ۇلتتىڭ باسىنا تۇسكەن ناۋبەت زاماندا اناسىمەن وزبەكستانداعى ناعاشىلارىنىڭ قولىنا وتكەن سابىر راقىموۆتى كوپكە دەيىن كورشى وزبەك حالقى مەنشىكتەپ كەلگەن. ۇلت اسىلى ءوز ەلىندە ارداقتالۋى كەرەك. جاقىندا ونوماستيكالىق كوميتەتتىڭ ۇسىنىسىمەن قالا ورتالىعىنداعى شاراف راشيدوۆ كوشەسى ەندى سابىر راقىموۆ كوشەسى بولىپ وزگەردى. قالا اكىمى ا.جەتپىسباەۆتىڭ وسى شەشىمىنە تۇرعىندار رازىلىقتارىن ءبىلدىرىپ جاتىر.
باقتيار تايجان. شىمكەنت.
ەۋروپا وكىلدەرى وڭىردە بولدى. ەۋروپا قۇرلىعىنداعى ەڭ ۇلكەن ساياسي پارتيا سانالاتىن حالىقتىق پارتيا دەلەگاتسياسى قاراعاندىعا ارنايى كەلىپ, وبلىستاعى پارتيالار مەن قوزعالىستار, ۇكىمەتتىك ەمەس ۇيىمدار جەتەكشىلەرىمەن كەزدەستى. مەيمانداردى وبلىس اكىمى سەرىك احمەتوۆ قابىلداپ, ايماقتىڭ ەكونوميكالىق-الەۋمەتتىك جاعدايىمەن تانىستىردى. دەلەگاتسيا مۇشەلەرى قازاقستاندا قانداي يگىلىكتى جۇمىستار اتقارىلىپ جاتقانىنان حاباردار ەكەندىگىن ايتتى. ەۋروپانىڭ 26 ەلىنىڭ 45 ساياسي پارتياسى ۇجىمدىق مۇشە رەتىندە تارتىلعان ۇيىمنىڭ مەملەكەتتەر اراسىنداعى بايلانىستى نىعايتۋ, دەموكراتيالىق ۇردىستەردى تەرەڭدەتۋ باعىتىنداعى ءىس-شارالارى باياندالدى. الداعى ۋاقىتتا مۇنداي كەزدەسۋلەردى جيىرەك وتكىزىپ تۇرۋعا نيەت ءبىلدىرىلدى.
ايقىن نەسىپباي. قاراعاندى.
اڭگىمە وزەگى – قازاقستاندىق ۇلەس. وبلىستىق اكىمدىك, «نۇر وتان» حدپ-نىڭ وبلىستىق فيليالى جانە «NADLoG» جەرگىلىكتى ۇلەستى دامىتۋ جونىندەگى ۇلتتىق اگەنتتىگى» اق ەلباسىنىڭ جانە ۇكىمەتتىڭ تاۋارلاردى, جۇمىستاردى جانە قىزمەتتەردى ساتىپ الۋداعى قازاقستاندىق ۇلەستى ارتتىرۋ بويىنشا تاپسىرمالارىن جۇزەگە اسىرۋ اياسىندا قازاقستاندىق ۇلەستى دامىتۋعا ارنالعان ايماقتىق فورۋم وتكىزدى. فورۋمدا كومپانيالاردىڭ كەلىسىم-شارتتاردى ورىنداۋ, «تابيعات پايدالانۋ وپەراتسيالارىن جۇرگىزۋ جانە ولاردى ءوندىرۋ كەزىندە پايدالانىلاتىن تاۋارلار, جۇمىستار جانە قىزمەتتەر ءتىزىمى» اقپاراتتىق جۇيەسىنىڭ ەرەكشەلىكتەرى, قازاقستاندىق ۇلەستى ەسەپتەۋ ادىستەمەسىن جەتىلدىرۋ ماسەلەلەرى تالقىلاندى. ايماقتىق فورۋم شەڭبەرىندە تاۋار وندىرۋشىلەردىڭ كورمەسى ۇيىمداستىرىلدى. كورمەدە 40 كاسىپورىن ءوز تاۋارلارىن, قىزمەتتەرىن ۇسىندى.
ساتىبالدى ءساۋىرباي. اقتوبە وبلىسى.
ايتباەۆتار اۋلەتىنىڭ ءان كەشى. قىزىلجار وڭىرىندە تاۋەلسىزدىكتىڭ 20 جىلدىعىنا ارنالعان مادەني شارالار باستالىپ كەتتى. ونىڭ شىمىلدىعىن ايتباەۆتار اۋلەتى اشتى. بۇل ونەرپاز وتباسىنى رەسپۋبليكا جۇرتشىلىعى جاقسى تانيدى. اعايىندى ەربول, جانات, تالعات, قايرات – ءان مەن كۇيدەن ءتۇرلى كونكۋرستاردىڭ لاۋرەاتتارى. استاناداعى ونەر اكادەمياسىنىڭ تۇلەگى, قايرات بايبوسىنوۆتىڭ شاكىرتى جانات 7 جىلدان بەرى ماعجان ەلىندە قازاقتىڭ ءداستۇرلى ءانىن تالماي ناسيحاتتاپ كەلەدى. وسى جىلدار ىشىندە «شابىت» حالىقارالىق فەستيۆالىنىڭ لاۋرەاتى اتانىپ, ەستاي بەركىمباەۆ اتىنداعى ءى رەسپۋبليكالىق بايقاۋدىڭ جۇلدەسىن جەڭىپ الدى. ول ءوزىنىڭ العاشقى شىعارماشىلىق كەشىن بيىل كەڭىنەن اتالىپ وتەتىن ەل مەرەيتويىنا ارنادى. ونەرسۇيەر قاۋىم قايتا-قايتا قول سوعىپ, وعان ۇلكەن قوشەمەت كورسەتتى.
