بول­عان­داي، 2007 جىلعى 5 قازاندا دۋشانبەدە قازاقستان، رەسەي، ارمەنيا، بەلورۋسسيا، قىرعىزستان ءجا­نە تاجىكستان مەملەكەتتەرى اتال­­عان شارتقا قول قويعان. شارتتا نورماتيۆتىك قۇقىقتىق بازانى قالىپتاس­تىرۋعا قاتىستى ەرەجەلەر كوزدەل­گەن، وعان سايكەس تاراپتار وزدەرى­نىڭ قۇزىرەتتى ورگان­دارى­نا قىل­مىس­تىق كىرىستەردى جانە تەرروريزمدى قار­جى­لان­دىرۋ­عا ارنالعان قاراجاتتى سايكەستەن­دىرۋگە، ىزدەستىرۋگە، وسىن­داي كىرىستەرمەن جانە قاراجاتپەن جا­سالا­تىن وپەراتسيالار مەن ءمامى­لە­لەر­دى، ولاردى بەرۋدى نەمەسە  ولار­­­عا وزگەشە يەلىك ەتۋدى بولدىرماۋ جان-جاقتى قاراستىرىلعان. دەپۋتات تاسباي سيمامباەۆ وسى رەتتە كوپتەگەن قارجىلار شەتەل اسىپ جاتقاندىعىن العا تارتا وتىرىپ، سولاردى قايتارۋدا نەندەي ءىس-ارەكەتتەر جاسالىپ جاتقان­دىعىن سۇرادى. مينيستر ءوز جاۋا­بىن­دا قارجى مونيتورينگى كوميتەتى قۇقىق قورعاۋ ورگاندارىنا تەك مالىمەت بەرۋمەن شەكتەلەتىندىكتەن، بۇل ماسەلەمەن تۇبەگەيلى اينالىسپايتىندىعىن جەتكىزدى. زاڭ جوباسى ءبىراۋىزدان قابىلدان­دى. «دۇنيەجۇزىلىك پوشتا وداعى­نىڭ جارعىسىنا سەگىزىنشى قو­سىم­شا حاتتامانى راتيفيكاتسيالاۋ تۋ­رالى» زاڭ جوباسى بويىنشا بايلا­نىس جانە اقپارات ءمينيسترى اسقار جۇماعاليەۆ قىسقاشا بايانداما جا­سا­دى. بۇل حاتتاما پوشتا وپەراتور­لارى ءۇشىن ستاندارت­تالعان تەرميندەرىن بەلگىلەۋ، امبەباپ پوشتا قىزمەتتەرىنىڭ قۇقىقتىق نەگىزىن كەڭەيتۋ جانە ءوزارا ىقپالداستىقتى دامىتۋعا باعىتتالعان. سەگىزىنشى حاتتاما سونىمەن قاتار حالىقارا­لىق پوشتا الماسۋدى كەڭەيتۋ ءۇشىن دە قاجەت، جازباشا حات-حابارلار رەگلامەنتىن جانە پوشتا جونەلتىلىم­دەرى رەگلامەنتىن ساقتاۋ مىندەتتەمەسىن كوزدەيدى. سونىمەن قاتار ولار حالىقارالىق پوشتا قىزمەتى­ن­ە قولدانىلاتىن جالپى قاعيدا­لار­دى، حالىقارالىق پوشتا الماسۋ­دى جۇزەگە اسىرعان كەزدە، مۇشە ەلدەر اۋماعى ارقىلى ەركىن ترانزيت ۇسىنعان كەزدە جازباشا حات-حابار­لار مەن پوشتا جونەلتىمدەرى قىز­مەت­تەرى تۋرالى ەرەجەلەردى قامتي­دى. سەناتورلار اتالعان زاڭدىق قۇجاتتىڭ ماڭىزىن ەسكەرىپ، ونى ءبىراۋىزدان قابىلدادى. اسقار تۇراپباي ۇلى.
سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار