02 ناۋرىز، 2011

اتقارىلار ىستەر ارناسى كەڭ

238 رەت كورسەتىلدى
كەشە ورال قالاسىندا قازاقستان رەسپۋبليكاسى مەن رەسەي فەدەراتسياسى اۋىل شارۋاشىلىعى مينيسترلىكتەرىنىڭ بىرلەسكەن القا ءماجىلىسى وتكىزىلدى. وندا كەدەندىك وداق جاع­دايىندا اۋىل شارۋاشىلىعى سەكتورىنداعى ينتەگراتسيا­لىق ءۇردىستى دامىتۋ، ۆەتەرينارلىق قىزمەت پەن ۆەتەرينار­لىق باقىلاۋ جۇيەسىن جاقسارتۋ جانە اتالعان كەدەندىك وداققا كىرەتىن مەملەكەتتەر اراسىندا ەت ءوندىرىسىن وڭ جولعا قويۋ ماسەلەلەرى تالقىلاندى. القا ماجىلىسىندە قازاقستان رەسپۋبليكاسى پرەمەر-مينيس­ترىنىڭ ءبىرىنشى ورىنباسارى ءومىر­زاق شوكەەۆ الدىن الا وي­لاستىرىلعان بۇل القالى باس­قو­سۋ كەدەندىك وداقتىڭ ءبىرىنشى كەزەڭىنىڭ قورىتىندىلارىنا ار­نالىپ وتىرعانىن ايتتى. ءارى بۇل باسقوسۋ ەكى ەلدىڭ اگرارلىق ۆەدوموستۆولارى الدىندا تۇر­عان مىندەتتەردى بىرلەسىپ شەشۋگە ءتيىستى ىقپال جاساي الا­تى­نىن جەتكىزدى. ءوز كەزەگىندە قازاقستاندىق ارىپتەسىنىڭ وي-پىكىرىن جالعاس­تىر­عان رەسەي ۇكىمەتى توراعا­سى­نىڭ ءبىرىنشى ورىنباسارى يگور شۋۆالوۆ كەدەندىك وداق جۇيەسى بيىلعى 2011 جىلدىڭ 1 شىلدەسىنەن ءوزىنىڭ تولىق فور­ماتىنا كوشەتىنى تۋرالى ايتىپ، بۇل ىستە قازىرگە دەيىن تۇبەگەيلى شەشىمىن تابا الماي كەلگەن ماسەلەلەردى وسى جولى ءبىرجولاتا رەتتەپ الۋدى ۇسىندى. – قازىر بۇكىل الەمدە ازىق-ت ۇلىك قاۋىپسىزدىگى تاقىرىبى دۇركىن-دۇركىن كوتەرىلىپ ءجۇر، – دەدى بۇدان ءارى يگور يۆانوۆيچ. – كەدەندىك وداق قۇرامىنا كىرگەن ەلدەر، سونىڭ ىشىندە ەجەلدەن ءوزارا بايلانىستارى تاريحي تۇرعىدان دامىپ قالىپتاسىپ كەلگەن رەسەي مەن قازاقستان بۇل ماسەلەنى بىرلەسىپ شەشۋگە قابىلەتتى دەپ ويلايمىن. بۇل ەكى كورشىلەس ەل اسىرەسە استىق پەن ەت وندىرۋدە الەمدەگى ءىرى جابدىقتاۋشىلار بولىپ تابى­لا­دى. ساپالى ءونىم وندىرۋگە قول جەتكىزۋدىڭ باستى كىلتى – ۇزدىك الەمدىك ستاندارتتار مەن بۇگىنگى زامانعى تەحنولوگيا. مىنە، وسىنداي ينتەگراتسيالىق تالاپتار ۇردىسىندە ءبىز ءبىر-ءبىرى­مىزدى قولداۋ تەتىكتەرىن قالاي ورنىقتىرا الامىز؟ – دەپ ساۋال تاستادى ي.ي.