بەينەتپەن باعىنعان بەلەس

وتكەن جىلى شوتلانديانىڭ گلازگو قالاسىندا وتكەن مۇمكىندىگى شەكتەۋلى سپورتشىلار اراسىنداعى جۇزۋدەن الەم چەمپيوناتىندا قوس قولا جۇلدەگە قول جەتكىزگەن ءزۇلفيا عابيدۋللينانى جامبىل وبلىسىنىڭ اكىمى كارىم كوكىرەكباەۆ قابىلداپ, قۇرمەت كورسەتتى. سوندا سپورتشىنىڭ جەكە باپكەرى ساتتار دۇيسەمباەۆ: «الدا پاراليمپيادا ويىندارى كەلە جاتىر. اللا قالاسا, مەملەكەتتىڭ مەرەيىن اسىراتىن دودادا ەل نامىسىن بيىكتەن كورسەتىپ, الەم چەمپيوناتىندا الدىمىزدى وراعان نيدەرلاند سپورتشىسىنان ەسە قايتارىپ, تۇعىردىڭ ەڭ بيىك ساتىسىنان كورىنۋدى كوزدەپ وتىرمىز», دەگەن ەدى. شىنىندا ءزۇلفيانىڭ الار اسۋى اسقاق ەكەن. ول ريو-دە-جانەي­رو­داعى حV جازع­ى  پاراليمپيادا ويىندارىندا 100 مەتر قاشىقتىققا ەركىن جۇزۋدە ەل قورجىنىنا التىن جۇلدە سالىپ, وسى جەڭىسىمەن مەدالدار سوقپاعىن سالىپ بەردى. التى دۇركىن الەم چەمپيونى پاراليمپيالىق ويىنداردا جاڭا الەم رەكوردىن جاڭارتتى. تاعدىرى زۇلفياعا التى جاسى­نان توسەككە تاڭىلۋدى جاز­­دى. الايدا, بۇل ونىڭ ءوزىن-ءوزى ۇ­دايى جەتىلدىرۋىنە كەدەر­گى بولا المادى. ول سۋدا ءجۇزۋ سپورتى­مەن اينالىسىپ, ءومىر­دەن لايىقتى ورنىن تابا ءبىلدى. رەس­پۋبليكالىق مۇگەدەك سپورت­شىلار بىرىنشىلىكتەرىندە جۇلدە­گەر اتانۋى ۇلكەن سپورتقا دەگەن قۇلشىنىسىن ارتتىرا تۇسكەن. ول ءۇشىن وسىدان 12 جىل بۇرىن وليمپياداعا قاتىسۋ باستى ارمان بولدى. ارماندار ورىندالادى ەكەن. قازاقستانعا ەڭبەك سىڭىرگەن جاتتىقتىرۋشى ساتتار دۇيسەمباەۆتىڭ قول استىندا تۇراقتى تۇردە جاتتىعۋ كوپ ۇزا­ماي ءوز ناتيجەسىن بەرە باستادى. بار-جوعى 8 جىل ىشىندە وليم­پيالىق ءنورماتيۆتى ورىنداپ, لوندوندا وتكەن پارا­ليم­پيالىق ويىندارعا قاتىسۋ مارتەبەسىنە دە قول جەتكىزدى. وعان بۇيىرعانى 12-ورىن بولدى. وكىنىشتىسى, ونىڭ مۇمكىندىگى مۇگەدەكتىك ساناتى بويىنشا دۇرىس بەلگىلەنبەۋىنەن وزىنەن ءبىر سىنىپ جوعارى قار­سى­لاسپەن باسەكەگە تۇسۋىنە تۋرا كەلگەن ەدى. ءبىر جىلدان كەيىن كانادانىڭ مونرەال قالاسىندا وتكەن الەم بىرىنشىلىگىندە جەتكەن ناتيجەسى ونىڭ ومىرىنە ۇلكەن بەتبۇرىس اكەلدى. بۇل سىندا ءزۇلفيا 50 مەترلىك قاشىقتىققا الدىن الا ەركىن جۇزۋدەن ايەلدەر