وسى كۇندەرى بۇكىلالەمدىك بوكس سەرياسى بويىنشا كاسىپقوي بوكستان ازيا, ەۋروپا, امەريكا قۇرلىقتارىندا ءۇش توپقا ءبولىنگەن 12 كوماندانىڭ اراسىندا وليمپياداعا جولداما بەرەتىن جارىستار جالعاسۋدا.
وعان ازيا قۇرلىعىنان قاتىسىپ جاتقان «Astana arlans» (قازاقستان), «Poseidons pohang» (كورەيا), «Beijing dragons» (قىتاي) پەن «Baku fires» ء(ازىربايجان) كوماندالارى جەكسەنبى كۇنى كەزەكتى جەكپە-جەكتەرىن وتكىزدى. وسى كۇنى «Baku fires» بوكسشىلارى وڭتۇستىككورەيالىق كوماندانى قابىلداپ, 5:0 ەسەبىمەن باسىم تۇسسە, سول كۇنى استاناداعى «ءداۋلەت» سپورت كەشەنىندە كەرىلگەن شارشى الاڭدا «استانا ارلاندارى» قىتايلىق «ايداھارلارمەن» كەزدەسىپ, ولاردى ءدال وسىنداي ەسەپپەن جەڭدى. بۇل كەزدەسۋدە قازاقستان جاعىنان شارشى الاڭعا شىققان 54 كگ. سالماقتاعى ءمىرجان راقىمجانوۆ, ەرجان ءمۇساپىروۆ (61 كگ.), قانات ءسىلام (73 كگ.), مارات مولداگەرەەۆ (85 كگ.) جانە ەڭ اۋىر سالماقتاعى ساردور ابدۋللاەۆ قارسىلاستارىن ايقىن باسىمدىلىقپەن ۇتتى. وسى جەكپە-جەكتەردىڭ ىشىندە ەڭ قىزىقتىسى 61 جانە 73 كگ. سالماقتاعى بوكسشىلاردىڭ كەزدەسۋى بولدى. «استانا ارلاندارىندا» العاشقى كەزدەسۋىنەن باستاپ مامانداردىڭ كوزىنە تۇسكەن ەرجان ءمۇساپىروۆ بۇل جولى دا جانكۇيەرلەردىڭ ءۇمىتىن اقتادى. بۇعان دەيىن ءتورت جەكپە-جەكتىڭ ءبارىن تازا ۇتقان ەرجان قىتايلىق فانگ ءليدىڭ بەس راۋند بويى ەكى اياعىن ءبىر ەتىككە تىقتى دەسە بولادى. ءسويتىپ, كەزدەسۋدىڭ ءۇشىنشى راۋندىنان باستاپ ءتورت بۇرىشقا تىعىلا باستاعان ءليدى ءمۇساپىروۆ قۋىپ ءجۇرىپ سابادى. قىسقاسى, ەرجانعا قىتايلىق بوكسشى لايىقتى قارسىلىق تانىتا المادى. وسى جەكپە-جەككە دەيىن بۇكىلالەمدىك بوكس سەرياسى كوماندالىق ليگاسىنىڭ رەيتينگىندە ەكىنشى ورىندا تۇرعان ءمۇساپىروۆ وسى جەڭىستەن كەيىن ءوز ورنىن ساقتاپ قالادى دەپ ويلايمىز. بۇدان كەيىن شارشى الاڭعا كوتەرىلگەن قانات سىلامعا وڭتۇستىك امەريكانىڭ ەڭ ۇزدىك بوكسشىسى ليما پەدرومەن قولعاپ تۇيىستىرۋگە تۋرا كەلدى. بۇل كەزدەسۋدىڭ الدىندا رەيتينگىدە 19-شى ورىنعا جايعاسقان قانات ءبىر قارسىلاسىنان جەڭىلىپ, ەكىنشىسىن ۇتقان بولاتىن. ال ليما پەدرونىڭ رەيتينگىسى ءۇشىنشى ورىن, ونىڭ ۇستىنە ول ءتورت رەت قارسىلاستارىنىڭ ءبارىن تىزە بۇكتىرگەن ەدى. بىراق, وسى جەكپە-جەكتە برازيليالىق بوكسشىعا جەڭىستىڭ ءدامىن تاتۋعا بۇيىرمادى. ءبىزدىڭ قانات ءبىرىنشى راۋندتان باستاپ وزىنە سەنىمدى ەكەنىن, وزىنە قارسى كەلگەن بوكسشىلاردىڭ ءبارىن وڭدىرماي ۇتۋعا تىرىساتىنىن كورەرمەندەرگە كورسەتىپ بەردى. ءسويتىپ, كەزدەسۋدە تورەشىلەردىڭ ءبارى قاناتتىڭ ءسوزسىز جەڭگەنىن مويىنداپ, جەڭىستى قانداسىمىزدىڭ قولىنا ۇستاتتى.
وسى كەشتە 85 جانە اسا اۋىر سالماقتا قولعاپ تۇيىستىرگەن مارات مولداگەرەەۆ پەن ءبىزدىڭ كوماندا ساپىندا جۇرگەن وزبەكستاندىق ساردور ابدۋللاەۆ ەل قورجىنىنا تاعى ەكى جەڭىستى سىيلادى.
ەندى «استانا ارلاندارى» كەلەسى كەزدەسۋىن 12 ناۋرىز كۇنى ءازىربايجاندىق كوماندامەن, ال 19 ناۋرىزدا كورەيالىق بوكسشىلارمەن وتكىزەدى.
داستان كەنجالين.
سۋرەتتەردى تۇسىرگەن: ورىنباي بالمۇرات.