شۋۆالوۆ. بۇدان ءارى باسقوسۋدا بۇل ساۋالعا جاۋاپ رەتىندە – ونىڭ باستى جولى بىرىڭعاي كورپوراتيۆتىك جانە اقپاراتتىق جۇيەنى ەنگىزۋ ەكەندىگى ايتىلدى. بۇل ەكەۋى جەتىسپەگەن جاعدايدا الدا تۇرعان ورتاق ماسەلەلەر دە تۇبەگەيلى شەشىمىن تابا الماس ەدى. القا ماجىلىسىندە جاسالعان ءبىر ءتۇيىن وسىنداي. جيىندا ايتىلعانداي ەكى ەل اراسىندا اقپاراتتار الماسۋدىڭ ءبىرىڭ­عاي ەرەجەلەر جۇيەسى بەكىتىلمەگەن. بۇل ورتاق ىسكە كەدەرگى كەلتىرىپ، قولبايلاۋ تۋعىزادى. سون­دىقتان دا ەكى جاقتى ءتيىمدى اقپاراتتىق جۇيەنىڭ ورنىعۋى ءۇشىن كورشى مەملەكەتتەردىڭ وكىلەتتى ۆەدوموستۆولارى قىسقا ۋاقىتتىڭ ىشىندە بارلىق ءمۇم­كىندىكتى پايدالانىپ بۇل ءىستى اياعىنا دەيىن جەتكىزۋگە ءتيىس. ماجىلىستە رەسەي فەدەرا­تسيا­سى مەن قازاقستان رەسپۋب­ليكاسى اۋىل شارۋاشىلىعى مينيسترلەرى ەلەنا سكرىننيك پەن اقىلبەك كۇرىشباەۆ مال شارۋاشىلىعى مەن ۆەتەرينار­لىق قىزمەتتى جاقسارتۋ، بۇل باعىتتاعى ءوزارا بايلانىس­تاردى دامىتۋ جونىندەگى ءوز وي-پىكىرلەرىن ورتاعا سالدى. القا ماجىلىسىندە رەسەيلىكتەر «قازاگرو» اق باسقار­ما­سى­نىڭ توراعاسى اسىلجان ما­مىت­بەكوۆتىڭ ساپالى ەت ءوندىرىسى، ءارى ونى ەكسپورتقا شىعارۋ ءجو­نىندەگى قازاقستاندىقتاردىڭ تاجىريبەسىنە مۇددەلىلىكپەن قۇ­لاق ءتۇردى. سونداي-اق كورشى­لەردى باتىس قازاقستان وبلى­سىنداعى 8640 باس ءىرى قارانى بورداقىلاۋعا ارنالعان ەت ءون­دىرۋ كەشەنى تاجىريبەسى دە قىزىقتىرعانى انىق بايقالدى. مۇنىڭ باستى ارتىقشىلىعى شىعىندى بارىنشا از جۇمساۋ ارقىلى – ساپالى ءارى باعاسى يمانتارازى ءونىم وندىرۋگە با­عىت ۇستالۋىندا. مۇندا نەگىزگى شىعىندار گەنەتيكالىق قوردى جاقسارتۋ مەن جەمشوپتىك با­زانى جەتىلدىرۋگە جۇمسالماق. قازاقستاندا مۇنداي جوعارى تەحنولوگيامەن جۇمىس جاساۋعا لايىقتالعان كەشەندەر ءوندىرىسى ون ساۋساقتىڭ سانىنا تەڭ، – دەپ اتاپ كورسەتتى اسىلجان سارى­باي ۇلى. رەسەي مەن قازاقستان اۋىل شارۋاشىلىعى مينيسترلىكتەرى­نىڭ بىرلەسكەن القا ماجىلىسىندە تالقىلانعان ماسەلەلەرگە وراي ءتيىستى شەشىم قابىلداندى. تەمىر قۇسايىن. ورال.
سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار