04 ناۋرىز، 2011

ىقپالداستىقتىڭ جولدارى كوپ

257 رەت كورسەتىلدى
جەنەۆادا مەملەكەتتىك حاتشى – سىرتقى ىستەر ءمينيسترى قانات ساۋداباەۆ ءوزىنىڭ جۇمىس ساپارى اياسىندا بۇۇ-نىڭ ادام قۇقىقتارى جونىندەگى جوعارعى كوميسسارى ناۆاتەنام پيللايمەن جانە بوسقىندار ءىسى جونىندەگى جوعارعى كوميسسارى انتونيو گۋتەرريشپەن ەكىجاقتى كەزدەسۋلەر وتكىزدى. ق.ساۋداباەۆتىڭ ن.پيللايمەن كەزدەسۋى بارىسىندا قازاقستاننىڭ جوعارعى كوميسسار باسقارماسىمەن ىنتىماق­تاس­تىق ماسەلەلەرى تالقىلاندى. ق.ساۋداباەۆ قازاقستان بۇۇ ادام قۇقىقتارى ءجو­نىن­دەگى كەڭەستىڭ قىزمەتىن شولۋدى قول­داي­تىنىن، ساياسي جانە ازاماتتىق قۇقىق­تار ءبىر جاعىنان، ەكونوميكالىق، الەۋ­مەت­تىك جانە مادەني قۇقىقتار ەكىنشى جاعىنان كەڭەس جۇمىسىندا بىردەي قولدانىس تابۋى قاجەت دەگەن ۇستانىمدى جاقتايتىنىن اتاپ ءوتتى. ق.ساۋداباەۆ اڭگىمەلەسۋشى تاراپتى ءبىزدىڭ ەلىمىزدىڭ ادام قۇقىقتارىن قورعاۋ جۇيەسىن نىعايتۋ جونىندەگى، ازامات­تا­رى­مىزدىڭ ساپالى ءبىلىم الۋعا، دەنساۋلىق ساقتاۋعا، الەۋمەتتىك ماسەلەلەردى شەشۋگە نەگىزگى قۇقىقتارىن قامتاماسىز ەتۋ جونىندەگى اتقارىلىپ جاتقان جۇمىس­تارىمەن تانىستىردى. ءوز كەزەگىندە ن.پيللاي قازاقستانمەن ىنتىماقتاستىق دەڭگەيىنە، اتاپ ايتقان­دا، ادام قۇقىقتارىن قورعاۋ جۇيەسىن ءارى قا­راي جەتىلدىرۋ جونىندە پرەزيدەنت ن.نا­زارباەۆتىڭ باستاماسىمەن قابىل­دا­نىپ وتىرعان شارالاردىڭ دەڭگەيىنە جوعارى باعا بەردى. ول قازاقستاننىڭ الدىڭعى جىلى امبەباپ كەزەڭدىك شولۋدى ءساتتى ۇيىمداستىرىپ، ونىڭ ناتيجەسى بويىنشا قۇقىق قورعاۋ قىزمەتىن ودان ءارى جەتىلدىرۋ بويىنشا 120 ۇسىنىس قابىلداعانىن اتاپ ءوتتى. قازىرگى كەزدە اتالعان ۇسىنىستاردى جۇزەگە اسىرۋ بويىنشا جۇمىس توبى قۇرىلىپ، قىزمەتىن اتقارۋدا. ن.پيللاي ەلىمىزدىڭ ەقىۇ-داعى ءتور­اعالىعىنىڭ ناتيجەسىنە، توزىمدىلىك ءما­سە­لەلەرىنە باسىمدىلىعىنا جوعارى باعا بەرىپ، وسى ورايدا يسلام كونفەرەن­تسياسى ۇيىمىنا توراعالىعىمىزدان ۇلكەن ءۇمىت كۇتەتىنىن جەتكىزدى. ودان سوڭ، قازاقستان مەن بۇۇ جو­عارعى كوميسسار باسقارماسى اراسىنداعى ىنتىماقتاستىقتىڭ دامۋى ق.ساۋدا­باەۆتىڭ جوعارعى كوميسسار ا.گۋتەرريشپەن كەزدەسۋىندە ءسوز بولدى. ا.گۋتەرريش ءوزىنىڭ جاقىندا بولعان قازاقستانعا ساپارىنا قاناعاتتانعانىن، سونىڭ ىشىندە ەلباسى ن.نازارباەۆپەن كەزدەسۋىنە كوڭىلى تولعانىن ايتىپ ءوتتى. «ءبىز قازاقستاننىڭ باسقارمامەن تىعىز بايلانىس ورناتىپ وتىرعانىنا، سونداي-اق بوسقىنداردىڭ وتىنىشتەرىن رەتتەۋگە باعىتتالعان بىرقاتار زاڭ وزگەرىستەرىن ەنگىزگەنىنە ريزاشىلىعىمىزدى بىلدىرەمىز»، – دەدى ءوز سوزىندە ا.گۋتەرريش. اڭگىمەلەسۋشى تاراپتار الداعى ىن­تى­ماقتاستىقتىڭ ناقتى باعىتتارىن، اتاپ ايت­قاندا، كوكتەمدە الماتىدا بوسقىن­داردىڭ وتىنىشتەرى ماسەلەلەرى جونىندە حالىقارالىق ايماقتىق كونفەرەنتسيا ۇي­ىمداستىرۋ ماسەلەلەرىن تال­قىعا سالدى. ق.ساۋداباەۆ بۇۇ-نىڭ جەنەۆاداعى بولىمشەسىنىڭ باس ديرەكتورى، بۇۇ باس حاتشىسىنىڭ ورىنباسارى سەرگەي وردجونيكيدزەمەن كەزدەسۋى بارىسىندا ەكى­جاقتى قارىم-قاتىناس ماسەلەلەرىن، سونى­مەن قاتار، قازاقستاننىڭ بۇۇ قىز­مەتىنە قاتىسۋى، سونىڭ ىشىندە قارۋ­سىز­دانۋ، وركەنيەتتەر ۇنقاتىسۋى، ايماقتىق ىنتىماقتاستىق سالالارى اياسىندا ءوزارا ىقپالداسۋ ماسەلەلەرىن تالقىلادى. بۇۇ جەنەۆاداعى بولىمشەسىنىڭ استانا باستامالارىنا بارىنشا قولداۋ كورسەتىپ وتىرعانىنا العىسىن بىلدىرە وتىرىپ، ق.ساۋداباەۆ ءارى قاراي ۇيلەس­تىرىلگەن ءوزارا ىقپالداستىقتى جالعاس­تىرۋدىڭ ورتاق ماقساتتارعا جەتۋدە ماڭىزى زور ەكەنىن اتاپ ءوتتى. اڭگىمە بارىسىندا تاراپتار ءوزارا ىقپالداستىقتىڭ، حالىقارالىق جانە اي­ماقتىق ساياساتتىڭ وزەكتى ماسەلەلەرىن قوزعادى. سونىڭ ىشىندە سولتۇستىك افريكاداعى ماسەلەلەر جانە ونى رەتتەۋدە حالىقارا­لىق ۇيىمدار تاراپىنان قابىلدانىپ جاتقان شارالار ءسوز ەتىلدى.
سوڭعى جاڭالىقتار

شىڭعىستاۋدىڭ شاكىرى

ادەبيەت • كەشە

جانى ىزگى جۋرناليست

ەگەمەن قازاقستان • كەشە

ۇقساس جاڭالىقتار