ەندى بىزدە ميۋزيكل دە بار!

ەلوردادا «استانا ميۋزيكل» تەاترى اشىلدى وسىدان 11 جىل بۇرىن, نيۋ-يوركتە, برودۆەيدە «مامما-ميانى»  كورگەن ەدىم. جوق, دۇرىسى – كورۋ باقىتىنا يە بولىپ ەدىم. ودان كەيىن ماسكەۋدە «چيكاگونى» تاماشالاعانمىن. سول كەزدەن ميۋزيكل بىزگە قاشان كەلەر ەكەن دەپ ويلاپ, ءتىپتى, ارمانداپ جۇرەتىنمىن. «دوستار سەرتى» ميۋزيكلىنىڭ قويىلۋى سول كۇنگە ءبىزدىڭ  دە جاقىنداعانىمىزدى كورسەتەدى. ءيا, جاقىنداعانىمىزدى. ويتكەنى, ميۋزيكل نەگىزىنەن وپەرەتتا جانرى وركەندەگەن جەردە عانا كوڭىلدەگىدەي دامىسا كەرەك. ال قازاق توپىراعىندا وپەرەتتا وركەندەمەك تۇرماق, قازىرشە جوندەپ قالىپتاسقان دا جوق. دەگەنمەن, استانادا قويىلعان «دوستار سەرتى» شىن مانىندە بەتبۇرىستىق وقيعا بولدى دەي الامىز. ەندى بىزدە ميۋزيكل دە بار! ءبارى دە جاقسى. مۋزىكا دا, بي دە, رەجيسسۋرا دا, بەزەندىرۋ دە. جاستاردىڭ داۋىسى, قيمىل-قوزعالىسىنداعى ۇيلەسىمدىلىك, ەكسپرەسسيا, كوستيۋمدەر جانىڭدى جارىق نۇرعا بولەيدى, الىستا قالعان جاستىق شاعىڭا الىپ كەتىپ, ءومىردىڭ سۇلۋلىعىن كەلىستى كورسەتەدى. تەك ءبىر اتتەگەن-ايى – شىعارمانىڭ دراماتۋرگيالىق ارقاۋى بوساڭداۋ. توي ساتىنەن كەيىن تاعى ءبىر سىناقتار الدان شىعۋعا, جاستاردىڭ دوستىعى ول سىناقتاردان دا وتۋگە ءتيىس ەدى. درامالىق كولليزيا مۋزىكالىق كومەدياعا دا ارتىقتىق ەتپەيدى. ال مۇندا ءبارى تىم جايماشۋاق شەشىلە قالادى. دەگەنمەن, بۇل ايتىلعاننىڭ ەلدىڭ باس قالاسىنا كوشىپ كەلىپ جاتقان «قازاقكونتسەرتتىڭ» جاس ارتيستەرىنە, تالانتتى رەجيسسەر ەسلام نۇرتازينگە, حورەوگرافياعا ەش قاتىسى جوق. ولار جاقسى تۋىندى قولعا تيسە جاندىرىپ جىبەرەتىنىن ناقتى كورسەتتى. شىن مەرەكە سىيلادى جۇرتشىلىققا. تاعى ءبىر ەسكەرەتىن جاي – ەرەكشە ساحنا, ارناۋلى ەففەكتىلەر تەك ستاتسيونارلىق ميۋزيكل جاعدايىندا عانا ويداعىداي شىعاتىندىعى. ال بۇل ءۇشىن «دوستار سەرتىن» ۇدايى ءبىر ساحنادا قويۋ, قاجىماي-تالماي ناسيحاتتاۋ, جاپپاي جارنامالاۋ, كورەرمەندەردى ءالى كوز ۇيرەتە قويماعان جانردى جاتسىنبايتىنداي ەتۋ, ياعني وتە اۋقىمدى ۇيىمداستىرۋ جۇمىسى كەرەك. سوندا «دوستار سەرتى» كۇنى ەرتەڭ-اق ءبىزدىڭ ەكسپو-2017 قوناقتارىنا ۇيالماي ۇسىناتىن تارتۋىمىزعا اينالادى. شەتەلدىك قوناقتاردى استانادا ميۋزيكل بار ەكەندىگىنىڭ ءوزى قىزىقتىرماي قوي­مايتىنى انىق. ساۋىتبەك ابدراحمانوۆ, ءماجىلىس دەپۋتاتى