قوشەمەت قۇشاعىندا

اكەلى-بالالى كومپوزيتورلار ايتقالي جانە ارمان جايىموۆتار كونگرەسس-حولل سارايىندا وتكەن ايتقالي جايىموۆ پەن ونىڭ ۇلى ارمان جايىمنىڭ شىعارماشىلىق كەشىندە كورەرمەندەردى دارىندى ونەر يەلەرىنىڭ كۇردەلى مۋزىكالىق تۋىندىلارى ءتانتى ەتتى. كونتسەرتتىڭ شىمىلدىعى تۇرىلگەن كەزدە قازاق حالىق اسپاپتارى وركەسترى­نىڭ كوركەمدىك جەتەكشىسى ءارى باس ديريجەرى, قازاقستان رەسپۋبليكاسىنىڭ ەڭبەك سىڭىرگەن قاي­راتكەرى, پروفەسسور ايتقالي جايىموۆ قازاقتىڭ قوڭىر دومبى­راسىن قولىنا الىپ, ساحناعا شىق­تى. ول ءوزىنىڭ ەل تاۋەلسىزدىگىنە ارنا­عان «ەركىن ەل», «ءومىر-وزەن» جانە دينا نۇرپەيىسوۆاعا ارناعان «كۇي-انا» كۇيلەرىن ورىن­داعان­دا, كورەر­مەن­دەر ۇزاق قول سوعىپ, قوشەمەت ءبىلدىردى. وسى كەشتە ەلوردا تۇرعىندارى مەن قوناقتارى كلاسسيكالىق شىعارما­لاردى سۇيسىنە تىڭدادى. تەرەڭ سەزىمگە بوي­لايتىن, بىرنەشە بولىمنەن تۇراتىن شىعارمالاردى تىڭداعان جۇرتشىلىق حاس ونەردى جوعارى باعالاپ, شىنايى قۇرمەت كورسەتتى. ايتالىق, عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى ارمان جايىمنىڭ كۆارتەتكە ارنالعان ءتورت ءبولىمدى №1 كونتسەرتىن ورىندادى. سونداي-اق, كورەرمەن نازارىنا قوس كومپوزيتور بىرلەسىپ جازعان «بەيبارىس» وپەراسىنان ءۇزىندى ۇسىنىلدى. وسى ورايدا, قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆتىڭ ورىنداۋىنداعى بەيبارىستىڭ ارياسى ءساتتى شىقتى. ال قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق ايدانانىڭ ارياسىن ناقىشىنا كەلتىرە شىرقادى. حالىقارالىق كونكۋرستاردىڭ لاۋ­رەاتى شاحريزادا تىنىشتىق «تولە بي» كان­تاتاسىنان «قارلىعاشتىڭ ءانىن» ورىن­داپ بەردى. قوبىزشى بوتاگوز ءتاشىموۆا وركەستردىڭ سۇيەمەلدەۋىمەن ارمان جايىمنىڭ قوبىزعا ارنالعان كون­تسەرتىن ۇسىندى. سونىمەن قاتار, كەي­بىر شىعارمالاردى ارلەپ, «شالقىما» حالىق بي ءانسامبلى دە ونەر كورسەتتى. «بۇل ءبىزدىڭ ەل تاۋەلسىزدىگىنىڭ 25 جىل­دىعىنا ارناعان كونتسەرتىمىز. سوندىقتان دا «شاتتىق ەلى» دەپ اتالدى. كونتسەرتكە كەلىپ, قازاق حالىق اسپاپتارى وركەسترىنە جانە وزگە دە ونەر كورسەتكەن ازاماتتارعا قوشەمەت بىلدىرگەن كورەرمەندەرگە ۇلكەن ريزاشىلىعىمىزدى بىلدىرەمىز», – دەدى ايتقالي جايىموۆ. كونتسەرت بارىسىندا استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ قازاق حالىق اس­پاپ­تارى وركەسترى قالىپتاسقان ونەر ۇجى­مى ەكەنىن ايقىن بايقاتتى. نەبىر كۇردەلى كۇيلەردى, باسقا دا مۋزىكا­لىق تۋىندىلاردى اسقان شەبەرلىكپەن جەتكىزە ءبىلدى. «ەگەمەن-اقپارات»