باقىتجان ساعىنتاەۆ ۇزىناعاش ءىسىن باقىلاۋعا الۋدى تاپسىردى

“قازىرگى ۋاقىتتا باق-تاردا قىلمىستار تۋرالى كوپ ايتىلىپ جاتىر. قىلمىسكەرلەردىڭ الماتى وبلىسىندا ۇستالعانى بەلگىلى بولدى, تەرگەۋ شارالارى ءجۇرىپ جاتىر. بۇل حالىقتى الاڭداتىپ وتىرعاندىقتان, بۇل جايىندا بىزگە مالىمەت بەرسەڭىز” دەدى ۇكىمەت باسشىسى ساعىنتاەۆ ىشكى ىستەر ءمينيسترى قالمۇحانبەت قاسىموۆقا. “20 قىركۇيەكتە بىزگە ءۇش ازاماتتىڭ الماتىعا مال ساتۋعا كەتىپ, جوعالىپ كەتكەنى جايلى حابار كەلىپ ءتۇستى. 21 قىركۇيەكتە ولاردىڭ ءبىر كولىگىن تاپتىق. ولار ەكى كولىكپەن 41 باس ءىرى قارانى الماتى وبلىسىنداعى بازارعا ساتۋعا اپارا جاتقان. 23 قىركۇيەكتە ەكىنشى كولىك تابىلدى” دەدى قالمۇحانبەت قاسىموۆ. “وسىدان كەيىن جەرگىلىكتى تۇرعىنداردىڭ بۇل كولىكتىڭ جۇرگىزۋشىلەرىنە كومەكتەسكەنى بەلگىلى بولدى, سويتسە ولار لاي-باتپاقتا تۇرىپ قالىپتى, كەيىن ول جەردە كىم بولعانى بەلگىلى بولدى. ولار جامبىل اۋدانىنىڭ تۇرعىندارى. وسى تۇلعالار ارقىلى قىلمىسكەرلەردى انىقتادىق, جامبىل اۋدانىنىڭ ەكى تۇرعىنىن انىقتادىق, ولار مال بازارعا بارا جاتىپ, وسى ساتۋشىلارعا جاقىنداعان. ءسويتىپ, ولاردان بارلىق مالىن ساتىپ الۋدى ۇسىنعان. ولاردى الداپ, القاپقا الىپ كەتىپ, قىلمىس جاساعان. مايىتتەر مەن مالدى جەتكىزۋ بارىسىندا ولاردىڭ كولىگى توقتاپ قالعان, سوندىقتان ولار جەرگىلىكتى تۇرعىنداردان كومەك سۇراعان. قازىرگى ۋاقىتتا قىلمىسكەرلەر ۇستالدى, كىسى ولتىرۋگە قولدانىلعان قارۋ تاركىلەندى, قىلمىسكەرلەر مايىتتەردى قايدا كومىپ كەتكەنىن ءوز قالاۋىمەن كورسەتىپ بەردى. قاجەتتى ساراپتامالار تاعايىندالدى. بۇگىن جەرلەۋ ءراسىمى وتەدى. 36 باس ءىرى قارا تاركىلەندى. ءىستى الماتى وبلىستىق ءىىد تەرگەپ جاتىر. مەنىڭشە, از ۋاقىتتىڭ ىشىندە ءىستى تەرگەپ, سوتقا جولدايمىز” ىشكى ىستەر ءمينيسترى. “باقىلاۋعا الىڭىزدار. قوعامدىق قاۋىپسىزدىكتىڭ جانە زورلىقپەن كۇرەستىڭ ءبىزدىڭ نەگىزگى جۇمىسىمىز ەكەنىن بارلىعىمىز بىلەمىز. سوندىقتان تاياۋ ارادا وسى ماسەلەنى ۇكىمەتتە قارايمىز دەپ ويلايمىن”, – دەدى ساعىنتاەۆ. تالدىقورعان قالاسىنا جاقىن ماڭداعى كوكسۋ اۋدانىنىڭ 3 تۇرعىنى الماتى جاقتاعى ۇزىناعاش بازارىندا مال ساتۋعا كەتىپ سول كۇيى جوعالىپ كەتكەن بولاتىن. كەيىنىرەك ولاردىڭ مايىتتەرى تابىلدى. ۆەدومستۆوداعىلاردىڭ ايتۋىنشا, مارقۇمداردىڭ دەنەسىندە زورلىق بەلگىلەر بار. پوليتسەيلەر كىسى ءولتىردى دەگەن كۇدىكتىلەردى ۇستاپتى. ولار جامبىل اۋدانىنىڭ ەكى تۇرعىنى. قازىرگى ۋاقىتتا قر قىلمىستىق كودەكسىنىڭ 99-بابى (“ادام ءولتىرۋ”) بويىنشا سوتالدى تەرگەۋ باستالىپتى. كۇدىكتىلەر ۋاقىتشا ۇستاۋ يزولياتورىنا قامالدى.