اراسىندا S3 كلاسىندا الەم رەكوردىنا قول جەتكىزدى. ول 0:47.40 سەكۋندتىق ۋاقىتتى كورسەتتى. بۇعان دەيىن قىتاي سپورتشىسى وسى قاشىقتىقتى 0:47.79 سەكۋندتا ءجۇزىپ وتكەن-ءدى. سوڭعى سىندا 0:47.79 سەكۋندتىق كورسەتكىشپەن 2-ورىندى جەڭىپ الدى. ال قولا جۇلدەگە 50 مەتر قاشىقتىققا شالقالاي جۇزۋدە يە بولدى. ودان كەيىن ستاتسكانال (گول­لانديا) قالاسىندا وتكەن دۇنيە­جۇزىلىك مۇگەدەكتەر ويىندارىن­دا 4 التىن مەدال الىپ, 3 الەم رەكوردىن جاڭارتتى. سپورت جانە دەنە شىنىقتىرۋ ىستەرى اگەنتتىگى ۇيىمداستىرعان «ۇزدىك سپورتشى-2013» سالتاناتتى ءىس-شاراسىندا «جەڭىسكە ۇمتىلىس» اتالىمىن يەلەنگەنى دە بار. ونىڭ الدىندا شاردج قالاسىندا ء(باا) جۇزۋدەن مۇگەدەكتەر اراسىندا وتكەن دۇنيەجۇزىلىك ويىنداردا توپ جاردى. وڭتۇستىك كورەيانىڭ ينچحون قالاسىندا جالاۋىن جەلبىرەتكەن ازيا پاراليمپيالىق ويىندارىندا دا وسى بيىگىنەن تومەندەگەن جوق. ول ءۇشىن بىلتىرعى جىل دا تابىسسىز بولعان جوق, جوعارىدا جازعا­نىمى­زداي, گلازگو (شوتلان­ديا) قالاسىندا وتكەن الەم ءبىرىن­شىلىگىنەن ەكى بىردەي قولا مەدال ولجالاپ قايتتى. بيىلدىڭ وزىندە «ەيندحوۆەن كۋبوگى» حالىق­ارالىق جارىسى مەن گەر­مانيا اشىق چەمپيوناتىنىڭ جەڭىمپازى اتانىپ ۇلگەرگەن ەدى. قازىرگى تاڭدا ءزۇلفيا عابيدۋل­لينا «دوس تاراز» قوعامدىق بىرلەستىگىنىڭ اتقارۋشى ديرەكتورى بولىپ قىزمەت ەتەدى. ۇجىم­­م­ەن ءتىل تابىسا بىلەتىندىگىمەن, اشىق­تىعىمەن, ورىنداۋشىلىق قابى­لەتىنىڭ جوعارىلىعىمەن ابى­روي-سىي­عا دا بولەنۋدە. العا قويعان ماق­­ساتى ۇلكەن, ەڭبەكسۇيگىش جان. ول سپورتتا دا, ءومىر­دە دە جەڭىمپاز! كەشە ءزۇلفيا عابيدۋللينانى جامبىلدىقتار تارازدىڭ اۋە­جايىن­دا قۇشاق جايا قارسى الدى. الىس ەلدەن «التىن» ارقا­لاپ كەلگەن جەڭىمپازدى جام­بىل وبلىسىنىڭ اكىمى كارىم كوكى­رەكباەۆ قۇتتىقتاپ, الداعى ۋا­قىت­تا وبلىس ورتالىعىنان ءزاۋ­لىم ءۇي سالىپ بەرۋگە ۋادە بەردى. ال «حالىق بانكىنىڭ» جەرگىلىكتى في­ليالى وسى ءۇيدىڭ كورىمدىگى رەتىندە 3 ملن. تەڭگەنىڭ سەرتيفيكاتىن تابىس ەتتى. قازاقستاننىڭ ەڭبەك سىڭىرگەن جاتتىقتىرۋشىسى ساتتار بەيسەمباەۆقا 2 ملن. تەڭ­گە­نىڭ سەرتيفيكاتى تاپسىرىلدى. ورالحان ءداۋىت, «ەگەمەن قازاقستان» جامبىل وبلىسى