قاراجات بارلىعىنا بىردەي بولىنەدى

26 اقپاندا ورتالىق سايلاۋ كوميسسياسىنىڭ وتىرىسى ءوتىپ, وندا قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ رەس­پۋب­ليكالىق بيۋدجەت قاراجاتىنان جابىلاتىن شىعىستارىنىڭ نورماتيۆتەرىن بەلگىلەۋ تۋرالى قاۋلى قابىلداندى. سايلاۋ زاڭناماسىنا سايكەس, مەملەكەت كانديداتتارعا ءوز باعدار­لا­مالارىمەن بۇقارالىق اقپارات قۇرالدارىنا شىعۋى ءۇشىن بىردەي قاراجات بولىنۋىنە كەپىلدىك بەرەدى. ءاربىر كانديداتتىڭ تەلەديداردان 15 ءمينوت ءسوز سويلەۋىنە, راديودان 10 ءمينوت ءسوز سويلەۋىنە, سونداي-اق باسپا باسىلىمدارىنا 0,1 باسپا تاباقتان اسپايتىن كولەمدە ەكى ماقالا جاريالاۋىنا قاراجات بەرىلەدى. كانديداتتارعا سايلاۋالدى ۇگىت جۇرگىزۋگە بولىنەتىن سومالاردى ەسەپتەۋدە بايلانىس جانە اقپارات مينيسترلىگى ۇسىنعان مالىمەتتەر نەگىزگە الىندى. بۇل رەتتە كانديداتتىڭ باعدار­لا­ماسىن تەلەديدار ارقىلى بايان­داۋى­نا 4 625 000 تەڭگە,   راديودان 10 ءمينوت سويلەۋگە ءاربىر كاندي­دات­قا 169 000  تەڭگە, ال باسپا باسى­لىم­دارىندا 540 شارشى سم. كو­لە­مىندە ەكى ماقالا جاريالاۋ ءۇشىن كانديداتتاردىڭ ارقايسىسىنا 810 000 تەڭگە بولىنەتىن بولادى. بۇدان باسقا كانديداتتارعا سايلاۋشى­لار­مەن كەزدەسۋلەر وتكىزۋ ءۇشىن ءۇي-جاي­لار جالداۋعا 200 000 تەڭگە, سونداي-اق باسپا ۇگىت ماتەريال­دا­رىن باسىپ شىعارۋعا 290 000 تەڭگە جانە تىركەلگەن ءاربىر كانديداتقا كولىك شىعىندارى ءۇشىن تاعى 200 000 تەڭگە قاراجات بولىنەدى. «ەگەمەن-اقپارات».