ۇستازداردىڭ «ۇزدىك اۆتورلىق باعدارلاماسى»

الماتىدا ءداستۇرلى «ۇزدىك اۆتورلىق باعدارلاما» رەسپۋبليكالىق بايقاۋى مارەگە جەتىپ, توپجارعان ۇستازدار ماراپاتتالدى. بايقاۋدى «دارىن» رەسپۋبليكالىق عىلىمي-پراكتيكالىق ورتالىعى پەدا­گوگيكالىق ماماندىقتىڭ مارتەبەسىن كوتەرۋ, دارىندى بالالارعا ارنالعان ءبىلىم بەرۋ ۇيىمدارى مۇعالىمدەرىنىڭ يننوۆاتسيالىق-پەداگوگيكالىق قىز­مەتىن دامىتۋ ماقساتىندا جىل سايىن وتكىزىپ كەلەدى. بۇل جىلعى بايقاۋعا كورنەكىلىك جۇمىستارى ەكىنشى ىرىكتەۋ كەزەڭىنەن وتكەن وبلىستىق ءبىلىم باس­قارماسى مەن دارىندى بالالارمەن جۇمىس جاسايتىن ايماقتىق عىلىمي-پراكتيكالىق ورتالىقتارىنىڭ وكىل­دەرى جانە دارىندى بالالارعا ارنالعان مامانداندىرىلعان ءبىلىم بەرۋ ۇيىمدارىنىڭ مۇعالىمدەرى قاتىستى. كونكۋرستىڭ العاشقى ساتىسىندا ەلىمىزدىڭ بارلىق ايماقتارىنان 309 جوبا ۇسىنىلعان بولاتىن. ونىڭ ىشىندە مەكتەپ مۇعالىمدەرىنەن 65 كوماندالىق جۇمىس تاپسىرىلعان ەكەن. ساراپتاۋ كوميسسياسىنىڭ شەشىمى بويىنشا 171 جوبا, ونىڭ ىشىندە 40 كوماندالىق جوبا قورىتىندى كەزەڭگە جولداما العان-دى. قورىتىندى كونكۋرستا ءار ءتۇرلى باعىت بويىنشا پەداگوگتار 9 سەكتسيادا جۇمىس جاسادى. قازىلار القاسىنىڭ شەشىمى بويىنشا «دارىن» رەسپۋبليكالىق عىلىمي-پراكتيكالىق ورتالىعىنىڭ نوميناتسيالارى بويىنشا 37 جۇمىس جەڭىمپاز دەپ تانىلىپ, ءبىلىم جانە عىلىم مينيسترلىگىنىڭ ءى دارەجەلى ديپ­لومدارىمەن 12 جوبا, ءىى دارەجەلى ديپ­لومدارمەن 24 جوبا جانە ءىىى دارەجەلى ديپلومدارمەن 34 جوبا ماراپاتتالدى. قالماحانبەت مۇقامەتقالي, «ەگەمەن قازاقستان» الماتى