ءومىر ەسقالي. سولتۇستىك قازاقستان وبلىسى.
ەكولوگيالىق اعارتۋ ورتالىعى. اتىراۋدا «اقجايىق» مەملەكەتتىك تابيعي رەزەرۆاتى جۇمىس جاساعالى كوپ بولا قويعان جوق. دەگەنمەن, مۇنداي رەزەرۆاتتىڭ قاجەتتىگى بايقالىپ وتىر. ويتكەنى, رەزەرۆات ديرەكتورى ەلەمەس راحمەتوۆتىڭ ايتۋىنشا, جۇرتشىلىقتىڭ ەكولوگيالىق مادەنيەتىن ارتتىرۋعا باسىم باعىت بەرىلگەن. وتكەن اپتادا رەزەرۆات باسشىلىعى جايىق-كاسپي سۋ باسسەينىنىڭ ساعالىق اتىرابى مەن جاعالاۋىندا بالىق شارۋاشىلىعىن تۇراقتى دامىتۋ ستراتەگياسىن جۇرتشىلىققا تانىستىردى. بۇل باسقوسۋدا ەرەكشە قورعالاتىن تابيعي اۋماقتا ەكولوگيالىق ءتۋريزمدى دامىتۋدىڭ پەرسپەكتيۆالارى مەن پروبلەمالارى دا قوزعالدى. «قازىر اتىراۋ جانە باتىس قازاقستاننىڭ ەكولوگيالىق اعارتۋ ورتالىعىن اشۋدىڭ جۇمىستارى قولعا الىندى. ماقسات – ەرەكشە قورعالاتىن ايماقتاردى, سيرەك كەزدەسەتىن اڭ-قۇستاردى قورعاۋدى بارىنشا كەڭىنەن ناسيحاتتاۋ», دەيدى رەزەرۆات ديرەكتورى ەلەمەس راحمەتوۆ.
جولداسبەك شوپەعۇل. اتىراۋ وبلىسى.
تۋبەركۋلەزبەن كۇرەس توقتامايدى. دەنساۋلىق جانە سالاماتتى ءومىر سالتى ورتالىعى وبلىستا «تۋبەركۋلەزبەن كۇرەس توقتامايدى!» دەگەن اتپەن قۇرت اۋرۋىنا قارسى كەڭ اۋقىمدى اكتسيا باستادى. ويتكەنى, وسى جۇقپالى دەرتكە قارسى جۇمىس قانشا كۇشەيتىلگەنىمەن, ونى ءبىرجولاتا جويۋ مۇمكىن بولماي وتىر. دارىگەرلەر مەن ماماندار اكتسيا شەڭبەرىندەگى سەمينارلار مەن پايدالى كەڭەستەر بەرۋ جۇمىستارىن جاستاردان باستادى. ويتكەنى, بالالار مەن ەرەسەكتەرگە قاراعاندا جاسوسپىرىمدەر وسى قاۋىپتى دەرتپەن كوپ اۋىرادى. دارىگەرلەر جاستارعا جۇقپالى اۋرۋعا قارسى كۇتىنۋ, ونىڭ بەلگىلەرىن دەر ۋاقىتىندا انىقتاۋ جونىندە كەڭەستەر بەردى. وبلىستاعى تۋبەركۋلەزگە قارسى ەمدەۋ ورىندارىنىڭ جۇمىسىمەن تانىستىردى. اكتسيا ءبىر اي بويى جالعاساتىن بولادى.
ءنازيرا جارىمبەتوۆا. قوستاناي.
اپالى-سىڭلىلەر اۋىلعا بارادى. وتكەن اپتادا وبلىس ورتالىعىنداعى مەملەكەتتىك پەداگوگيكالىق ينستيتۋتتا جاس مامانداردى اۋىلعا شاقىراتىن باعدارلاما اياسىندا وقۋ ورنى مەن اۋداندار اكىمدىكتەرى اراسىندا كەزدەسۋلەر باستالدى. العاشقى بولىپ قالا ىرگەسىندە تۇرعان پاۆلودار اۋدانى وكىلدەرى كەلدى. ارينە, قالا ىرگەسىندە تۇرعان اۋىلدارعا بارۋعا جاستار ىنتالى. اۋداننىڭ 4 ستۋدەنتى اكىم گرانتىمەن ءبىلىم الۋدا. بىلتىر بۇل اۋدانعا 53 جاس مامان بارسا, بيىل دا دارىگەر, مۇعالىم, مال ماماندارى قاجەت كورىنەدى. سولاردىڭ اراسىندا مۇعالىم ماماندىعى ديپلومىن الاتىن اپالى-ءسىڭلىلى نۇرسۇلۋ, كۇنسۇلۋ قايىربەكوۆالار وزدەرى تۋىپ-وسكەن وسى اۋدانعا بارماقشى.
فاريدا بىقاي. پاۆلودار.
